މާލޭ ލީގްގައި މިދިޔަ ހޮނިހިރު ދުވަހުގެ ރޭ ކުލަބު އީގަލްސް އާއި ކުލަބު ވެލެންސިއާ ކުޅުނު މެޗުގެ ޕޯސްޓްމެޗު ޕްރެސްގައި، ވެލެންސިއާގެ ކޯޗް ސޮބާހް މުހައްމަދު އިބްރާހިމް (ސޮބާ)، ރެފްރީއާ ބެހޭ ގޮތުން ދެއްކި ވާހަކައާ ގުޅިގެން އޭނާ އަށް ސަސްޕެންޝަނެއް އައުން ކައިރި އެވެ.
އީގަލްސް އާ ދެކޮޅަށް 3-3 ން އެއްވަރުވި މެޗުގައި ރެފްރީކަން ކުރީ، ނިއުޝާދު މުހައްމަދެވެ. އޭނާ އަކީ މިދިޔަ އަހަރު ސޮބާގެ ކުރީގެ ޓީމު ގްރީން ސްޓްރީޓް، ދިވެހި ޕްރިމިއާ ލީގްގައި މާޒިޔާއާ ދެކޮޅަށް ކުޅުނު މެޗު ހުއްޓާލަން ޖެހުނު އިރު ރެފްރީކަން ކުރި ރެފްރީ އެވެ.
ވެލެންސިއާ ގޮވައިގެން އީގަލްސްއާ ދެކޮޅަށް ކުޅުނު މެޗަށް ފަހު މީޑީއާ އާވާހަކަ ދައްކަމުން ސޮބާ ބުނީ މެޗަށް އިންސާފު ކުރެވޭ ވަރަށް ވުރެ ރެފްރީ ނިއުޝާދު "އަންފިޓް" ކަމަށެވެ.
"މެޗު ބެއްލެވި އެންމެހާ ބޭފުޅުންނަށް އެނގޭނެ، ރެފްރީ އަރާ ސެންޓަ ސާކަލް ތެރޭ ހިނގާލަ ހިނގާލާ، އޭނާ ޑެސިޝަން ނަގަންވީމަ ނަގަނީ،" ހިތްހަމަ ނުޖެހުމާއެކު ސޮބާ ބުނެފައި ވެއެވެ.
"އަޅުގަނޑުމެން މިތަނަށް މި އަންނަނީ ވަރަށް ބުރަކޮށް މަސައްކަތް ކޮށްފައި ކޮންމެ ދުވަހކު ދެ ފަހަރު މަސައްކަތް ކޮށްގެން މިތަނަށް މިއަންނަނީ، އަދި އެތަށް ބައިވަރު ލާރިތަކެއް ހަރަދު ކޮށްފައި މިއަންނަނީ ،މިހުރިހާ މަސައްކަތެއް ކޮށްފައި އައީމަ ރެފްރީ މިހެން ހެދީމަ މިއީ ވަރަށް ބޮޑު ގެއްލުން."
"މިދިޔަ އަހަރު އެތައް މައްސަލައެއް ހުރެގެން ސަސްޕެންޑް ކުރީ މީހެއް މީނަ މީ، އެވަރު މީހެއް އަނެއްކާ ގެނެސް މިލަނީ، އޭނަގެ ފިޒިކް ހުރި ގޮތުން އެނގޭނެ އޭނަ ފިޓެއް ނޫން ކަން، ހިނގާލަ ހިނގާލާ، އެބަ ޖެހޭ ތަންކޮޅެއް ފިޓް އިންޓެންސިޓީ ރަނގަޅު ރެފްރީ އެތަނަށް ލެވެން، ނުނީ މިކަމެއް ނުކުރެވޭނެ، މިކަން މިގޮތަށް ނުކުރިއްޔާ ރަނގަޅު ވާނީ، ރެފްރީ ނުލާ ކުޅުނަސް މިއަށްވުރެ ރަނގަޅު ވާނެ، އޭރުން ކޮންމެވެސް ބައެއް ތަޅާ ފޮޅައިގެން މޮޅުވާނެތާ."
ސޮބާ ބުނީ މިދިޔަ އަހަރުވެސް ދައްކަން ޖެހުނީ ރެފްރީ ނިއުޝާދުގެ ވާހަކަ ކަމަށާއި މިއަހަރުވެސް އޭނާގެ ވާހަކަ ދައްކަން ޖެހުމަކީ ކަންބޮޑުވާން ޖެހޭ ކަމެއް ކަމަށެވެ.
"މިދިޔަ އަހަރުވެސް ތިން މެޗުގައި މީނަ [ރެފްރީ ނިއުޝާދު] ގެ ވާހަކަ ދެއްކިން، ގްރީން ސްޓްރީޓްގެ ދެ މެޗު (މީނަ) ހަލާކު ކޮށްލި،" ސޮބާ ބުނެފައި ވެއެވެ. "އަނެއްކާ މިއަދު މީނަގެ ޑެސިޝަންތައް އެ ހުރިގަތް، އެއްގޮތަކަށްވެސް އެއްވަރު ވީމަކަ ނޫން، ވަރަށް ހިތްހަމަޖެހޭ ކުޅުންތެރިން ކުރި މަސައްކަތަމެދު، ހަމަ ވަރަށް ހެޕީ، އެކަމަކު މިކަހަލަ އޮފިޝަލުން ލައިގެން އެކަން ކުރިއަކަށް ނުގެންދެވޭނެ، މިއީ ވަަރަށް ހިތާމަވެރި ކަމެއް."
ރެފްރީ އާ ހެދި "މެޗު ހަލާކުވެގެން" ދިއުމަކީ އެފްއޭއެމުން ވިސްނަން ޖެހޭ ކަމެއް ކަމަށް ސޮބާ ފާހަގަ ކުރި އެވެ. އޭނާ ބުނީ ރެފްރީ ނިއުޝާދު ހުރީ މިދިޔަ އަހަރު "ފެއިލް" ވެފައި ކަމަށެވެ.
"ވަރަށް ބައިވަރު މަސައްކަތް ކޮށްފައި މިތަނަށް [ދަނޑަށް] މިއަންނަނީ 90 މިނެޓަށް ދަނޑު މައްޗަށް، އަޅުގަނޑުމެން ޑެއިލީ ހުރިހާ ގޮތަކަށް ތައްޔާރު ވެގެން އައިސް އެންމެ މީހަކާ ހެދި، މުޅި ދުވަސް ހަލާކު ވެގެން ދިޔައީމަ އަޅުގަނޑަށް ހީވަނީ މިކަމާ އެފްއޭ ވިސްނަން ވެއްޖެ ހެން،" ސޮބާ ބުނެފައި ވެއެވެ.
"މިދިޔަ އަހަރު މުޅިން ފެއިލް ވެފައި ހުރި މީހެއް ގޮވައިގެން އަނެއްކާ މި އެރީ، އެ މިންގަނޑަކަށް ނުފެތޭ އޭނައެއް، އޭނާގެ ހަށިގަނޑަށް ބަލައިލީމަ އެބަ އެނގޭ އެކަން."
ސޮބާ ދެއްކި ވާހަކަ އާ ގުޅިގެން، އޭނާ އަށް ހަތަރު މެޗުގެ ސަސްޕެންޝަނެއް އައުން ކައިރި އެވެ. އޭނާ އަށް ސަސްޕެންޝަން އަންނާނެ ކަމަށް ބެލެވެނީ އެފްއޭއެމްގެ ޑިސިޕްލިނަރީ ކޯޑްގެ 42 ވަނަ މާއްދާގެ (ހ) ގެ ދަށުންނެވެ. އެމާއްދާގައި ބުނެފައި ވަނީ އޮފިޝަލަކު ކުޅިވަރުގެ ރޫހާ ހިލާފުވާ ބަހަކުން އެއްވެސް ފަރާތަކާ މުހާތަބު ކޮށްފި ކޮށްފިނަމަ ހަތަރު މެޗަށް ސަސްޕެންޑް ކުރެވޭނެ ކަމަށެވެ.