ސާނަވީއާއި މަތީ ސާނަވީއިން ރާއްޖޭގެ ސްކޫލްތަކުން ކޮންމެ އަހަރަކު ހޮވާ ހުރިހާ ގޮތަކުން އެންމެ މޮޅު ދަރިވަރަށް މީގެ ކުރިން ދެމުން އައި "ރައީސުލް ޖުމްހޫރިއްޔާގެ ހާއްސަ އިނާމް" ގެ ބަދަލުގައި މި އަހަރުން ފެށިގެން އެވޯޑެއް ދޭން ނިންމައިފި އެވެ.
ސްކޫލުތަކުން ހޮވޭ ހުރިހާ ގޮތަކުން އެންމެ މޮޅު ދަރިވަރަށް މީގެ ކުރިން ރައީސުލްޖުމްހޫރިއްޔާ ދެއްވަމުން ގެންދެވީ އިނާމެކެވެ.
މިކަން ބަދަލުކޮށް، އެންމެ މޮޅު ދަރިވަރަށް ރައީސް ދެއްވާ ފުރަތަމަ ހަނދާނީ ފިލާ މިއަދު ދީފައިވަނީ ސެންޓަ ފޮ ހަޔަ ސެކަންޑަރީ އެޑިޔުކޭޝަން (ސީއެޗްއެސްއީ)ން މިދިޔަ އަހަރު ހުރިހާ ގޮތަކުން އެންމެ މޮޅު ދަރިވަރަކަށް ހޮވުނު ރ ރަސްގެތީމު ރަސްވެލި އައިޝަތު މަލްހާ އަށެވެ. މަލްހާއަށް ހަނދާނީ ފިލާ ދެއްވީ ރައީސް އަބްދުﷲ ޔާމީން އެވެ.
ރައީސް އޮފީހުން ބުނީ ރައީސް ދެއްވާ ހަނދާނީ ފިލާ ދިނުމަށް ރައީސް އޮފީހުގައި މިއަދު ހާއްސަ ރަސްމިއްޔާތެއް ބާއްވާފައިވާ ކަމަށެވެ. އަދި މަލްހާއަށް ރައީސްގެ ނަސޭހަތުގެ ބަސްކޮޅެއް ވެސް އެރުވި ކަމަށެވެ.
"މިބައްދަލުކުރެއްވުމުގައި، ރައީސުލްޖުމްހޫރިއްޔާ ވަނީ ބޭރު ގައުމަކަށް ކިޔަވަންދިޔަކަމުގައި ވިއަސް ގައުމު ދެކެ ލޯބިވުމަށާއި، ވަތަނީ މީހަކަށް ވުމަށް މަލްހާއަށް ނަހަތްތެރިވެވަޑައިގެންފައެވެ،" ރައީސް އޮފީހުން ބުންޏެވެ.
މިއަދު މި ތައާރަފްކުރި "ރައީސުލްޖުމްހޫރިއްޔާގެ ހަނދާނީ ފިލާ" މީގެފަހުން ދަރިވަރުންނާ ހަވާލުކުރާނީ ސްކޫލްތަކުގެ އަހަރީ އިނާމު ދިނުމުގެ ޖަލްސާގައި، އެ ޖަލްސާއެއްގެ ޝަރަފުވެރި މެހުމާނެވެ.