ރާއްޖޭގެ އެތެރޭގެ ވައިގެ ދަތުރުފަތުރުގެ ހިދުމަތް މިހާރަށްވުރެ ފުޅާކުރުމުގެ ގޮތުން މިއަހަރު ހއ. ހޯރަފުށީ ކައިރީގައި އެއާޕޯޓެއް އެޅުމުގެ މަސައްކަތް ފަށާނެ ކަމަށް ރައީސް އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ.
ރައްޔިތުން މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާ ފެށުމަށް ބޭއްވި ޖަލްސާގައި ރައީސް ޔާމީން އިއްވެވި ރިޔާސީ ބަޔާނުގައި ވިދާޅުވީ، ރާއްޖޭގެ އެކި ހިސާބުތަކަށް ވައިގެ މަގުން ފަސޭހައިން ދަތުރުކުރެވޭނެ ފުރުސަތު ތަނަވަސްކޮށްދިނުމަށް ކުރަމުންދާ މަސައްކަތްތަކުގެ ދަށުން، މިއަހަރު ތެރޭގައި ހދ. ކުޅުދުއްފުއްޓާއި ށ. ފުނަދޫ އާއި ނ. މާފަރު އަދި ގދ. މާވާރުލުގައި ގާއިމް ކުރާ ޑޮމެސްޓިކް އެއާޕޯޓް ތަކުގެ މަސައްކަތް އެއްކޮށް ނިމިގެންދާނެ ކަމަށެވެ. އަދި ހޯރަފުށީ ކައިރީގައި އެއާޕޯޓް އެޅުމުގެ މަސައްކަތް ފަށާނެ ކަމަށެވެ.
"ރާއްޖޭގެ އެކި ހިސާބުތަކަށް ވައިގެ މަގުން ފަސޭހައިން ދަތުރުކުރެވޭނެ ފުރުސަތު ތަނަވަސްކޮށްދިނުމަށް ކުރަމުންދާ މަސައްކަތްތަކުގެ ދަށުން، ޒުވާނުންނަށް ވަޒީފާގެ ފުރުސަތުތައް އިތުރުކޮށް، ސަރަހައްދަށް ޓޫރިޒަމް ފުޅާކޮށް، ތަނަވަސްކަން އިތުރުކުރުމުގެ ގޮތުން ހއ. ހޯރަފުށީ ކައިރީގައި އެއާޕޯޓެއް އެޅުމުގެ މަސައްކަތްވެސް މިއަހަރު ފެށޭނެ،" ރައީސް ޔާމީން ވިދާޅުވި އެވެ.
ހޯރަފުށީ ކައިރީގައި އެއާޕޯޓެއް އަޅާނެކަން ރަސްމީކޮށް އިއުލާންކުރައްވާފައިވަނީ ރައީސްގެ ރިޔާސީ ދައުރަށް ދެބައިވުން ފާހަގަކުރުމަށް ބޭއްވި "ފަަހި ނުވައެއް ތޭރަ" ފެސްޓިވަލް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް އަބްދުﷲ ޔާމީނެވެ.