މިއަދު ވެސް ފުލުހުންގެ ފަސް މީހަކު މަގާމުން ވަކިކޮށްފައިވާ ކަމަށް ރައީސް އަބުދުﷲ ޔާމީން މިރޭ ވިދާޅުވެއްޖެ އެވެ.
ޕީޕީއެމުން މިރޭ ބޭއްވި ޖަލްސާގައި ރައީސް ވިދާޅުވީ، މިއަދުވެސް ފުލުހުންގެ ތެރެއިން ހަތަރު، ފަސް މީހަކު ވަކިވެގެން ގޮސްފައިވާ ކަމަށާއި އެކަން އެގޮތަށް ހިނގާދިޔައީ އެކެއް ފެބްރުއަރީގެ އަމުރަށްފަހު އެރޭ ހިނގާދިޔަ ހަމަނުޖެހުމަށްފަހު، ފުލުހުންގެ ވާޖިބަށް ފުލުހުންގެ ތެރެއިން ބަޔަކު ހުރަސް އެޅުމުން ކަމަށެވެ. އަދި ވިދާޅުވީ، އެމަނިކުފާނުގެ ސަރުކާރެއްގައި އެކަހަލަ މީހުން ގައުމަށް ހިދުމަތް ކުރާކަށް ނުތިބޭނެ ކަމަށާއި އެއީ ޣައްދާރުންގެ ޓީމުގައި ހިމެނޭ މީހުން ކަމަށެވެ.
ރައީސް އެގޮތަށް ވިދާޅުވެފައިވާއިރު ފުލުސް އިދާރާގެ ސުޕެޝަލް އޮޕަރޭޝަންގެ ކުރީގެ ކޮމާންޑަރު ހުސައިން ސައިފު ވަނީ ފުލުހުންގެ ވަޒީފާއިން ވަނީ ވަކިކޮށްފަ އެވެ. މީގެ ކުރިން އޭނާ ވަނީ ދިރިއުޅުއްވާ ގެއިން ހައްޔަރުކޮށްފަ އެވެ. ސައިފްގެ އިތުރުން އެހެން ފުލުހަކު ހައްޔަރުކޮށްފައިވާ ކަމަށް ވެސް ފުލުހުން ބުނެ އެވެ. ނަމަވެސް އެއީ ކީއްވެ ކަމެއް މިހާތަނަށް ހާމައެއް ނުކުރެ އެވެ.