ބަޔަކު އެ އަތޮޅަށް ދިއުމުން ތަރުހީބު ދޭން ބަޔަކު ނުނިކުތީއެއް ނޫނެވެ. ރާއްޖޭގެ އެންމެ ބޮޑު ފުޓްބޯޅަ މުބާރާތް، މިނިވަން ޗެމްޕިއަންޝިޕްގައި، އަރިއަތޮޅުން މި އަހަރުވެސް ދިން ތަރުހީބު ކުޑަ ވީއެވެ. މިދިޔަ އަހަރަށް ވުރެ މި އަހަރު ދިން ތަރުހީބު ފެނުނީ މާ ވަޅޯކޮށެވެ.
އަރިއަތޮޅަކީ ރާއްޖޭގެ ފުޓްބޯޅައަށް އެންމެ މޮޅު ކުޅުންތެރިން އުފެއްދި އެއް ސަރަހައްދެވެ. ސާފްޗެމްޕިއަންޝިޕް 2008 ރާއްޖެއަށް ކާމިޔާބު ކޮށްދިން ލަނޑުވެސް ޖެހީ އަރިއޮތޮޅު ތޮއްޑޫއަށް ނިސްބަތްވާ މުހުތާރު ނަސީރު (ޓޫކިލޯ) އެވެ. ކުރީގެ ގައުމީ ކެޕްޓަން މުހައްމަދު ނިޒާމު (މަޝްހޫރު ތޮއްޑޫ) އަކީވެސް ތޮއްޑޫއަށް ނިސްބަތްވާ ކުޅުންތެރިޔެކެވެ. ގައުމީ ޓީމުގެ މިހާރުގެ ގޯލްކީޕަރު މުހައްމަދު ފައިސަލް އާއި ވިކްޓަރީގެ ގޯލްކީޕަރު އަދި މިހާރު ގައުމީ ޓީމަށް ކުޅުން ހުއްޓާލާފައިވާ މުހައްމަދު އިމްރާން (ކުޑަ އިމްރާން) ވެސް ނިސްބަތް ވަނީ ނިސްބަތް ވަނީ އަރިއަތޮޅަށެވެ.
މިހެން މިދިމާވީ ކީއްވެ ހެއްޔެވެ؟ މިދިޔަ އަހަރުވެސް އެ އަތޮޅުން ބައިވެރިވީ އެންމެ ޓީމެކެވެ. މާޅޮސް އެކަންޏެވެ. މި އަހަރުވެސް އެރަށް އެކަންޏެވެ.
މިނިވަން ޗެމްޕިއަންޝިޕްގެ ފުރަތަމަ މުބާރާތް ނުވަތަ މިނިވަން 50 ޗެމްޕިއަންޝިޕްގައި އެންމެ ފޯރިގަދަ ކޮށް ފެނުނީ ވެސް އއ. އަތޮޅުގެ ބުރެވެ.
މިފަހަރު އެންމެ ހައިރާންވާން ޖެހުނީ އަރިއަތޮޅު ދެކުނުބުރި ނުވަތަ އދ. އިންވެސް ލިބުނު ތަރުހީބު ކުޑަވެގެން ދިއުމުންނެވެ. އދ. އިން އުފެއްދި ކުޅުންތެރިންގެ ލިސްޓް ދިގެވެ. ރާއްޖޭގެ ފުރަތަމަ ޑިވިޝަންގައި ވެސް އެއް އޮތޮޅަކުން އެންމެ ގިނަ ކުޅުންތެރިން ނެގޭނީ އދ. އަތޮޅުންނެވެ. މި އަހަރު އެ އަތޮޅުންވެސް ވާދަ ކުރަނީ އެންމެ ޓީމެކެވެ. އެއީ ފެންފުއްޓެވެ.
އެންމެ ރަނގަޅު ކުޅުންތެރިން އުފެދޭ އެއް އަތޮޅަކީ އަރިއޮތޮޅެވެ. ނަމަވެސް މިނިވަން ޗެމްޕިއަންޝިޕުން މުޅި ސަރަހައްދުން އެއް ރަށް ބައިވެރިވުމަކީ ކަންބޮޑުވާން ޖެހޭ ކަމެކެވެ. ކުރިން އަވަސްއާ ވާހަކަ ދައްކަމުން ކުލަބު ވެލެންސިއާ އާއި ވިކްޓަރީއަށް ކުޅުނު ތޮއްޑޫ އިބްރާހިމް ރަޝީދު (ބޮޑު ތޮއްޑޫ) ބުނެފައި ވަނީ ޒުވާނުންގެ ވަޒީފާ އާއި މަސައްކަތް ހުންނަ ގޮތުން، ޓީމެއް އެކުލަވާލަވާ ލެވޭ ވަރަށް އެއްބާރުލުން ލިބެމުން ނުދާ ކަމަށެވެ. އަދި މުބާރަތަށް ކުރަން ޖެހޭ ޚަރަދު ބޮޑުވުމުގެ މައްސަލައަކި ތޮއްޑުއަށް ކުރިމަތިވާ މައްސަލަ އެއް ކަމަށް، އޭނާ ފާހަގަ ކުރި އެވެ.
އެފްއޭއެމްގެ ޖެނަރަލްސެކެޓްރީ ހުސައިން ޖަވާޒު މިދިޔަ އަހަރު ވިދާޅުވެފައި ވަނީ މިނިވަން ޗެމްޕިއަންޝިޕްގެ ގަދަ ހަތަރު ޓީމު ދިވެހި ޕްރިމިއާ ލީގްގައި ވާދަ ކުރާތަން ފެނި، އަންނަ އަހަރު ގިނަ ޓީމުތައް ބައިވެރިވާނެ ކަމަށް ބެލެވޭ ކަމަށެވެ.
ނަމަވެސް ތަރުހީބު މިފަހަރު ފެނުނީ މާ ކުޑަކޮށެވެ. އޭގެ އެންމެ ބޮޑު ސަބަބަކަށް ވަނީ ސްޕޯޓްސް ކޮމިޝަންގައި ރަޖިސްޓްރީވި ޓިމުތަކަށް މިފަހަރު މުބާރާތުން ފުރުސަތު ދޭ ގޮތަށް ނިންމުންނެވެ. ރަނގަޅު ބަދަލެކެވެ. ޓީމުތައް ހަރުދަނާ ކަމާއެކު ހިންގުމަށް ފުރުސަތު ލިބިގެންދާނެ ބަދަލެއް ވެސް މެއެވެ. ނަމަވެސް މި އަހަރަކީ އެކަން ތައާރަފު ވެގެންދާ އަހަރަށް ވުމުން ޓީމުތަކަށް ދުރާލައި އިތުރު ވަގުތެއް ދިން ނަމަ އަރިއަތޮޅުން ވެސް އަދި އެހެން އަތޮޅުތަކުންވެސް ގިނަ ޓީމުތައް ބައިވެރިވީހެވެ. ގިނަ ރަށްރަށަށް އެކަމުގެ މަރުހާލަތައް އޮތީ ނޭނގިއެވެ.
މިއީ ރަށްރަށުން ވެސް ސަމާލުވާން ޖެހޭ ކަމެކެވެ. އަންނަ އަހަރު މުބާރާތުގައި ވާދަ ކުރުމަށްޓަކައި ސްޕޯޓްސް ކޮމިޝަނަށް ހުށަހަޅައިގެން އެކަމުގެ މަރުހަލާތައް ފުރިހަމަ ކުރުމަށް މިހާރުން ފެށިގެން އިސްނަގަން ޖެހެ އެވެ. މިނިވަން ޗެމްޕިއަންޝިޕުން ފާހަގަވި ކުޅުންތެރިން މިހާރު ތިބީ ރާއްޖޭގެ އެންމެ ބޮޑެތި ކުލަބު ތަކުގައެވެ.