ޑައިރެކްޓަރު އަދި ޕްރޮޑިއުސަރު ކަރަން ޖޯހަރުގެ ބެލުމުގެ ދަށުން ބޮލީވުޑަށް ތައާރަފުވި ވަރުން ދަވަން މިހާތަނަށް ގިނައިން ކުޅެފައިވަނީ ކަރަން ޕްރޮޑިއުސްކޮށްފައިވާ ފިލްމުތަކެވެ. އޭގެ ތެރޭގައި "ހަމްޕްޓީ ޝަރްމާ ކީ ދުލްހަނިޔާ" އާއި "ބަދްރިނާތްކީ ދުލްހަނިޔާ" ހިމެނެ އެވެ.
ކަރަން ޕްރޮޑިއުސްކޮށް، "ހަމްޕްޓީ ޝަރްމާ ކީ ދުލްހަނިޔާ" އާއި "ބަދްރިނާތްކީ ދުލްހަނިޔާ" ގެ ޑައިރެކްޓަރު ޝަޝަންކް ކައިތާން ޑައިރެކްޓްކުރާ "ރަންބޫމީ" ގައި ބަތަލުގެ ރޯލު ކުޅުމުގެ ފުރުސަތު ވަރުން އަށް ލިބިއްޖެ އެވެ.
ލޯބީގެ ބަދަލު ހިފުމުގެ ޑްރާމާއެއްގެ މައްޗަށް އުފައްދާ މި ފިލްމަކީ ވޯ ޑްރާމާ އެކެވެ. އަދި މިއީ ވަރުންގެ ކެރިއަރުގައި ކުޅޭ މިފަދަ ފުރަތަމަ ފިލްމެވެ.
ހޯމަ ދުވަހު މި ފިލްމު އިއުލާންކުރަމުން ކަރަން ކުރި ޓްވީޓެއްގައި ވަނީ ޝަޝަންކް އާއި ވަރުން އެކުގައި ދެން އުފައްދާ ފިލްމު ބެލުންތެރިންނާ ހަމަ އަށް އަންނަނީ ދެ އަހަރު ފަހުން ކަމަށެވެ. އަދި މި ފިލްމުގައި ވަރުން އާއެކު ދެން ފެނިގެންދާ ތަރިން ވަރަށް އަވަހަށް އިއުލާންކުރާނެ ކަމަށް ބުނެފަ އެވެ.
ޝަޝަންކް މިހާރު އަންނަނީ ޖާންވީ ކަޕޫރާއި އިޝާން ކައްތަރު ބޮލީވުޑަށް ނިކުންނަ ފިލްމު "ދަޅަކް" ގެ މަންޒަރުތައް ނަގަމުންނެވެ. އަދި ވަރުން ވަނީ އަނުޝްކާ ޝަރްމާ އާއެކު ކުޅޭ ފިލްމު "ސުއި ދާގާ" ގެ ޝޫޓިން މިފަހުން ފަށާފަ އެވެ.
މި ފިލްމު ރިލީޒްކުރަން ކަނޑައަޅާފައިވާ ތާރީހަކީ 2020 ވަނަ އަހަރުގެ އޮކްޓޯބަރުގެ ތެރޭގަ އެވެ.