މިއަހަރުގެ މަޖިލީހުގެ ފުރަތަމަ ދައުރުގެ ފުރަތަމަ ޖަލްސާގައި ރައީސް އަބުދުﷲ ޔާމީން އަބުދުލްގައްޔޫމް އިއްވެވި ރިޔާސީ ބަޔާނުން ހާމަވެގެންދިޔަ ކަމަކީ ގާނޫނީ އިމުގެ ތެރެއިން ރައީސް ޔާމީން ވެރިކަން ނިމުމަކަށް ގެންނަން މަޖުބޫރު ވެފައިވާ މިންވަރު ކަމަށް އަދާލަތު ޕާޓީން ބުނެފި އެވެ.
އަދާލަތު ޕާޓީން މިއަދު ނެރުނު ނޫސް ބަޔާނެއްގައި ބުނެފައިވަނީ، މަޖިލިސް ފެށުމަށް މިއަހަރު ބޭއްވި ޖަލްސާ އަކީ ޣައިރު ގާނޫނީ ޖަލްސާއެއް ކަމަށާއި އެ ޖަލްސާގައި ރައީސް ޔާމީން ދެއްކެވި ވާހަކަތަކުން ހާމަވީ ސަރުކާރުގެ ނުކުޅެދުންތެރިކަމާއި ގާނޫނީ ހައިސިއްޔަތު ގެއްލިފައިވާ ކަން ކަމަށެވެ. އެގޮތުން 2017 ވަނަ އަހަރު ނިމުނު އިރު ދައުލަތުގެ ރިޒާވްގައި 586 މިލިއަން ހުރިކަމަށް ފާހަގަ ކޮށްފައިވާ ކަމަށާއި އެ އަދަދަކީ 2014 ވަނަ އަހަރުގެ ރިޒާވްގައި ހުރި އަދަދާ އަޅާ ބަލާއިރު 29 މިލިއަން ޑޮލަރުގެ މަދު އަދަދެއް ކަމަށް ބަޔާނުގައި ވެއެވެ.
ބަޔާނުގައި ވަނީ، ރައީސް ޔާމީންގެ ވައުދުގައި ހިމެނޭ އައިހެވަންގެ މަޝްރޫއުގެ ފީޒިބިލިޓީ ސްޓަޑީޒް އާއި މާސްޓާ ޕްލޭން ނިންމާފައިވާ ކަމަށް ވިދާޅުވެފައިވާ ކަމަށާއި ނަމަވެސް އެމަޝްރޫއު ކަރުދާހުގައި އޮތުން ހާމަވަ ކަމަކީ ތަރައްގީގެ މަޝްރޫއުތައް ހިންގުމަށް މިސަރުކާރުން ނުކުޅެދިފައިވާ ކަމެވެ. އަދި ސަރުކާރުން މީގެ ކުރިން އިއުލާން ކޮށްފައިވާ ބޮޑެތި މަޝްރޫއުތަކުގެ ތެރެއިން ތިލަފުށީގައި އަޅަން ނިންމާފައިވާ ބައިނަލް އަގުވާމީ ބަނދަރާއި ރާއްޖޭގެ ތެޔޮ ހޯދުމުގެ މަޝްރޫއު ކާމިޔާބުވެފައި ނުވުމަކީ ސަރުކާރު ފެއިލްވެފައިވާކަން ސާބިތުވާ ހެއްކެއް ކަމަށް ބަޔާނުގައި ވެއެވެ.
"ގާނޫނު ތަންފީޒު ކުރުމުގެ ދާއިރާގައި ސަރުކާރުގެ ސިޔާސަތަކަށް ވެފައިވަނީ ރާއްޖެއަކީ އަމާން އަދި ރައްޔިޔންނަށް ރައްކާތެރިކަން ލިބިގެންވާ، ފަތުރުވެރިންނާއި އިންވެސްޓަރުންނަށާއި އެމީހުންގެ މުދަލަށް ރައްކާތެރިކަން ލިބިގެންވާ ތަނެއްގެ ގޮތުގައި ދެމެހެއްޓުން ކަމަށް ރައީސް ޔާމީން ވިދާޅުވިއިރު ވޭތުވެދިޔަ ހަތަރު އަހަރު ތެރޭގައި 26 މީހުން ވަނީ އަނިޔާވެރި ކަމާއެކު މަރާލެވިފަ، ބައިނަލް އަގުވާމީ އިންވެސްޓަރުންގެ އިތުބާރު ދިވެހި އިގްތިސާދަށް ވަނީ ގެއްލިފަ،" ބަޔާނުގައި ވެއެވެ.
ބަޔާނުގައި ވަނީ، ހިޔާ މަޝްރޫއުގެ ނަމުގައި ސަރުކާރުން ފަށާފައިވާ މަޝްރޫއަކީ ހަގީގަތަކަށްވުރެ ބޮޑަށް ބިލާހަކަށްވުން ގާތްކަމެއް ކަމަށާއި ވޭތުވެދިޔަ ހަތަރު އަހަރު ސަރުކާރުން ނިންމައި މީިހުން ދިރިއުޅެންފެށި ހައުސިން ޔުނިޓް ތަކަކީ މީގެ ކުރީގެ ސަރުކާރުތަކުގައި ފަށާފައިވާ މަޝްރޫއުތައް ކަމަށެވެ. އަދި ވޭތިވެދިޔަ ހަތަރު އަހަރު ބޯހިޔާވަހި ކަމުގެ އާ މަޝްރޫއުތަކެއް ހިންގުމަށް މި ސަރުކާރުން ފެއިލްވެފައިވާ ކަމަށް ބަޔާނުގައި ވެއެވެ.
ބަޔާނުގައި އިތުރަށްވަނީ، ރިޔާސީ ބަޔާނުގައި ރައީސް ޔާމީން ދެއްކެވި ވާހަކަތަކާއި ނުދައްކަވާ ދޫކޮށްލި ވާހަކަތަކުން ހާމަވަނީ ވެރިކަމުގެ ގާނޫނީ ހައިސިއްޔަތު މުޅިން ގެއްލި ވައުދު ފުއްދުމުގައި މި ސަރުކާރު ފެއިލްވެފައިވާ މިންވަރު ކަމަށެވެ.