ކެއިން ބުއިމުގެ ބާވަތްތައް އަބަދުވެސް އެތެރެކުރަނީ ހެލްތު މިނިސްޓްރީއާއި މޯލްޑިވްސް ފޫޑް އެންޑް ޑްރަގް އޮތޯރިޓީގެ މިންގަނޑުތަކަށް ފައްތައިގެން ކަމަށާއި މުއްދަތު ހަމަވެފައިވާ ކާއެއްޗެއް އެ ކުންފުނިން ނުވިއްކާނެ ކަމަށް ސަރުކާރުގެ ވިޔަފާރި ކުންފުނި، އެސްޓީއޯ އިން ބުނެފި އެވެ.
އެސްޓީއޯއިން މުއްދަތު ހަމަވެފައިވާ ބިސް ވިއްކަމުންދާ ކަމަށް ބުނެ ދެކެވޭ ވާހަކަތަކާ ގުޅިގެން އެކުންފުނިން މިއަދު ނެރުނު ބަޔާނެއްގައި ބުނީ، އެސްޓީއޯއިން މިއަހަރު ރާއްޖެ އެތެރެކޮށް ވިއްކަމުންދާ ބިހަކީ މިނިސްޓްރީ އޮފް ހެލްތް އިން 2017 ނޮވެމްބަރު 13 ވަނަ ދުވަހު އާންމުކުރި އިއުލާނާ އެއްގޮތަށް އެތެރެކޮށްފައިވާ ބިސް ކަމަށެވެ.
އެ އިއުލާނުގައި ބުނެފައިވާ ގޮތުން މިއަހަރުގެ ޖަނަވަރީ 15 އިން ފެށިގެން ރާއްޖެ އެތެރެކުރާ ބިސް، ޓްރީމަންޓެއް ނުދީ އަދި ފިނި ނުކޮށް އިމްޕޯޓްކޮށް ވިއްކަން ބަހައްޓަންވާނީ ކުކުޅުބިސް އުފެއްދި ތާރީހުން ފެށިގެން އެންމެ ގިނަވެގެން 28 ދުވަހުގެ މުއްދަތަކަށެވެ. މި 28 ދުވަހުގެ ތެރެއިން ބިސް އެތެރެކޮށް ގުދަންކުރުމަށް 7 ދުވަސް ނަގާނެއެވެ. ބާކީ އޮންނަ 21 ދުވަހަކީ ބިސް ވިއްކުމަށް ބަހައްޓަންލިބޭ ދުވަސްތަކެވެ.
އެހެންކަމުން އެ ކުންފުނިން ވިއްކަމުންދާ ބިހަކީ ހަލާކުވެފައިާ ބިސް ނޫން ކަމަށް ވެސް އެ ބަޔާނުގައި ބުނެފައިވެ އެވެ. އަދި ހަގީގަތެއް ނެތް މައުލޫމާތު ނުފެތުރުމަށް ވެސް އެ ކުންފުނިން ވަނީ އެދިފަ އެވެ.