މި ސަރުކާރަކީ ދިވެހިންގެ ހިދުމަތުގައި އޮތް ސަރުކާރެއްކަން ވޭތުވެދިޔަ ހަތަރު އަހަރު ދުވަހުގެ ތެރޭގައި ސާބިތު ކޮށްދެވިފައިވާ ކަމަށް ރައީސް އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ. ރައީސް މިގޮތަށް ވިދާޅުވީ، ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި އިއްވެވި ރިޔާސީ ބަޔާނުގަ އެވެ.
މިރޭ ދަރުބާރުގެ ގޭގައި ބޭއްވި ޖަލްސާގައި ރާއީސް ޔާމީން އިއްވެވި ރިޔާސީ ބަޔާނުގައި ވިދާޅުވީ، މި ސަރުކާރުގެ އަމާޒަކީ، ކުރިއަށް އޮތް ތަނުގައި ގައުމީ ތަރައްގީ ވަޒަންކުރާ މިންގަނޑަކީ ރައްޔިތުންގެ އުފަލާއި ހިތްހަމަޖެހުންކަން ގަބޫލުކޮށް މިގައުމުގެ ތަރައްގީއަށާއި ކުރިއެރުމަށް މަސައްކަތް ކުރުން ކަމަށެވެ.
ރައީސް ޔާމީން ވިދާޅުވީ، ވޭތުވެދިޔަ އަހަރު ސަރުކާރުން އެންމެ ބޮޑު އިސްކަމެއް ދީނީ އިގްތިސޯދީ ގޮތުންނާއި އިޖުތިމާއީ ގޮތުން ގައުމު ކުރިއަށް ގެންދިޔުމަށް ކަމަށާއި ރައްޔިތުންނަށް ބުރަ އާއި ތަކުލީފު އުފުލަންޖެހިފައިވާ ކަންކަމަށް ލުއި ހޯދައިދީ، ރައްޔިތުންގެ ފުދުންތެރިކަން އިތުރުކުރުމަށް ކަމަށެވެ. އަދި ވިދާޅުވީ، ސަރުކާރުގެ އަމާޒަކީ ކުރިއަށް އޮތް ތަނުގައި ބޭރުގެ ބޮޑެތި އިންވެސްޓްމަންޓްތައް ރާއްޖެ ގެނެސް ދައުލަތުގެ ފުދުންތެރިކަން އިތުރުކުރުން ކަމަށެވެ.
"ރައްޔިތުންގެ ފުދުންތެރިކަން އިތުރުކުރުމަށް ވޭތުވެދިޔަ އަހަރަކީ، ތަރައްގީގެ އެތައް މަޝްރޫއުތަކެއް ނިންމުނު އަހަރެއް، ސަރުކާރުގެ އަމާޒަކީ ކުރިއަށް އޮތް ތަނުގައި ރައްޔިތުންނަށް ތަނަވަސްކަން ހޯދައިދީ، ރައްޔިތުންގެ ލާބަ އާއި މަންފާއަށް އިސްކަންދީގެން މަސައްކަތްކުރުން، އަދި ތަރައްހީގެ ހަރުފަތުގައި މަތީ އަދި މެދު ފަންތީގެ ގައުމަކަށް ރާއްޖެ ހެދުން،" ރައީސް ޔާމީން ވިދާޅުވި އެވެ.
ރައީސް ވިދާޅުވީ، ރާއްޖޭގައި ކުށުގެ ހާދިސާތައް ވޭތުވެދިޔަ ހަތަރު އަހަރުދުވަހުގެ ތެރޭގައި 35 ޕަސަންޓް ދަށްކުރެވިފައިވާ ކަމަށެވެ. އަދި ސަރުކާރުން އިސްނަގައިގެން ކުރިއަށްގެންދާ ހިޔާ މަޝްރޫއުގެ ދަށުން އަންނަ އަހަރު ނިމޭއިރު، ރާއްޖޭގެ އާބާދީގެ ޖުމުލަ 160,000 އަށްވުރެ ގިނަ ރައްޔިތުންނަށް ބޯހިޔާވަހިކަމުގެ ފުރުސަތު ލިބިގެންދާނެ ކަމަށެވެ.
"ސައުދީ ރަސްގެފާނު މަލިކު ސަލްމާނުގެ މިސްކިތުގެ މަސައްކަތް މިހާރުވަނީ ފަށާފައި، ސަރުކާރުގެ އަމާޒަކީ 9000 މީހުންގެ ޖާގައިގެ މި މިސްކިތުގެ މަސައްކަތް މިއަހަރުގެ ތެރޭގައި ނިންމައި، ހުރިހާ ހިދުމަތްތަކެއް އެއްފުރާޅެއްގެ ދަށުން ދެމުން ގެންދިޔުން، މި ވޭތުވެދިޔަ ހަތަރު އަހަރު ދުވަހުގެ ތެރޭގައި ބައިނަލްއަގްވާމީ މައިދާނުގައި ރާއްޖެ ވަނީ އެދެވޭ ކުރިއެރުންތަކެއް ހާސިލުކޮށްފައި، އަދި ބައިނަލްއަގްވާމީ މައިދާނުގައި އެކި ދާއިރާތަކުން ލީޑަޝިޕް ދައުރެއް ރާއްޖެ މިހާރުދަނީ އަދާކުރަމުން،" ރައީސް ވިދާޅުވި އެވެ.
ރައީސްގެ ވާހަކަފުޅުގައި ވިދާޅުވީ، ދަރުމަވަންތަ ހޮސްޕިޓަލް ގައި ގިނަ އާ ހިދުމަތްތަކެއް ތައާރަފުކުރެވި، މި އަހަރުގެ ތެރޭގައި އެހިދުމަތްތައް ފެށޭނެ ކަމަށާއި އައިޖީއެމްއެޗްގެ އެނދުގެ އަދަދު 500 އަށް ބަދަލުވެގެން ދާނެ ކަމަށް ރައީސް ވިދާޅުވި އެވެ. އަދި އައްޑޫ ސިޓީގައި ގާއިމްކުރާ 100 އެނދުގެ ޓާޝަރީ ހޮސްޕިޓަލްގެ މަސައްކަތް ނިމި، މިއަހަރުގެ މެދެއްހާ ހިސާބުގައި ހުޅުވޭނެ ކަމަށާއި އަތޮޅުތެރޭގެ ހުރިހާ ހޮސްޕިޓަލަކުންވެސް ތެލަސީމިއާ އަށް ސްކްރީން ކުރުމުގެ ހިދުމަތް، މިއަހަރުގެ ތެރޭގައި ހަމަޖެހިގެންދާނެ ކަމަށް ރައީސް ވިދާޅުވި އެވެ.
"ޒުވާނުންނަށް ވަޒީފާގެ ފުރުސަތު ތަނަވަސްކޮށްދިނުމުގެ ގޮތުން ގިނަ ވަޒީފާތަކެއް މިހާރުވަނީ އުފައްދާފައި، އަދި އިގްތިސާދީ އެކިއެކި މަސައްކަތް އިތުރަށް ފުޅާކުރުމާއެކު، ޖުމުލަ 76,000 އަށްވުރެ ގިނަ ވަޒީފާ މިހާރުވަނީ އުފައްދާފައި،" ރައީސް ވިދާޅުވި އެވެ.
ރައީސް ވިދާޅުވީ، ރާއްޖޭގެ އާބާދީ އެންމެބޮޑު ނުވަ ރަށެއްގައި 45 ކިލޯ މީޓަރުގެ މަގު ހެދުމުގެ މަސައްކަތް މިއަހަރު ކުރެވިފައިވާ ކަމަށާއި މިއަހަރުގެ ނިޔަލަށް އިތުރު 12 ރަށެއްގެ މަގު ހެދުމުގެ މަސައްކަތް ހިނގަމުންދާނެ ކަމަށެވެ. އަދި ވިދާޅުވީ، ރާއްޖޭގެ އެތެރޭގެ ވައިގެ ދަތުރުފަތުރުގެ ހިދުމަތް މިހާރަށްވުރެ ފުޅާކޮށް، މިއަހަރު ހދ. ކުޅުދުއްފުއްޓާއި ށ. ފުނަދޫ އާއި ނ. މާފަރު އަދި ގދ. މާވާރުލުގައި ޑޮމެސްޓިކް އެއާޕޯޓް ގާއިމުކޮށް ނިމޭނެ ކަމަށެވެ. އަދި ހއ. ހޯރަފުށީ ކައިރީގައި އެއާޕޯޓެއް އެޅުމުގެ މަސައްކަތްވެސް މިއަހަރު ފެށޭނެ ކަމަށް ރައީސް ވިދާޅުވި އެވެ.
"މިދިޔަ އަހަރު ގައުމުގެ އިގްތިސާދީ ދުވެލި ވަނީ 6.2 ޕަސެންޓުން 6.9 ޕަސެންޓަށް ކުރިއަރާފައި، މިއީ 2016 ވަނަ އަހަރަށްވުރެ މަތީ އަދަދެއް، ރާއްޖެއަށް ޒިޔާރަތްކުރާ ފަތުރުވެރިންގެ އަދަދު، މިވޭތުވެދިޔަ އަހަރު ވަނީ 8 ޕަސެންޓް އިތުރުވެފައި. އަދި މިދިޔަ އަހަރު ޖުމުލަ 1.3 މިލިއަނަށްވުރެ ގިނަ ފަތުރުވެރިން ރާއްޖެއަށް ޒިޔާރަތްކުރި، މިދިޔަ އަހަރު ނިމުނުއިރު ދައުލަތުގެ ރަސްމީ ރިޒާވްގައި ހުރީ 586.2 މިލިއަން އެމެރިކާ ޑޮލަރު، މި އަދަދު 2018 ވަނަ އަހަރު ގާތްގަނޑަކަށް 600 މިލިއަނަށްވުރެ މައްޗަށް އިތުރުވެގެންދާނެ. އަދި ދައުލަތުގެ އާމްދަނީ އަހަރުން އަހަރަށް މިދަނީ އިތުރުވަމުން، މިގޮތުން، 2018 ވަނަ އަހަރު ދައުލަތަށް 22.4 ބިލިއަން ރުފިޔާ ލިބޭނެކަމަށް ލަފާކުރެވޭ،" ރައީސް ވިދާޅުވި އެވެ.
ރައީސް ޔާމީން އިތުރަށް ވިދާޅުވީ، އިހަވަންދިއްޕޮޅުގައި ތަރައްގީ ކުރުމަށް ހަމަޖެހިފައިވާ އައިހެވަން މަޝްރޫއުގެ ފީސިބިލިޓީ ސްޓަޑީ އާއި މާސްޓަ ޕްލޭން މިހާރު ވަނީ ނިންމާފައި ކަމަށެވެ. އަދި ވިދާޅުވީ، މާލެއާއި ހުޅުމާލެ އަދި ވިލިނގިލީގެ މިހާރު ފެށިފައިވާ މަޝްރޫއުގެ ދަށުން މާލެ އަތޮޅުގައި 27 ފަޅެއް ތަރައްގީ ކުރުމަށްޓަކައި މިހާރު އާންމު ފަރާތްތަކަށް ދޫކުރެވިފައިވާ ކަމަށެވެ.