އެމެރިކާގެ މަޝްހޫރު ދެ ފިލްމީ ތަރިން ކަމަށްވާ އެންޖެލީނާ ޖޯލީ އާއި ބްރެޑް ޕިޓް ވަރިވި ފަހުން މިހާރު އެންމެ ގަދައަށް ދެކެވެމުން ދަނީ ކޯޓުގައި ބަލަމުންދާ މި ދެމަފިރިންގެ ދަރިންގެ ބެލެނިވެރިކަމުގެ މައްސަލާގެ ވާހަކަ އެވެ.
މި މައްސަލަ އަނެއްކާ ބޮޑުވެފައި މި ވަނީ ބްރެޑް އާއި ކުދިން ބައްދަލުވިޔަ ނުދިނުމަށް އެންޖެލީނާ މަސައްކަތް ކުރަން ފެށުމާއި ގުޅިގެންނެވެ. ދާދިފަހުން ލީކުވި ކޯޓުގެ ލިޔެކިޔުންތަކަކުން އެނގުނު ގޮތުގައި ކޯޓުން ވަނީ ކުދިން ގާތަށް ބްރެޑް ދިއުމުން އެކަމަށް ހުރަސް ނޭޅުމަށް އެންޖެލީނާއަށް އަމުރުކޮށްފަ އެވެ.
ދަ ޕީޕަލް އިން ރިޕޯޓުކުރި ގޮތުގައި ކޯޓުގެ މި އަމުރަށް އެންޖެލީނާ ތަބާނުވެއްޖެނަމަ އެ ދެމަފިރިންގެ ހަ ކުދިންގެ ބެލެނިވެރިން އެންޖެލީނާގެ އަތުން ގެއްލިގެންދާނެ އެވެ. މިހާރު މި ހުރިހާ ކުދިންވެސް ތިބީ އެންޖެލީނާގެ ބެލެނިވެރިކަމުގެ ދަށުގަ އެވެ.
ލީކުވި ލިޔެކިޔުންތަކުގައި މި މައްސަލަ ބަލާ ގާޒީ ބުނެފައި ވަނީ އެ ދެމަފިރިންގެ ހަ ކުދިންވެސް މަންމަ އާއި ބައްޕައާއި ދެމެދު ވަރަށް ގާތް ގުޅުމެއް އޮންނަ ކަމަށެވެ. އަދި ބައްޕައާއި ކުދިން ބައްދަލުކުރުމަށް އެންޖެލީނާ ހުރަސްއަޅާނަމަ އޭނާ އާއި މެދު ފިޔަވަޅު އަޅަންޖެހިދާނެ ކަމަށެވެ.
އެ އަމުރުގައި އިތުރަށް ބުނެފައި ވަނީ ކުދިންގެ ޗުއްޓީތައް ރޭވިފައިވާ ގޮތާއި، ކުދިންނަށް ފޯނުން ބައްޕައާއި އެއްވެސް ހުރަހެއް ނެތި ވާހަކަދެކެވެން ޖެހޭނެ ކަމަށެވެ. އަދި ބްރެޑްގެ ހާޒިރުގައި އެކުދިން ތެރަޕިސްޓުންނަށް ގަވާއިދުން ދެއްކުމަށްވެސް އަމުރުކޮށްފައިވެ އެވެ.
އެކުގައި ކައިވެނިކޮށްގެން 12 އަހަރު އުޅުމަށްފަހު އެންޖެލީނާ އާއި ބްރެޑް ވަރިވީ ސެޕްޓެމްބަރު 2016 ގަ އެވެ.