ކިޔެވުން ޒަމާނީކޮށް ޑިޖިޓަލައިޒްކުރުމަށް ސްކޫލްތަކަށް ތައާރަފްކުރާ ވައިފައި ޓެބްލެޓަށް ރާއްޖޭގެ ހުރިހާ ޓީޗަރުން ތަމްރީންކޮށް ނިމިފައިވާ ކަމަށް އެޑިއުކޭޝަން މިނިސްޓްރީން ބުނެފި އެވެ.
ސްކޫލްތަކުގައި ޓެބްލެޓް ބޭނުންކޮށްގެން ރަސްމީކޮށް ކިޔަވައިދޭން ފަށަނީ ދެވަނަ ޓާމުން ފެށިގެންނެވެ. އޭގެ ކުރިން ޓެބްލެޓަށް ޓީޗަރުން އަހުލުވެރިކުރުމުގެ ގޮތުން އެޑިއުކޭޝަން މިނިސްޓްރީން ތަމްރީން ޕްރޮގްރާމްތަކެއް ފެށިއެވެ. ދެ ލެވެލަކަށް ބަހާލައިގެން ކުރިއަށްގެންދިޔަ އެ ތަމްރީންތަކުގެ އެންމެ ފަހު ބުރު ނިންމާފައިވަނީ މިދިޔަ ހަފްތާގަ އެވެ.
އެޑިއުކޭޝަން މިނިސްޓްރީގެ ސްޓޭޓް މިނިސްޓަރު އަހުމަދު ޝަފީއު މިއަދު ވިދާޅުވީ، ޓީޗަރުން ޓެބްލެޓަށް އަހުލުވެރިކުރަން ފެށި ޕްރޮގްރާމްތަކުގެ އެޑްވާންސް ލެވެލް ތަމްރީންތައް މިދިޔަ ހަފްތާގައި މުޅިން ނިންމާލެވިފައިވާ ކަމަށެވެ.
ޓެބްލެޓް ތަމްރީންތަކުގައި ޓީޗަރުންނަށް ކިޔައިދީފައިވަނީ މުޅިންވެސް ތިއަރީ ބައިތަކެވެ. އެހެންކަމުން ދެން އޮންނާނީ ޕެރެކްޓިކަލް ބައެވެ. ތަމްރީންތަކުގައި ކިޔައިދިން މައުލޫމާތުތަކާއެކު ޓެބްލެޓް ބޭނުންކޮށް އެއަށް ފަރިތަވާން މުދައްރިސުންނަށް ވަގުތު ދޭނެ ކަމަށް ޝަފީއު ވިދާޅުވި އެވެ.
"މި ފެށޭ ރޯދައިގެ ކުރިން ހުރިހާ ޓީޗަރުންނަށް ޓެބްލެޓް ދޫކުރަން ފަށާނަން. މީގެ ބޭނުމަކީ ތަމްރީނުގެ އެހީގައި އަސްލު ޓެބްލެޓް ބޭނުންކޮށް އެއަށް އަހުލުވެރިވާނެ މުއްދަތު ޓީޗަރުންނަށް ދިނުން. އެހެންވީމަ ވަރަށް ސިސްޓަމެޓިކްކޮށް މެނޭޖްކުރެވިގެން ޓެބްލެޓް މަޝްރޫއުގެ ހުރިހާ ކަމެއް ކުރިއަށް މި ގެންދަނީ،" ޝަފީއު ވިދާޅުވި އެވެ.
ކޮންމެ ކުއްޖަކަށް ތެބްލެޓެއް ދީގެން ކިޔަވަދިނުމުގެ ވިސްނުން އެޑިއުކޭޝަން މިނިސްޓްރީން ހާމަ ކުރުމުން ގިނަ ބެލެނިވެރިންގެ ކަނބޮޑުވުމަކަށްވީ ކުދިން އިންޓަނެޓްގެ ދުނިޔެއަށް ހުޅުވިގެން ހިނގައިދާނެ ބިރު އޮތުމެވެ.
ޝަފީއު ވިދާޅުވި ގޮތުގައި ޓެބްލެޓަކީ ކުދިންނަށް ގޯސްގޮތުގައި އިންޓަނެޓްގެ ބޭނުން ކުރެވޭނެ ފުރުސަތާއެކު ދޫކޮށްލާ އެއްޗެއް ނޫނެވެ. ކުދިންނަށް ޓެބްލެޓް ދޫކުރުމުގެ ކުރިން މިނިސްޓްރީން ކަނޑައަޅާ ސައިޓްތައް ނޫން ތަންނަށް ނުވަދެވޭގޮތަށް ފަޔަވޯލް ބިލްޑްކުރުމާއި ގޭގެ ވައިފައި ބޭނުންކުރާއިރުވެސް ޑިވައިސްއިން ވަކި ކަންތައްތަކެއް އެކަނި ކުރެވޭ ގޮތަށް ސެކިއުރިޓީ ފީޗާތަކެއް ހިމަނާނެ ކަމަށް ވިދާޅުވި އެވެ.
"މީގެ ފީޑްބެކް އަންނަ ގޮތާއި ކިޔެވުން ދާގޮތް ބެލުމަށްފަހު މުޅި ރާއްޖެއަށް އަޅުގަނޑުމެން ދޫކޮށްލާނީ. އެންމެ ފުރަތަމަ ފަށައިގަންނާނީ މާލޭގެ ސްކޫލްތަކުން. އެއަށްފަހު އެހެން ރަށްރަށަށް. ބޭނުން ވަނީ އަވަސް އަރުވާލައިގެން ކަންކަން ކުރުމެއް ނޫން. ރަނގަޅު ގޮތުގައި މިކަން ކުރިއަށް ގެންދިއުން،" ޝަފީއު ވިދާޅުވި އެވެ.
ސަރުކާރު ސްކޫލްތަކުގެ ގޮތު ހިންގާ 212 ސްކޫލް ރާއްޖޭގައި ހުރި އިރު އެ ހުރިހާ ސްކޫލެއްގެ ދަރިވަރުންނާއި މުދައްރިސުން ބޭނުންކުރުމަށް 70،000 އަށްވުރެ ގިނަ ޓެބްލެޓް އެޑިއުކޭޝަން މިނިސްޓްރީން ވަނީ ގަނެފަ އެވެ. ގަތީ ވޭވޭ ބްރޭންޑްގެ މީޑިއާ ޕެޑް ޓީ 3 ޓެބްލެޓެވެ. 8 އިންޗީގެ އެޗްޑީ ސްކްރީނެއް ހިމެނޭ އެ ޓެބްލެޓުގެ ސްޓޯރޭޖް ކެޕޭސިޓީގައި 16 ޖީބީ ހުންނާނެއެވެ.