މާލެތެރެ ކުނިކަހައި ސާފުކުރުމަށް އެންވަޔަރަމަންޓް މިނިސްޓްރީން "މާ ސާފު މާލެ" ނަމުގައި މާދަމާ ކުރިއަށްގެންދާ ސާފުކުރުމުގެ ހަރަކާތަށް އާންމުންނަށް ދައުވަތު ދީފި އެވެ.
އެންވަޔަރަމަންޓް މިނިސްޓްރީން މިއަދު ވަނީ ފޭސްބުކް މެދުވެރިކޮށް އިވެންޓް އިންވިޓޭޝަނެއް ހުޅުވާލާފަ އެވެ.
މާލެތެރެ ކުނި ކަހައި ސާފުކޮށް ބޭއްވުމުގެ މަސައްކަތް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އާ ހަވާލުކޮށް، އެ މަސައްކަތް ފަށައިގަތުމަށް ވެމްކޯއަށް އެހީތެރިވެދިނުމުގެ ގޮތުން އެންވަޔަރަމަންޓުން އިންތިޒާމްކޮށްފައިވާ މި ހަރަކާތުގައި ސަރުކާރުގެ ހުރިހާ ކުންފުނިތަކާއި މުއައްސަސާތަކުން 3000 އެއްހާ މީހުން ބައިވެރިވާނެ އެވެ.
މި މަސައްކަތަށް އާންމުންނަށް ވެސް މިހާރު ދައުވަތު ދީފައިވާއިރު މަސައްކަތް ކުރިއަށްދާނީ ގްރޫޕްތަކަކަށް ބައިވެރިން ބަހާލައިގެން މުޅި މާލެ ސާފުކުރެވޭނެ ފަދަ އިންތިޒާމެއްގެ ތެރެއިން ކަމަށް އެންވަޔަރަމަންޓް މިނިސްޓްރީން އިއްޔެ ބުންޏެވެ. ސާފުކުރާނީ މާލޭގެ އިތުރުން ވިލިނގިލި ވެސް ހިމަނައިގެންނެވެ.
އެންވަޔަރަމަންޓް މިނިސްޓަރު ތޯރިގް އިބްރާހިމް އިއްޔެ ވިދާޅުވީ، މާލެ ހަޑިކުރުމުގެ ފުރުސަތު ދެން އެއްވެސް ބަޔަކަށް ނުދޭނެ ކަމަށެވެ. އެފަދަ އަމަލުތައް ކުރާ ފަރާތްތައް ހޯދައި ފުލުހުން މެދުވެރިކޮށް ފިޔަވަޅު އަޅާނެ ކަމަށެވެ. އަދި މާލެ ސާފުކޮށް ބާއްވަން ވެމްކޯއަށް އެއްބާރުލުން ދީ ފަރުދީ ޒިންމާ އަދާކޮށް މާލެ ކުނިން ސަލާމަތްކޮށްދިނުމަށް އެހީތެރިވުމަށް
ތޯރިގް ވަނީ އިލްތިމާސްކުރަައްވާފަ އެވެ.
މާ ސާފު މާލެ ހަރަކާތް ފަށާނީ މާދަމާ ހެނދުނު 7:30 އާއި 9:00 އާ ދެމެދު އެވެ.