ތ ގުރައިދޫ އިންޖީނުގޭގައި ހުރި ބޮޑު ޖެނަރޭޓަރުގެ މައްސަލަ ޖެހި، ދުވާލުގެ ބައެއް ވަގުތުތަކުގައި ރަށުން ކަރަންޓު ދާތާ ގިނަ ދުވަސްތަކެއް ވެފައިވަނިކޮށް އެ މައްސަލަ ހައްލުކުރުމަށް އެ ރަށަށް އާ ޖެނަރޭޓަރެއް ފެނަކައިން ފޮނުވައިފި އެވެ.
ގުރައިދޫގެ ކަރަންޓު މައްސަލަ ބޮޑުވެ އެރަށުގެ ރައްޔިތުން ވަނީ ރޯދަ ފެށުމުގެ ކުރިން އެކަން ހައްލުކޮށްދިނުމަށް އެދި މުޒާހަރާކޮށްފަ އެވެ. ރޯދަ މަހު ކަރަންޓުގެ މައްސަލަ ދިމާވާނަމަ ދަތިވާނެތީ ކަރަންޓަށް ދާއިމީ ހައްލެއް ހޯދައިދީ ރޯދައަށް ޖެނަރޭޓަރެއް ހޯދައިދިނުމަށް އެދި އެ މުޒާހަރާގައި ރައްޔިތުން ވަނީ ފެނަކައަށް ގޮވާލާފަ އެވެ.
ގުރައިދޫ ކައުންސިލްގެ ރައީސް އަލީ ރަޝީދު މިއަދު "އަވަސް" އަށް ވިދާޅުވީ، 600 ވޮޓުގެ އާ ޖަނަރޭޓަރެއް މިއަދު މެންދުރުގެ ކުރިން އެރަށަށް ލިބޭނެ ކަމަށެވެ. އެ ޖަނަރޭޓަރާއެކު ރަށުގެ ކަރަންޓަށް ދާއިމީ ހައްލެއް ލިބޭނެ ކަމަށެވެ.
އޭނާ ވިދާޅުވީ ރޯދަ މަހުން ހަފްތާއެއް ނިމުނު އިރު ރަށަށް ކަރަންޓު ދިނީ ވަގުތީ ގޮތުން މައްސަލަ ހައްލުކުރުމަށް ފެނަކައިން ޓެކްނީޝަނުންގެ ޓީމެއް އައިސް ވަރަށް މަސައްކަތް ކޮށްގެން ކަމަށެވެ. އެހެންކަމުން މިއަދު ލިބޭ ބޮޑު ޖަނަރޭޓަރާއެކު އެންމެންނަށް ވެސް ފަސޭހަވެގެންދާނެ ކަމަށް އޭނާ ވިދާޅުވި އެވެ.
ގުރައިދޫއަށް ކަރަންޓުގެ މައްސަލަ މެދުވެރިވުމުގެ ކުރިން އެރަށަށް ފެނަކައިން ކަރަންޓު ދެމުން ގެންދިޔައީ 460 ވޮޓުގެ ޖަނަރޭޓަރަކާއި 350 އަދި 250 ގެ ތިން ޖެނަރޭޓަރު ބޭނުންކޮށްގެންނެވެ. ކަރަންޓުގެ މައްސަލަ ދިމާވާން ފެށީ އެތަނުން އެންމެ ބޮޑު 460 ވޮޓުގެ ޖެނަރޭޓަރު ހަލާކުވެގެންނެވެ. ފެނަކައިން މިހާރު ގެންދަނީ އެ ޖެނަރޭޓަރުވެސް މަރާމާތު ކުރަމުންނެވެ. އޭރުން މިއަދު ލިބޭ 600 ވޮޓުގެ ޖަނަރޭޓަރާއެކު އެރަށަށް ހަތަރު ޖަނަރޭޓަރު ލިބޭނެ އެވެ.
ގުރައިދޫގެ ދެހާހެއްހާ މީހުންގެ އާބާދީ އޮތީ ރޯދައަށް އެމީހުން ބޭނުންވި ބޮޑު ހަދިޔާ ލިބުމުން ހެވިފަ އެވެ.