ޕްރޮޑިއުސަރުންގެ ދެމެދުގައި އުފެދުނު ނުތަނަވަސްކަމެއްގެ ސަބަބުން މަސައްކަތް މަޑުޖެހިފައި އޮތް ޑައިރެކްޓަރު އަބީޝޭކްގެ ފިލްމު "ކެދަރްނާތް" ގެ ލީޑު ބަތަލާ ސާރާ އަލީ ހާންއާއި ދެކޮޅަށް ގާނޫނީ ފިޔަވަޅު އަޅައިފި އެވެ.
ޓައިމްސް އޮފް އިންޑިއާ ނޫހުގައި ބުނެފައި ވަނީ ޑައިރެކްޓަރު އަބީޝޭކް، ސާރާއި ދެކޮޅަށް ގާނޫނީ ފިޔަވަޅު އެޅީ "ކެދަރްނާތް" ގެ މަސައްކަތް ނުނިމެ އުޅެނިކޮށް ސާރާ އެހެން ފިލްމެއް ކުޅުމަށް ސޮއިކޮށްފައި ވާތީ ކަމަށާއި އަދި އެއީ އެ ފިލްމު ކުޅުމަށް ސާރާ ވެފައިވާ އެއްބަސްވުމާއި ހިލާފުކަމެއް ކަމަށެވެ.
އެކްޓަރު ސައިފް އަލީ ހާންގެ ދަރިފުޅު ސާރާ ވަނީ ދާދިފަހުން މަޝްހޫރު ޑައިރެކްޓަރު ރޯހިތް ޝެއްޓީގެ ފިލްމު "ސިމްބާ" ކުޅުމުށް ސޮއިކޮށްފަ އެވެ. ކަރަން ޖޯހަރްގެވެސް ހިއްސާ އޮންނަ އެ ފިލްމުގައި ސާރާ ފެނިގެންދާނީ ރަންވީރް ސިންހް އާއެކު އެވެ.
އަބީޝޭކް މި މައްސަލަ ކޯޓަށް ހުށަހެޅުމުން ކޯޓުން ވަނީ ސާރާއަށް އިންޒާރުގެ ސިޓީއެއް ފޮނުވާފަ އެވެ. އެ ސިޓީގައި ބުނެފައިވަނީ ކޯޓުގެ އަމުރަށް އޭނާ ތަބާ ނުވެއްޖެނަމަ ގާނޫނީ ގޮތުން ދެން އަޅަންޖެހޭ ފިޔަވަޅުތައް އަޅާނެ ކަމަށެވެ.
ރިޕޯޓުތައް ބުނާގޮތުން މިކަމާއި ގުޅިގެން އަބީޝޭކް ކޯޓަށް ހުށަހެޅި މައްސަލާގައި ސާރާގެ ފާރާތުން އޭނާގެ ފިލްމަށް ލިބުނު ގެއްލުމަށް ބަދަލުގެ ގޮތުގައި ފަސް ކަރޯޑުގެ ރުޕީސް ދިނުމަށް އެދިފައިވެ އެވެ.
މި ފިލްމުގެ ޕްރޮޑިއުސަރުންގެ ދެމެދުގައި ދެބަސްވުން އުފެދުނީ ފިލްމު ރިލީޒްކުރާ ތާރީހާއި ގުޅިގެންނެވެ. ފުރަތަމަ މި ފިލްމު ރިލީޒްކުރަން ނިންމާފައި އޮތީ ޑިސެމްބަރު 21 ގަ އެވެ. ނަމަވެސް އެ ތާރީހުގައި ސުޕަސްޓާ ޝާރުކް ހާންގެ ފިލްމު "ޒީރޯ" ރިލީޒްކުރާތީ ޕްރޮޑިއުސަރުން ބޭނުންވީ ފިލްމު ރިލީޒްކުރާ ތާރީހު ބަދަލުކުރާށެވެ. އާބީޝޭކް އެކަމާއި ދެކޮޅު ހެދި އެވެ.
މިހާރު މި ފިލްމުގެ ޕްރޮޑިއުސަރުންނާއި ޕްރޮޑަކްޝަން ހައުސްވެސް ވަނީ ބަދަލުކޮށްފަ އެވެ. ފިލްމު ރިލީޒްކުރާ ތާރީހު ނޮވެމްބަރު 27 އަށް ވަނީ އަވަސްކޮށްފަ އެވެ.