މި ގައުމަށް ޣައްދާރުވާ ފަރާތްތަކަށް މި ސަރުކާރުން އެއްވެސް ޖާގައެއް ނުދެއްވާނެ ކަމަށް ރައީސް އަބުދުﷲ ޔާމީިން އަބުދުލްގައްޔޫމް ވިދާޅުވެއްޖެ އެވެ.
ރައީސް ޔާމީން ވިދާޅުވީ، ގައުމަށް ޣައްދާރު ވަނީ ހަމައެކަނި ބޭރުގެ އަސްކަރިއްޔާ ގެންނަން ގޮވާލާ ފަރާތްތަކެއް ނޫން ކަމަށާއި އެ ފަރާތްތައްތަކަކީ ވެސް ޣައްދާރުންގެ ސަފުގައި އިސް މަގާމުގައި ތިއްބަވާ ބޭފުޅުން ކަމަށެވެ. އަދި ގާނޫނީ ސަރުކާރެއް ވައްޓާލަން ރިޝްވަތު ދީގެން ކުރުމަކީ އެކަން ކުރަން އޮންނަ ގޮތް ނޫން ކަމަށާއި އެއްވެސް މީހަކަށް ވެރިކަން ވައްޓާލުމުގެ ހައްގެއް ނެތް ކަމަށެވެ. އޭގެން ކޮންމެ މީހަކު ލޭބަލް ވެގެން އެދަނީ ޣައްދާރުންގެ ގޮތުގައި ކަމަށް ރައީސް ވިދާޅުވި އެވެ.
"ސަލާމަތީ ބާރުތަކާއެކު ރައްޔިތުން" މި ނަމުގައި ޕީޕީއެމުން މިރޭ ބޭއްވި ޖަލްސާގައި ރައީސް ޔާމީން ވިދާޅުވީ، ބޭރުގެ ސިފައިން ދިވެހި ގައުމަށް ގެންނަން ގޮވާލާ ފަރާތްތަކަކީ ދިވެހިންނެއް ނޫން ކަމަށާއި އެ ބޭފުޅުންނަށް ދިވެހި ރައްޔިތެއްގެ ހައްގު އަދި ދިވެހި ރައްޔިތަކަށް ވުމުގެ ޝަރުތު ހަމަ ނުވާ ކަމަށެވެ.
"ޣައްދާރުވާ އަނެއް ގިންތި އަކީ ބާރުވެރިކަމުގައި ތިބޭ ބަޔަކު ނާޖާއިޒް ބޭނުން ހިފައިގެން ރާއްޖެ މިކަހަލަ ނުބައި ނުރައްކާތެރި ފުރުސަތު ތަކަކަށް ހުށަހަޅާ ވަގުތު، އެކަން ކުރާ މީހުން އެންމެ ބޮޑަށް ޣައްދާރުވަނީ، އެމީހުން އެކަން ކުރީމަ ބޭރު މީހުންނަށް އަންނަން ޖާގަ ލިބިގެންދަނީ،" ރައީސް ވިދާޅުވި އެވެ.
ރައީސް ވިދާޅުވީ، އެކެއް ފެބްރުއަރީގައި ހިނގާދިޔަ ކަންތައްތަކަކީ ބަޣާވާތެއް ކަމަށާއި އެ ބަޣާވާތުގެ ތެރޭގައި އެންމެ ނުރައްކާތެރި ބަޣާވާތް ކުރި ބަޔަކީ މަގާމުގެ ބޭނުން ނާޖާއިޒް ގޮތުގައި ހިފައިގެން މުޅި ދިވެހި އުންމަތަށް ބިރުވެރިކަން ގެންނަށް މަސައްކަތް ކުރި މީހުން ކަމަށެވެ. އަދި ވިދާޅުވީ، މީހުން މަގުމައްޗަށް ނިކުމެ، އަސްކަރިއްޔާތަކަށް އޮޅުން އަރަން ދިމާވީ އެބޭފުޅުން އެ ފުރުސަތު ފަހި ކުރުމުން ކަމަށެވެ.
"އަސްލުގައި ޣައްދާރުންނަކީ އެެންމެ އިސް ސިޔާސީ މީހުންނެއް ނޫން، އެއީ ޝައްކެއްވެސް ނެތް ގޮތުގައި ޣައްދާރުންގެ ލިސްޓުން ޖާގަ ހޯއްދަވާފައިތިބި މީހުން، އެކަމަކު ގައްދާރުންގެ ލިސްޓްގައި މި މައްސަލާގައި [އެކެއް ފެބްރުއަރީގެ އަމުރު] ހަގީގަތުގައިވެސް ޣައްދާރުންނަށް މިވަނީ، މަގާމުގެ ބޭނުން ނާޖާއިޒް ގޮތުގައި ހިފައިގެން މިފަދަ ހާލަތަކަށް ދިވެހި ދައުލަތް ނުވަތަ ދިވެހި އުންމަތް ފުރުޅާލަން މަސައްކަތް ކުރި މީހުން، ރައީސް އަކަށް ހުންނަ މީހަކީ އެވަގުތު އެފަދަ ހާލަތެއް ދިމާވާހިނދު ފިލާނެ މީހެއް ނޫން،" ރައީސް ޔާމީން ވިދާޅުވި އެވެ.
ރައީސް ޔާމީން ވިދާޅުވީ، ގައުމަށް ޣައްދާރުވީ ރައީސްގެ މަގާމުގައި ހުންނެވި ބޭފުޅާ ނޫން ކަމަށާއި ގައްދާރުވީ އެހެން ބަޔަކު ކަމަށެވެ. އެއީ ވެރިކަން ބަދަލުކޮށްލަން އުޅުނު މީހުން ކަމަށެވެ. އެމީިހުން މަސައްކަތް ކުރީ ގައުމު ފުނޑާލަން ކަމަށާއި ވެރިކަން ބަދަލުކުރުމުގެ ހައްގު އެމީހުންނަށް ނެތް ކަމަށް ރައީސް ޔާމީން ވިދާޅުވި އެވެ.
ރައީސް އިތުރަށް ވިދާޅުވީ، މިއަދުވެސް ފުލުހުންގެ ތެރެއިން ހަތަރު، ފަސް މީހަކު ވަކިވެގެން ގޮސްފައިވާ ކަމަށާއި އެކަން އެގޮތަށް ހިނގާދިޔައީ އެކެއް ފެބްރުއަރީގެ އަމުރަށްފަހު އެރޭ ހިނގާދިޔަ ހަމަނުޖެހުމަށްފަހު، ފުލުހުންގެ ވާޖިބަށް ފުލުހުންގެ ތެރެއިން ބަޔަކު ހުރަސް އެޅުމުން ކަމަށެވެ. އަދި ވިދާޅުވީ، އެމަނިކުފާނުގެ ސަރުކާރެއްގައި އެކަހަލަ މީހުން ގައުމަށް ހިދުމަތް ކުރާކަށް ނުތިބޭނެ ކަމަށާއި އެއީ ގައްދާރުންގެ ޓީމުގައި ހިމެނޭ މީހުން ކަމަށެވެ.
"މިއުޅެނީ ހަމައެކަނި ސިޔާސީ ބައެއްގެ ތެރޭގައި ވޯޓް ކަރުދާހުން ނަތީޖާ ހޯދަން ކެއްކޮށްލަން ނުކެރިގެން އޭގެ ކުރިން މިކަން ކޮންމެސް ގޮތަކަށް ނިންމޭތޯ ބަލަން ކުރާ މަސައްކަތް މި ކުރެވެނީ، އެކަމަށް އެހީތެރިވި ބަޔަކީ މިކިޔާ ހުއްބުލް ވަތަނަށް ލޯބި އޮތް ބައެއްތޯ އެބަޖެހޭ ބަލާލަން، އެއްވެސް މީހަކަށް ނޯންނާނެ ރާއްޖެ ނުރައްކާތެރި ކަމަކަށް ހުށަހެޅުމުގެ ފުރުސަތެއް، އެއީ ހެދުނު ގޯސް،" ރައީސް ޔާމީން ވިދާޅުވި އެވެ.