ދައުވާ ކުރަން ޕީޖީއަށް ފޮނުވާފައި އޮތް ކުރީގެ ރައީސް މައުމޫން އަބްދުލް ގައްޔޫމާއި އުއްތަމަ ފަނޑިޔާރު އަބްދުﷲ ސައީދާއި އަލީ ހަމީދުގެ މައްސަލަ ދިރާސާ ކުރުމަށް ފަހު އިތުރު ބައެއް ކަންކަން ސާފު ކުރަން ބޭނުންވާތީ އަނބުރާ ފުލުހުންނަށް ފޮނުވާލުމުން ހައިރާން ނުވާ ކަމަށް މައުމޫންގެ ގާނޫނީ ވަކީލުން ވިދާޅުވެއްޖެ އެވެ.
މައުމޫނާއި އަބްދުﷲ ސައީދާއި އަލީ ހަމީދާއި ޖުޑިޝަލް އެޑްމިނިސްޓްރޭޓަރު ހަސަން ސައީދުގެ މައްޗަށް ދައުވާ ކުރަން ޕީޖީއަށް ފޮނުވީ މިދިޔަ ފެބްރުއަރީ މަހުގެ 28 ވަނަ ދުވަހު އެވެ. މައުމޫނާއި ދެ ފަނޑިޔާރުންގެ މައްސަލަ ފޮނުވީ ތަހުގީގަށް ބޭނުންވާ ހެކި ނައްތާލި ކަމަށް ތުހުމަތުކޮށެވެ. ހަސަން ސައީދުގެ މައްސަލަ ފޮނުވީ ފިލައިގެން އުޅުއްވުމުގެ ތުހުމަތުގައެވެ.
އެންދެރިމާގޭ ގައި މިރޭ ބޭއްވި ނޫސްވެރިންގެ ބައްދަލުވުމުގައި، މައުމޫންގެ ވަކީލުންގެ ޓީމުގައި ހިމެނިވަޑައިގަންނަވާ ހުސައިން ޝަމީމް ވިދާޅުވީ، ޕީޖީ އޮފީހުން ރައީސް މައުމޫންގެ މައްޗަށް ދައުވާ ކުރި ނަމަ ވަރަށް ހައިރާންވާނެ ކަމަށާއި އެއީ އަމަލެއް ކުށަކަށްވާ ތިން ކަމުގެ ތެރެއިން އެއްވެސް ކަމެއް ފުރިހަމަ ނުވާ ކަމަށެވެ. އެހެންކަމުން އެމައްސަލަ ބަލައިނުގަނެ އަނބުރާ ފުލުހުންނަށް ފޮނުވާލުމުން ހައިރާން ނުވާ ކަމަށެވެ.
ޝަމީމް ވިދާޅުވީ، ރައީސް މައުމޫންގެ މައްޗަށް ކުރާ ދައުވާ އަކީ ހެކި ނައްތާލި ކަމުގެ ދައުވާ ކަމަށާއި އެ ހެއްކަކީ ފޯނު ކަމަށެވެ. އަދި ވިދާޅުވީ، ފޯނަކީ ހެއްކެއް ނޫން ކަމަށާއި އެހެކި ނައްތާލާފައި ނުވާ ކަމަށެވެ. އަދި އެ ހެއްކި ނައްތާލަން ރައީސް މައުމޫން މަސައްކަތް ކޮށްފައިވެސް ނުވާ ކަމަށް ޝަމީމް ވިދާޅުވި އެވެ.
"ކުށެއް ކުށަކަށް ވަނީ ތިން ކަމެއް ފުރިހަމަ ވެގެން، ހެކި ނައްތާލުމުގެ ކުށް ފުރިހަމަ ވަނީ، ހެއްކެއް އޮންނަން އެބަ ޖެހޭ، ހެކި ނައްތާލަން ޖެހޭ، އެހެކި ނައްތާލުމާއި އެމީހާ އާ ގުޅުން ހުންނަން ޖެހޭ، ފޯނަކީ ހެއްކެއް ނޫން، ތުހުމަތު ކުރަނީ ފޯނު ނައްތާލީ ކަމަށް، ފޯނެއް ނައްތައެއް ނުލާ، އެކަމުގައި ބައިވެރިއެއްވެސް ނުވޭ، އެހެން ކަމުން އެކަން ކުރި ކަމަށްބުނާ އެއްވެސް ކަމެއް ހަމައެއް ނުވޭ،" ޝަމީމް ވިދާޅުވި އެވެ.
ޝަމީމް ވިދާޅުވީ، ޕީޖީ އޮފީހުގައި މަސައްކަތް ކުރާ ފަރާތްތަކުން މަސައްކަތް ކުރަން ވާނީ ގާނޫނު އަސާސީއާ އެއްގޮތަށް، އެ ގާނޫނު އަސާސީ އަސްލަކަށް ބަލައިގެން ކަމަށެވެ. އަދި ވިދާޅުވީ، އެބޭފުޅުންގެ މަސައްކަތަކީ ވަކި މީހަކު ބުނާ ގޮތަކަށް ނުވަތަ ވަކި މީހަކު އަންގާ ގޮތަކަށް އަމަލު ކުރުން ނޫން ކަމަށެވެ.
ނޫސްވެރިންގެ ބައްދަލުވުމުގައި ވަކީލް ފައިސަލް ވިދާޅުވީ، ރައީސް މައުމޫނާ އެހާ ގިނަ ދުވަސް ވީއިރުވެސް ސުވާލެއް ނުކޮށް ބެހެއްޓީ ނަފްސާނީ ގޮތުން ގެއްލުންދޭ ކަމަށާއި ނަމަވެސް ރައީސް މައުމޫންގެ ހިތްވަރާއި އަޒުމަށް ބަދަލެއް ނާދެ އެވެ.
ހައްޔަރުކުރިތާ 33 ދުވަސް ފަހުން މައުމޫނާ ފުރަތަމަ ފަހަރަށް ސުވާލު ކޮށްފައިވަނީ އިއްޔެ އެވެ. ނަމަވެސް ރައީސް މައުމޫން ވަނީ ގާނޫނާ ހިލާފަށް ހައްޔަރުކޮށްފައިވާ ކަމަށް ވިދާޅުވެ ތަހުގީގަށް އެއްބާރުލުން ނުދެއްވާފަ އެވެ.
ފައިސަލް ވިދާޅުވީ، 33 ދުވަހަށްފަހު އިއްޔެ ފުރަތަމަ ފަހަރަށް ފުލުހުން މައުމޫނާ ސުވާލުކުރީ 15 މިނެޓް ވަންދެން ކަމަށެވެ. އަދި ފުލުހުން ކުރެއްވި ހުރިހާ ތުހުމަތަކަށް އެމަނިކުފާނު އިންކާރު ކޮށްފައިވާ ކަމަށް ފައިސަލް ވިދާޅުވި އެވެ.
"އެމަނިކުފާނާ އަލަށް ސުވާލު ކުރެއްވިއިރުގަ އެކަމުގެ ބޭނުމެއްގެ ގޮތުގައި އެމަނިކުފާން ފާހަގަކުރެއްވީ އެމަނިކުފާނަށް މެންޓަލް ޓޯޗާ ކުރުމުގެ ގޮތުން،" ފައިސަލް ވިދާޅުވި އެވެ.
ފައިސަލް އިތުރަށް ވިދާޅުވީ، ރައީސް މައުމޫންގެ މައްޗަށް ކުރެވެނީ ބޮޑެތި ތުހުމަތު ތަކެއް ކަމަށާއި ނަމަވެސް އެކަމަށް އެކަށީގެންވާ މިންވަރަށް ތައްޔާރު ވުމަށް ވަކީލުންނަށް ވަގުތު ނުދެއްވާ ކަމަށެވެ.
"ވަކީލުންގެ ބައްދަލުވުމަށް ދުވާލަކު މި ލިބެނީ 30 މިނެޓްގެ ފުރުސަތެއް، ބޮޑު ތުހުމަތަކާ ބަލާއިރު އެވަގުތަކީ އެކަށިގެންވާވަރުގެ ވަގުތު ނޫން، ފައިސަލް ވިދާޅުވި އެވެ.