އޭއެފްސީ ކަޕްގައި ނިއު ރޭޑިއަންޓަށް ސަރަހައްދުގެ ބާރަކަށް ވެވޭނެ ކަމަށް އެ ޓީމުގެ ކޯޗް އޮސްކާ ބުރުޒޮން ބަރޭރަސް ބުނެފި އެވެ.
އެފްސީ ކަޕްގައި، މިއަދު ނިއުރޭޑިއަންޓް ނިކުންނާނީ، ބަނގްލަދޭޝްގެ ޑާކާ އަބަހާނީއާ ދެކޮޅަށެވެ. ޑާކާގެ ބަންގުބަންދު ސްޓޭޑިއަމްގައި ކުޅޭ މެޗު ފަށާނީ ރާއްޖޭގަޑިން މިއަދު 3:15 ގައެވެ.
ފުޓްބޯޅަ ޚަބަރުތައް ގެނެސްދޭ މޯލްޑިވްސްކޯއާ ވާހަކަ ދައްކަމުން ސްޕެއިންގެ ކޯޗު ބުނީ އޭނާގެ ޓީމަށް އޭޝިއާ ލެވަލްގައި ބާރަކަށް ވެވޭނެ ކަމަށެވެ. އޭއެފްސީ ކަޕްގެ ޓާގެޓަކަށް ނިއުރޭޑިއަންޓުން ކަނޑައަޅާފައި ވަނީ، އެންމެ ކުޑަމިނުން އޭއެފްސީ ކަޕްގެ ފައިނަލަށް ދަތުރު ކުރުމެވެ.
"ގުރޫޕް ސްޓޭޖްގެ ހަ މެޗާ މެދުވެސް އަހަރެމެން ދެކެނީ ފައިނަލެއް ގޮތަށް، ފައިނަލު އަބަދުވެސް އުނދަގޫ ވާނެ، ނަމަވެސް އަހަރެމެން ގަބޫލު ކުރަނީ އަހަރެމެންނަށް އޭޝިއާގެ ވަރުގަދަ ބާރަކަށް ވެވޭނެކަމަށް." އިންޓަވިއުގައި ބުރުޒޮން ބުނެފައި ވެއެވެ.
އަބަހާނީއާ ދެކޮޅަށް ކުޅޭ މެޗަކީ، ބުރުޒޮން އާއި ނިއު އަށް ހާއްސަ މެޗެކެވެ. މިދިޔަ އަހަރު ދިވެހި ޕްރިމިއާ ލީގްގެ ފުރަތަމަ މެޗުގައި މާޒިޔާ އަތުން ބަލިވި ފަހުން އެއްވެސް މެޗަކުން އެ ޓީމު ބަލިވެފަ އެއް ނުވެ އެވެ. މިއަދުގެ މެޗުން މޮޅުވެ އެ ޓްރެކް 20 ގެންދެވޭނެ އެވެ.
ބަންގުލަދޭޝްއަށް ގޮސް އަވަސް އަށް ދިން އިންޓަވިއުގައި ބުރުޒޮން ބުނެފައި ވަނީ، އޭއެފްސީ ކަޕަށް އޭނާގެ ޓީމުން ނިކުންނާނީ ޕއޮިންޓެއް ހޯދަން ނޫން ކަމަށާއި މެޗުން ތިން ޕޮއިންޓް ހޯދަން ކަމަށެވެ.
"އަހަންނަށް ހީ ނުވޭ އެއްވެސް މުބާރާތަކަށް ނިއު ރޭޑިއަންޓް ނިކުންނާނެ ހެނެއް މެޗު އެއްވަރުކޮށް ޕޮއިންޓެއް ހޯދާކަށް،" ސްޕެއިންގެ ކޯޗު ބުނެފައި ވެއެވެ. "ފުރަތަމަ މެޗަށް ވެސް އަހަރެމެން ވިސްނުން ހުރީ އަނެއް ބުރަށް، އެ ވިސްނުމާއެކު ކުޅުންތެރިން މެޗަށް ނިކުންނާނީ."
އޭނާ ބުނީ، އަބަހާނީ މެޗަކީ، ފިޒިކަލީ ވަރުގަދަ ގޭމަކަށް ވާނެ ކަމަށެވެ. ހަމައެޔާއެކު ޑާކާގެ ދަނޑުގެ ވިނަގަނޑުގެ ކޮންޑިޝަން ވެސް އެހާ ރަނގަޅު ނޫން ކަން ބުރުޒޮން ފާހަގަ ކުރި އެވެ.