މިދިޔަ އަހަރު އޭލެވެލް އިމްތިހާނުގައި ބައިވެރިވެ އެންމެ ރަނގަޅު ނަތީޖާ ހޯދައިގެން ގަދަ 10 ގައި ހިމެނުނު ދަރިވަރުންނަށް އިނާމާއި ހަނދާނީ ލިޔުން ހަވާލުކޮށްފި އެވެ.
ދަރުބާރުގޭގައި މިރޭ ބޭއްވި ރަސްމިއްޔާތުގައި، މިދިޔަ އަހަރު މެއި އަދި ޖޫންގައި ބޭއްވި އޭލެވެލް އިމްތިހާނުން ގަދަ ދިހައެއްގައި 187 ދަރިވަރުން ހިމެނުނެވެ. އޭގެ ތެރެއިން އެއްވަނައަށް ދިޔަ ދަރިވަރުންނަށް އިނާމު ހަވާލުކޮށްފައިވަނީ އެޑިއުކޭޝަން މިނިސްޓަރު ޑރ. އާއިޝަތު ޝިހާމެވެ.
ރަސްމިއްޔާތުގައި އެޑްއެކްސްއެލް އޭލެވެލް އިމްތިހާނުތަކުން ފަސް އޭ ސްޓާ އަށްވުރެ މަތިން ނަތީޖާ ހާސިލްކޮށްގެން އެޑްއެކްސްއެލްއިން ދޭ ހައި އެޗީވާ އެވޯޑް ހާސިލުކުރި ހަތަރު ދަރިވަރުންނަށް ވެސް އެވޯޑު ދިނެވެ. އަދި، ވަކި ވަކި މާއްދާތަކުން ދުނިޔޭގެ ގަދަ 10 ގައި ހިމެނުނު ރާއްޖޭގެ ހަ ދަރިވަަރަކަށް ވެސް އިނާމު ދީފައިވެ އެވެ.
ރަސްމިއްޔާތުގައި މުޅި ރާއްޖެއިން ވަކިވަކި މާއްދާތަކުން އެއްވަނަ ހޯދި 13 ދަރިވަރަކަށްވެސް އިނާމުދީފައި ވެއެވެ. މިއަހަރު ގަދަ 10 އެއްގެ އެއްވަނަ 44 ދަރިވަރުން ހޯދާފައިވާއިރު ދެވަނަ 33 ދަރިވަރުން އަދި ތިން ވަނަ ހަތް ދަރިވަރަކު ހޯދާފައިވެ އެވެ.
އޭލެވެލް އިމްތިހާނުގައި ރަނގަޅު ނަތީޖާ ހޯދައި، އެޑްއެކްސްއެލްއިން ދޭ ހައި އެޗީވާ އެވޯޑް ހާސިލުކުރި ހަތަރު ދަރިވަރުންގެ ތެރެއިން ރައީސް އަބްދުﷲ ޔާމީން ވަނީ ތިން ދަރިވަރަކާ މިއަދު ބައްދަލު ކުރައްވާފަ އެވެ. މިރޭގެ ރަސްމިއްޔާތުގައި ރައީސް ބައިވެރިވަޑައިނުގަންނަވަ އެވެ.