ސަރުކާރާއި ރައްޔިތުން ހިއްސާވާ ވިޔަފާރި ކުންފުނި އެސްޓީއޯގެ މިދިޔަ އަހަރުގެ ފައިދާ އިން ހިއްސާއަކަށް، ޑިވިޑެންޑްގެ ގޮތުގައި 55 ރުފިޔާ ބަހަން ހުށަހަޅަން އެ ކުންފުނީގެ ބޯޑުން ނިންމައިފި އެވެ.
އެސްޓީއޯއިން ކުރި އިއުލާނެއްގައި ބުނީ އެ ކުންފުނީގެ މިދިޔަ އަހަރުގެ ފައިދާއިން ޑިވިޑަންޑުގެ ގޮތުގައި ހިއްސާއަކަށް 55 ރުފިޔާ ބަހަން ހުށަހެޅުމަށް މިއަދު ޑިރެކްޓަރުންގެ ބޯޑުން ނިންމަވާފައިވާ ކަމަށެވެ.
އެސްޓީއޯ އިން ޑިވިޑެންޑްގެ ގޮތުގައި މީގެ ކުރީ އަަހަރު ބަހާފައި ވަނީ 51 ރުފިޔާ އެވެ. އެ އިއުލާނުގައި ސާފު ފައިދާއިން މުޅި ޖުމްލަ ހިއްސާދާރުންނަށް ބަހާނެ ފައިދާގެ އަދަދެއް އަދި އިއުލާން ކޮށްފައެއް ނުވެ އެވެ. އަދި އެސްްޓީއޯގެ މިދިޔަ އަހަރުގެ އަހަރީ އާންމު ރިޕޯޓް ވެސް އަދި ނެރެފައެއް ނުވެ އެވެ.
އެސްޓީއޯއިން ބުނަނީ އަންނަ މަހުގެ ތެރޭގައި އެސްޓީއޯގެ އަހަރީ އާންމު ޖަލްސާ ބޭއްވުމުގެ މަސައްކަތް ކުރަމުން އަންނަ ކަމަށެވެ. ސީދާ ތާރީހެއް އަދި އާންމުކޮށްފައެއް ނުވެ އެވެ.
މިދިޔަ ދެތިން އަހަރެއްގެ ތެރޭގައި އެސްޓީއޯ އިން ވަނީ މުޖުތަމައުގެ އެކި ދާއިރާތަކަށް އިންވެސްޓް ކުރުމުގެ އިތުރަށް އިޖްތިމާއީ އެކި ކަންކަމަށް ވެސް ބޮޑެތި ހަރަދުތަކެއް ކޮށްފަ އެވެ.
އެސްޓީއޯއިން އެންމެ ފަހުން ނެރެފައިވާ މިދިޔަ އަހަރުގެ ފަހު ކުއާޓާ، 2017 ވަނަ އަހަރުގެ ހަތަރު ވަނަ ކުއާޓާގެ ރިޕޯޓްގައިވާ ގޮތުގައި އެ ކުންފުންޏަށް ވަނީ އެންމެ ފަހު ކުއާޓާގައި ފައިދާގެ ގޮތުގައި 46 މިލިއަން ރުފިޔާ ލިބިފަ އެވެ. އެ ރިޕޯޓްގައި ހުރި ހިސާބުތަކަށް ބަލާއިރު މިިދޔަ އަހަރުގެ ތެރޭގައި އެސްޓީއޯގެ ފައިދާ 200 މިލިއަނަށް ވުރެ އިތުރުވާނެ ކަމަށް ލަފާކުރެވެ އެވެ.