ސަލާމަތީ ބާރުތަކުން އެ ވަގުތަކު ރައީސުލްޖުމްހޫރިއްޔާގެ މަގާމުގައި ހުންނަވާ ފަރާތެއްގެ ވިސްނުމާއި ފިކުރަށް ޖާގަދޭން ޖެހޭނެ ކަމަށާއި ސަމާލަތީ ބާރުތަކުން ރައީސްގެ ރައުޔާއި ތަފާތު ގޮތަކަށް ވިސްނައި އަމިއްލައަށް ކަންކަން ކުރަން ފަށައިފި ނަމަ ގައުމު އޮޔާ ހިނގައިދާނެ ކަމަށް ރައީސުލްޖުމްހޫރިއްޔާ އަދި ސިފައިންގެ އެންމެ މަތީ ވެރިޔާ އަބުދުﷲ ޔާމީން އަބުދުލްގައްޔޫމް ވިދާޅުވެއްޖެ އެވެ.
"ސިފައިންނާއެކު ދިވެހިން" ނަމުގައި ޕީޕީއެމުން މިރޭ ވެސްޓްޕާކް ސަރަހައްދުގައި ހުންނަ އެޕާޓީގެ ޖަގަހާގައި މިރޭ ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ތާރީހު އަބަދުވެސް ނަގައިދިން ފިލާވަޅަކީ ވެރިކަމާ ދަހިވެތި ވެގެން އަބަދުވެސް ބަޔަކު އުޅޭނެ ކަމަށާއި އެކަން އޮންނަނީ އެންމެ ގާތާއި ގަނޑުވަރުގެ ތެރެއިން ނުވަތަ ސިޔާސީ ޕާޓީތަކުގެ ވެސް މެދުގައި ކަމަށެވެ. ނަމަވެސް އެކަން ކުރަންވީ ގާނޫނުގައި އެކަން ކުރަން އޮތް ގޮތަށް ކަމަށާއި އެނޫން ގޮތަކަށް އެކަން ކުރަން ފުރުސަތު ދެވިގެންނުވާނެ ކަމަށެވެ.
ރައީސް ޔާމީން ވިދާޅުވީ، ގައުމު ނުރައްކާތެރި ހާލަތަކަށް ހުށަހެޅޭ އިރުގައި ގައުމަށް އެންމެ އިހުލާސްތެރިވާނީ ރައްޔިތުން ހޮވާފައި ހުންނަވާ ރައީސަކު ކަމަށާއި އެ ރައީސް ގައުމަށް ގެއްލުމެއްވާން އެވަގުތު ބޭނުން ނުވާނެ ކަމަށެވެ. އަދި ވިދާޅުވީ، ދިވެހި ގައުމަކީ ރައީސާ ހަވާލު ކުރެވިފައިވާ އަމާނާތާއި މަސްއޫލިއްޔަތެއް ކަމަށާއި ރައީސްގެ ފިކުރަށް ޖާގަދޭން ސަލާމަތީ ދެ ބާރުވެސް ޖެހޭނެ ކަމަށެވެ.
"ސަމާލަތީ ބާރުތަކުން އަމިއްލަ ގޮތަކަށް ރައީސްގެ ރައުޔުއާ ތަފާތު ގޮތަކަށް ވިސްނާފައި އަމިއްލަ އަށް ކަންތައްތަކެއް ކުރަން ފަށައިފި ނަމަ ގައުމު އޮޔާ ދިޔައީ، ސަލާމަތީ ބާރުތަކުން ވެސް ކޮށްގެން މިތިބަ ހުވަޔަކީ ގައުމާ ދީން ދިފާއު ކުރަން. ގައުމު ރަމްޒުވެގެން އަންނަނީ ހޮވިފައި ހުންނަ ރައީސަކާއި ހަމައިން، ގައުމެއް ނޯންނާނެ އެ ގައުމެއްގައި ވެރިކަމެއް ނޯންނަ ހާލަތެއްގައެއް،" ރައީސް ވިދާޅުވި އެވެ.
ރައީސް ވިދާޅުވީ، ރައީސް ހަވާލުވެ ހުންނަނީ ގައުމުގެ ހުރިހާ ކަމެއް އަމާން ކަމާއެކު ގެންދިއުމަށް ކަމަށާއި އޭނާގެ ގާބިލިއްޔަތު ތަންދިން އެންމެ ފުންމިނަކުން އެކަން ކުރުމަށް ކަމަށެވެ. އޭނައަށް ވުރެ ކުޅަދާނަ މީހުން ވެސް ތިއްބަވާނެ ކަމަށާއި ނަމަވެސް އެ މަސްއޫލިއްޔަތު އުފުލަނީ ރައްޔިތުން އެ ގާނޫނީ ޒިންމާ އާއި މަސްއޫލިއްޔަތު ހަވާލު ކުރާ މީހާ ކަމަށެވެ.
"ގާނޫނު ތައް މާ ރަނގަޅަށް ދެނެވަޑައިގަންނަވާނެ ސުޕްރީމް ކޯޓުގެ ފަނޑިޔާރުން، އެހެން ކަމުން މައްސަލަ ނިންމަވާ ފައިސަލާ ކުރަން މާ މޮޅުވާނެ ރައީސް އަށްވުރެ ސުޕްރީމް ކޯޓުގެ ފަނޑިޔާރުންނަށް، ނުކުންނަ އަމުރުތަކާއި ނުކުންނަ ހުކުމްތަކާ ދޭތެރޭ ސަލާމަތީ ބާރުރަކުން އެބަ ވިސްނަން ޖެހޭ، ގާނޫނު އަސާސީން ސުޕްރީމް ކޯޓަށް ބާރުދޭ ފަދައިން ސަލާމަތީ ބާރުތަކަކީ ވެސް އެ ގާނޫނު އަސާސީން އުފައްދާފައިވާ ދެ މުއައްސަސާ، ގާނޫނު އަސާސީގައި އެބަ ބުނޭ ސަލާމަތީ ބާރުތަކުން ތަބާވާން ޖެހޭނީ ގާނޫނީ އަމުރަކަށޭ، ކަމެއް ދިމާވެއްޖެނަމަ ފުލުހުންނާއި ސިގފައިން އުފައްދަވަން ޖެހޭ ސުވާލަކީ، މިއީ ގާނޫނީ އަމުރެއްތޯ، އަމުރު ތަންފީޒު ކުރަން ކޮޅުކޮޅަށް ދައްވައިގަންނަ އެއްޗެއް ނޫން،" ރައީސް ވިދާޅުވި އެވެ.
ރައީސް ވިދާޅުވީ، ސަލާމަތީ ބާރުތަކުގެ މައްޗަށް ކޮމާންޑް ކުރަން ރައްޔިތުން ހޮވާފައިހުރި މީހަކީ ރައީސް ކަމަށާއި ގައުމުގެ ހާލަތު ބަލަހައްޓާ މީހަކީ އެމީހާ ކަމަށާއި އޭނާގެ ރައުޔު ހޯދަން ވާނެ ކަމަށެވެ. އަދި ސަލާމަތީ ބާރުތަކުގެ ވިސްނުން ތަރުތީބު ކުރައްވަން ޖެހޭ ކަމަށެވެ.
"ދިވެހި ދައުލަތުގެ ނާ ދުއްވަން ރައްޔިތުން ހަވާލުކޮށްފައި ހުރީ ގާނޫނީ ސަރުކާރެއް ހިންގަން ހުރި މީހަކާ، އެހެން ކަމުން އެމީހެއްގެ މަޝްވަރާ ހޯދަން ޖެހޭނެ، އެއީ އަމުރު ތަންފީޒު ކުރުމުގައި ވިސްނަން ޖެހޭ ކަމެއް، މިފަހަރު މިކަމުގައި ވަރަށްވެސް ސާބިތުކަން ސިފައިން ދައްކުވައިދީފި، ވަގުތުކޮޅަކަށްފަހު ނަމަވެސް ފުލުހުންވެސް ވަނީ ސާބިތުކަން ދައްކުވާދީފަ،" ރައީސް ވިދާޅުވި އެވެ.