ފަހު ވަގުތު ނެރޭ ނަތީޖާއަކީ ހަމަ ހުރެފައި ލަނޑު ޖެހިގެން ނެރޭ ނަތީޖާ ނޫން ކަމަށާއި އެއީ ދުރާލައި ވިސްނުންތެރި ކަމާއެކު ހިސާބު ޖަހައިގެން ގެނެވޭ ބަދަލުތަކުން ނެރެވޭ ނަތީޖާ ކަމަށް ގްރީން ސްޓްރީޓްގެ ކޯޗު އަލީ ސުޒޭން ބުނެފި އެވެ.
މާލޭ ލީގްގައި ގްރީން ސްޓްރީޓުން ކުޅުނު ދެ މެޗުގައި ވެސް، އެ ޓީމުން ޕޮއިންޓް ހޯދީ މެޗުގެ އެންމެ ފަހު ވަގުތުގައި ކާމިޔާބު ކުރި ލަނޑު ތަކުންނެވެ. ފުރަތަމަ މެޗުގައި މާޒިއާ ދެކޮޅަށް 2-2 ން އެއްވަރު ކުރީވެސް ފަހު ވަގުތު ކާމިޔާބު ކުރި ލަނޑު ތަކުންނެވެ. ދެ ވަނަ މެޗުގައި ޓީސީއާ ދެކޮޅަށް ކުޅުނު މެޗު އެއްވަރު ކުރީ މެޗުގެ އެންމެ ފަހު މިނެޓްގަ އެވެ.
އޭނާ ބުނީ އެ ދެ މެޗުގައި ވެސް ފަހު ވަގުތު ނަތީޖާ ނެރެވުނީ މެޗުގެ އެންމެ ފަހު 15 މިނެޓް ތެރޭގައި ކުޅުންތެރިން ކުރި ބުރަ މަސައްކަތުން ކަމަށެވެ.
"އަޅުގަނޑު ބެންޗެއްގައި ހުރެގެން މި ކަހަލަ ކިތައް ދުވަސް އައިސްފިތޯ ތިބޭފުޅުން ސުވާލު ކުރައްވާ [އަސްހަދު އަލީ] އަޑޭ ކަހަލަ ކުޅުންތެރިޔަކާ، 10 ވަރަކަށް 12 ވަަރަކަށް ދުވަހަށް [މެޗަށް ވުރެ] ގިނަ ވާނެ އިތުރު ގަޑިއާއެއްކޮށް އެހެން ޖަހާފަ ހުރި ލަނޑުތައް،" ސުޒޭން ފާހަގަ ކުރި އެވެ. "އެހެންވީމަ އެއްގޮތަކަށް ވެސް އެއީ އުޅެނިކޮށް އުޅެނިކޮށްވީ ކަމެއް ނޫން، އެއީ ހަމަ ކަލްކިއުލޭޓަޑް [ހިސާބު ހަދައިގެން ނެރެވޭ] އެއްޗެއް."
"މިސާލަކަށް އަޅުގަނޑުމެން 2-0 އެއް ނުވަތަ 2-1 އެއްގެ ފަހަތުގައި އޮވެ، މެޗުގައި ބާކީ 10 ވަރަކަށް މިނެޓް އޮތިއްޔާ، އެއީ 14 މިނެޓް އިތުރު ގަޑި ހިމަނައިގެން، މި ދަނޑު [ގަލޮޅު ދަނޑު] ކަމަށް ވަންޏާ އިތުރު ވަގުތަށް ތިނެއް ނޫނީ ހަތަރު މިނެޓް ދައްކާނެ، އެއާ އެއްކޮށް އަޅުގަނޑު ޗޭންޖުތައް ހިސާބު ހަދައިގެން އެގޮތަށް ގެންދަނީ."
ކޯޗިން ކެރިއަރުގައި 11 ތަށި ހޯދި ސުޒޭން މިސާލެއްގެ ގޮތުގައި ދެއްކީ 2003 ވަނަ އަހަރު މާލޭ ލީގްގެ އެންމެ ފަހު މެޗުގައި، ކ. ހުރާގެ ހުއްރިއްޔާ ސްޕޯޓްސް ކުލަބާ ދެކޮޅަށް، އޭނާގެ ކުރީގެ ކުލަބު ވިކްޓަރީ ކުޅުނު މެޗެވެ. މެޗުގެ ފަހު ދިހަ މިނެޓަށް ދިޔައިރުވެސް ހުރާ 2-0 ކުރީގައި އޮތް އިރު ފަހުވަގުތު ވިކްޓަރީން 3-2 ން މެޗު ކާމިޔާބު ކޮށް މާލޭ ލީގް އުފުލާލީ އެ އަހަރު އެވެ. ސުޒޭން ބުނީ ކަޕްވިނާސް ކަޕް މުބާރާތެއްގައި މެޗުގެ އެންމެ ފަހު ވަގުތު ނިއު ރޭޑިއަންޓާ ދެކޮޅަށްވެސް ހަމަ އެގޮތަށް ނަތީޖާ ނެރެފައިވާނެ ކަމަށެވެ.
އޭނާ ބުނީ ނަސީބު ވެސް އެހީ ވަނީ އެކަމަށް މަސައްކަތް ކޮށްގެން ކަމަށެވެ. ދުރާލައި މަސައްކަތް ނުކުރާނެ ނަމަ ނަސީބުވެސް އަތުގައި ނުހިފާނެ ކަމަށެވެ. ސުޒޭން ބުނީ އޭނާއާއެކު މަސައްކަތް ކުރި ކުޅުންތެރިންނަށް މެޗުގެ އެންމެ ފަހު ވަގުތުގައި މަސައްކަތް ކުރުމުގެ ހިތްވަރު ދަސްކޮށްދީފައި ހުންނާނެ ކަމަށެވެ.
"އެ ހިތްވަރު، އެ ލީޑާޝިޕް އެ މޯޓިވޭޝަން އެ ކުޅުންތެރިންގެ ފަރާތުން ނެރެން އެ ކުރަން ޖެހޭ މަސައްކަތުގައި ހަމަގައިމުވެސް އަޅުގަނޑު އެހީތެރިކަން ފޯރުކޮށްދެން ވަރަށް ބޮޑަށް."
އޭނާ ބުނީ އޭނާ ހުންނަ ޓީމެއްގައި އަބަދުވެސް އިސްކަން ދެނީ ދެ އަރިމަތިން ސްޕީޑް ހުންނަ ކުޅުންތެރިޔަކު ހޯދުމަށް ކަމަށެވެ. އޭގެ ސަބަބުން ނަތީޖާ ބަދަލު ކުރަން ވަރަށް ބޮޑަށް ފަސޭހަ ވެގެންދާ ކަމަށް ތަޖުރިބާކާރު ކޯޗު ފާހަގަ ކުރި އެވެ.