މީގެ ފަސް ވަރަކަށް އަހަރު ކުރިއަށް ބަލައިފިނަމަ ރާއްޖޭގެ ފުޓްބޯޅައިގައި ވާދަވެރި އެންމެ ބޮޑަށް އޮތީ ނިއު ރޭޑިއަންޓާއި ވިކްޓަރީއާ ދެމެދު އެވެ. އެ ދެ ކުލަބުގެ ވާދަވެރި ކަމުގެ ތެރެއިން އެ ދެ ކުލާބުގެ ކޯޗުންގެ ދެމެދުގައިވެސް ބޮޑު ވާދަވެރި ކަމެއް އޮތެވެ. ވިކްޓަރީގެ އޭރުގެ ކޯޗަކީ ގްރީން ސްޓްރީޓްގެ މިހާރުގެ ކޯޗު އަލީ ސުޒޭން އެވެ. ނިއުގެ ކޯޗަކީ އީގަލްސްގެ މިހާރުގެ މިހާރުގެ ކޯޗް މުހައްމަދު ޝިޔާޒު (މޯހަން) އެވެ. އެ ވާދަވެރިކަމުގެ ތެރެއިން 2012 ވަނަ އަހަރު ދިވެހި ލީގާއި ޕްރެޒިޑެންޓް ކަޕް ހޯދީ މޯހަންގެ ކޯޗު ކަމުގެ ދަށުން ނިއު ރޭޑިއަންޓެވެ.
މިހާރު މި ދެ ކޯޗުން ތިބީ އެންމެ ވާދަވެރި ކުލަބުގައެއް ނޫނެވެ. މާލޭ ލީގްގައި މާދަމާ ހަވީރު ނިކުންނާނީ އީގަލްސް އާއި ގްރީން ސްޓްރީޓެވެ. ދެ ކޯޗުން އެންމެ ވާދަވެރި ކުލަބުގައި ނެތް ނަމަވެސް ދެ ކޯޗުންގެ މެދުގައި މިހާރުވެސް ވާދަވެރިކަން އޮންނާނެ ކަމަށް އީގަލްސްގެ ކޯޗު މޯހަން ބުންޏެވެ.
"އެއީ ޕްރޮފިޝަނަލީ އޮންނަ ވާދަވެރިކަން، ނުވަތަ މެޗުގައި އޮންނަ ވާދަވެރިކަން، އެކަން ހަމަ ޔަގީނުންވެސް ކުރިއަށްދާނެ،" މިއަދުގެ މެޗުގެ ކުރިން މީޑިއާ އާ ވާހަކަ ދައްކަމުން މޯހަން ބުންޏެވެ. "ސުޒޭން ވެސް އަޅުގަނޑުގެ މައްޗަށް ކުރި ހޯދަން، ކާމިޔާބު ހޯދަން ބޭނުން ވާނެ، ހަމަ އެގޮތަށް އަޅުގަނޑުވެސް ސުޒޭންގެ މައްޗަށް ކާމިޔާބު ހޯދަން ކުރަން ޖެހޭ މަސައްކަތް ކުރާނެ."
މޯހަން ބުނީ، އޭނާ އާއި ސުޒޭން އާ ވާދަވެރިކަން އޮތުމަކީ އިތުރަށް މަސައްކަތް ކުރުމަށް ހިތްވަރެއް ލިބިގެންދާ ކަމެއް ކަމަށެވެ.
"އޮންނާނީ ޕްރޮފިޝަނަލް ލެވަލްގައި އޮންނަ ވާދަވެރިކަމެއް، މެޗުގެ ފަހު ކަށި ގަނޑާއެކީގައި އެކަހަލަ އެއްވެސް ވާދަވެރިކަމެއް ނޯންނާނެ." މޯހަން ބުންނެވެ.
ސުޒޭން މިދިޔަ އަހަރު ބުނެފައި ވަނީ މޯހަން އާއި އޭނާއަކީ މާލޭގައި އުޅޭނަމަ އެއްކޮށް ކޮފީއަށް ވެސް އަރާ ދެ މީހުން ކަމަށާއި ނަމަވެސް ވާދަވެރި މެޗަކަށް ނިކުންނައިރު ދެ މީހުންގެ ދެމެދުގައިވެސް ވާދަވެރިކަން އޮންނާނެ ކަމަށެވެ.
މާދަމާގެ މެޗުގެ ޕްރީ މެޗު ޕްރެސްގައި، ކުރީގެ ވާދަވެރި ކަމާ ބެހޭގޮތުން ސުވާލު ކުރުމުން އޭނާ ދިން ޖަވާބު މިއޮތީ އެވެ.
"މީގައި މޯހަން އަކާ އަޅުގަނޑު ވާދައެއް ނުކުރަން ކަންނޭންގެ" މިއަދު މެޗާ ގުޅިގެން ބޭއްވި ޕްރީ މެޗު ޕްރެސް ކޮންފަރެންސްގައި ސުވާލު ކުރުމުން ސުޒޭން ބުންޏެވެ. "އަޅުގަނޑު މި ވާދަ ކުރަނީ އަޅުގަނޑުގެ ފޭސް ސޭވިންގް މިޝަންއެއްގައި، (އެ މިޝަންގައި) އުޅޭއިރު އޭގެ އިދިކޮޅަށް ކޮންމެ ކޯޗެއްގެ ނިކުތަސް ވާދަ ކުރަން ޖެހޭނެ، އެއީ އަދި މޯހަން ވިޔަސް އަދި އެހެން މީހެއް ވިޔަސް، ތިބުނާހެން 2012 ހިސާބުގައި އަދި 2011، 2010 ގައިވެސް މޯހަން ދިމާވެފަ ހުންނާނީ."
މޯހަން ބުނީ މާދަމާގެ މެޗު ވާނީ ވަރަށް ފޯރިގަދަ ވާދަވެރި ކުޅުމެއް ފެނިގެންދާނެ މެޗަކަށް ކަމަށެވެ. އެއީ ދެ ޓީމަށްވެސް ކުރިއަށްދާން މުހިންމު މެޗަކަށް ވާނެ ކަމަށެވެ.
"ގްރީން ސްޓްރީޓް އަދި ބައްޔެއް ނުވޭ، ވަރަށް ރަނގަޅު ދެ ޓީމާއެކު ކުޅެ އެ ޓީމުން ވަނީ ޕޮއިންޓް ހޯދާފަ، އެހެންވީމަ އެ ޓީމު ބަލިކުރެވޭތޯ ހުރިހާ މަސައްކަތެއް އަޅުގަނޑުމެން ކުރާނަން، ހަމަ އެގޮތަށް ގްރީން އަށްވެސް ވަރަށް މުހިންމު މެޗަކަށް މި މެޗު ވެގެންދާނީ." މޯހަން ބުންޏެވެ.
މިދިޔަ އަހަރުގެ މާލޭ ލީގްގެ ގަދަ ހަތަރަކުން އީގަލްސް އަށް ފުރުސަތު ގެއްލުނީ ގްރީން ސްޓްރީޓް އަތުން ބަލިވުމުންނެވެ. މި އަހަރު އީގަލްސްގެ ކޯޗު ކަމާ ހަވާލުވި މޯހަން ބުނީ، މި މެޗު ލީގްގެ ކުރީ ކޮޅު ކުޅެން ޖެހުމަކީ ވަރަށް ބޮޑު ހިތްހަމަ ޖެހުމެއް ކަމަށެވެ. އެކަމުގެ ސަބަބުން ޕްރެޝަރެއް ނެތި ކުޅުންތެރިންނަށް ވެސް ކުޅެން ފަސޭހަ ވާނެ ކަމަށް މޯހަން ބުންޏެވެ.