ދިރާގު ހިދުމަތް ހޯއްދަވާ ކަސްޓަމަރުންގެ ޒާތީ މައުލޫމާތު ހިއްސާ ކުރަނީ ކޯޓު އަމުރެއްގެ ދަށުން ނުވަތަ ގާނޫނުގައި ކަނޑައަޅާފައިވާ ގޮތުގެ މަތީން ކަމަށް އެކުންފުނިން ބުނެފި އެވެ.
ދިރާގުން ބުނީ، ކަސްޓަމަރުންގެ ޒާތީ މައުލޫމާތު ކޯޓު އަމުރެއްގެ ދަށުން ނުވަތަ ގާނޫނުގައި ކަނޑައަޅުއްވާފައިވާ ގޮތުގެ މަތީން ނޫނީ އެހެން ފަރާތަކަށް ހިއްސާކޮށްފައިނުވާނެ ކަމަށާއި ކުރިމަގުގައިވެސް ނުކުރާނެ ކަމަށެވެ. އަދި ދިރާގުން އަމަލު ކުރަނީ ރާއްޖޭގައި ޓެލެކޮމިއުނިކޭޝަން އޮޕަރޭޓަރުން އަމަލު ކުރަން ލާޒިމްކޮށްފައިވާ ގާނޫނުތަކާއި ގަވާއިދުތަކާއި ކޮމިއުނިކޭޝަން އޮތޯރިޓީ ދޫކޮށްފައިވާ ލައިސެންސްގެ ދަށުން ކަނޑައަޅާފައިވާ އުސޫލުތަކުގެ މަތިން ކަމަށް ދިރާގުން ބުންޏެވެ.
ދިރާގުން އެގޮތަށް ބުނީ، ކަސްޓަމަރުންގެ ޒާތީ މައުލޫމާތު ހިއްސާ ކުރަމުންދާ ކަމަށްބުނެ ސޯޝަލް މީޑިއާގައި ވާހަކަތައް ދެކެވެމުންދާތީ އެވެ. އެގޮތުން އިދިކޮޅު އެމްޑީޕީގެ ސޯޝަލް މީޑިއާ އެކްޓިވިސްޓް ތައްޔިބު ޝަހީމްގެ ދިރާގު ނަންބަރުގެ އިތުރު ސިމް ކާޑެއް ހައްދާފައިވާ ކަމަށް އޭނާގެ ޓްވިޓާގައި ވަނީ ތުހުމަތުކޮށްފަ އެވެ. އަދި ހެދި ސިމް ކާޑު ބޭނުން ކޮށްގެން ސަރުކާރުން އޭނާގެ ސޯޝަލް މީޑިއާ އެކައުންޓްތައް ހެކް ކޮށްފައިވާ ކަމަށް ވެސް އޭނާ ތުހުމަތުކޮށްފައި ވެއެވެ.
އެކަމާ ގުޅިގެން އޭނާ ދިރާގަށް ފޮނުވި ސިޓީއަށް ޖަވާބުދެއްވައްމުން އެކުންފުނިން ފޮނިވި ސިޓީގައި ބުނެފައިވަނީ، ފުލުހުން ތަހުގީގު ކުރަމުންދާ މައްސަލައަކާއި ގުޅިގެން އޭނާގެ ނަމްބަރުގެ އެކްސެސް ޕޮލިސްއަށް ދީފައިވާ ކަމަށެވެ. އަދި އެކްސެސް ދީފައިވަނީ ކުރިމިނަލް ކޯޓުން ކޮށްފައިވާ އަމުރެއްގެ ދަށުން ކަމަށްވެސް އެސިޓީގައި ވެއެވެ.
އެކަމާ ގުޅޭ އިތުރު މައުލޫމާތު ދެވެން ނެތް ކަމަށްވެސް އެސިޓީގައި ވެއެވެ.
ތައްޔިބުގެ ދިރާގު ނަންބަރުގެ އިތުރު ސިމް ކާޑެއް ހައްދައި، ސަރުކާރުން އޭނާގެ ސޯޝަލް މީޑިއާ އެކައުންޓްތައް ހެކް ކޮށްފައިވާ ކަމަށްބުނެ އިދިކޮޅު ފަރާތްތަކުން ދަނީ ސޯޝަލް މީޑިއާގައި ދިރާގު ބޮއިކޮޓް ކުރުމަށް ގޮވާލަމުންނެވެ.