ބޭރުމަގު ހެދުމުގެ މަސައްކަތްކުރަނިކޮށް ފަޅައިގެން ދިޔަ އެމްޑަބްލިޔުއެސްސީގެ ފެންހޮޅި މަރާމާތުކޮށް، ރޭ ފެން ކަނޑާލި ސަރަހައްދުތަކަށް އަލުން ފެން ދޫކޮށްފައިވާ ކަމަށް ފެން ކުންފުނިން ބުނެފި އެވެ.
މާލޭގެ ބައެއް ގެތަކަށް ފެން ފޮނުވައިދޭ ހޮޅިއެއް ފަޅައިގެން ގޮސް ރޭ 9:30 ހާއިރު ފެން ކަނޑާލާފައިވަނީ 25، 54 އަދި 55 ނަމްބަރު ބްލޮކުން ނެވެ.
އެމްޑަބްލިޔުއެސްސީން ބުނީ، ހޮޅީ މަރާމާތުކުރުމަށް ފެން ކަނޑާލާފައިވަނީ ކުންފުނިން ރޭ ނެރުނު ބަޔާނުގައިވާ ގޮތަށް ތިން ގަޑިއިރަށް ކަމަށެވެ. އެހެންކަމުން ރޭ މެންދަމު 12:00 ހާއިރު ފެން ކެނޑުނު ސަރަހައްދުތަކަށް ފެން ދޫކޮށްފައިވާކަމަށް ވެސް ބުންޏެވެ.
މާލޭގެ މަގު ހެދުމުގެ މަސައްކަތް ކުރަމުން ދަނިކޮށް ފެންހޮޅި ފަޅައިގެން ދިޔައީ ހައުސިން މިނިސްޓްރީން މަގު ކޮނުމުގެ ތެރޭގަ އެވެ.