ސަރުކާރު ވައްޓާލަން އުޅުން ކަމުގެ ތުހުމަތުގައި ފުލުހަށް ހާޒިރުވާން އެންގި ކުރީގެ ރައީސް މައުމޫން އަބްދުލް ގައްޔޫމްގެ ދަރިކަނބަލުން ޔުމްނާ މައުމޫން މިއަދު ފުލުހުންގެ އިދާރާއަށް ހާޒިރުވުމުން ވަކީލަކު ހޯދަން ފުރުސަތު ދިނުމަށްފަހު ފޮނުވާލައިފި އެވެ.
ޔުމްނާ ފުލުހަށް ހާޒިރުކޮށްފައިވަނީ މިއަދު ހަވީރު، 4:00 އަށެވެ.
ފުލުހުންގެ އިދާރާއަށް މިއަދު ހާޒިރުވުމަށްފަހު ނުކުމެވަޑައިގެން ނޫސްވެރިންނާ ބައްދަލުކުރައްވައި ޔުމްނާ ވިދާޅުވީ، ވަކީލަކު ހަމަޖެއްސުމަށް އެކަމަނާއަށް ދީފައިވަނީ މާދަމާއާ ހަމައަށް ކަމަށާއި، އެއީ ކުރު މުއްދަތެއް ކަމަށެވެ. އަދި މާދަމާ ފުލުހަށް ހާޒިރުވާން ޗިޓް ހަވާލުކޮށްފައިވާ ކަމަށް އޭނާ ވިދާޅުވި އެވެ. ޔުމްނާ ވިދާޅުވީ މާދަމާ ފުލުހަށް ހާޒިރުވާން ޖެހެނީ ވަކީލަކާ އެކު ކަމަށާއި އެހާ ކުރު ވަގުތުކޮޅެއްގެ ތެރޭގައި ވަކީލަކު ހަމަޖެއްސުމަށް މިވަގުތު ވަރަށް ދަތި ކަމަށް ވިދާޅުވި ކަމަށެވެ.
"އެނގިވަޑައިގަންނަވާނެ އަޅުގަނޑުގެ އާއިލާގެ އިތުރު ތިން ބޭފުޅުން ވެސް މިވަގުތު ތިއްބެވީ ހައްޔަރުކޮށްފަ، އަދި ޝަރީއަތްތައް ވެސް ކުރިއަށްދަނީ. އެހެންވީމަ ވަކީލުންވެސް އުޅުއްވަނީ ވަރަށް ބުރަކޮށް،" ޔުމްނާ ވިދާޅުވި އެވެ.
ވަކީލަކު ހަމަޖައްސަން ޔުމްނާއަށް ވަގުތު ދީފައިވާއިރު އެކަމަނާ މާދަމާ ފުލުހަށް ހާޒިރުކުރާނެ ގަޑިއެއް އަދި ނޭނގެ އެވެ.