ސްޓެކްލޯ ކައިރީގައި ހުންނަ ފިއުލް ސަޕްލައިސް މޯލްޑިވްސް (އެފްއެސްއެމް) ގެ ޝެޑުން ތެޔޮ އެޅޭނީ ހަތަރު ފުރޮޅުލީ ވެހިކަލް ތަކަށް އެކަނި ކަމަށް އެ ކުންފުނިން ބުނެފި އެވެ.
ބޮޑުތަކުރުފާނުމަގުގައި ހުންނަ އެފްއެސްއެމްގެ އެއް ނަަމްބަރު ޝެޑްގެ ބޭރުގައި ހަރުކޮށްފައިވާ ނޯޓިސްއެއްގައި ވަނީ، މިއަދުން ފެށިގެން އެތަނުން ހިދުމަތް ދޭނީ ހަމައެކަނި ހަތަރު ފުރޮޅުލީ އުޅަނދުތަކަށް ކަމަށާއި އަޖީއެމްއެޗާއި ކާނިވާ ސަރަހައްދުގައި ހުރި ޝެޑްތައް ހާއްސަ ކޮށްފައިވަނީ ސައިކަލް ތަކަށް ތެޔޮ އެޅުމަށް ކަމަށެވެ.
އެ ގެނައި ބަދަލުގެ ސަބަބުން ރައްޔިތުންނަށް ދިމާވެދާނެ އުނދަގުލަކަށްޓަކައި އެފްއެސްއެމް އިން ވަނީ މައާފަށް ވެސް އެދިފައެވެ.
ނަމަވެސް އެގޮތަށް ހަމަޖެއްސީ ކީއްވެ ކަމެއް ނޯޓިސްގައެއް ނެތެވެ. އެބަދަލު ގެނެސްފައިވަނީ ބޮޑުތަކުރުފާނުމަގު ތަރައްގީ ކުރުމުގެ މަސައްކަތް ކުރިއަށްދާތީ ކަމަށް ބެލެވެ އެވެ.
އެފްއެސްއެމް އިން މާލޭގައި ވެހިކަލްތަކަށް ތެޔޮ އަޅަން ތިން ޝެޑެއް ހިންގަ އެވެ. އެއީ ސްޓެލްކޯ ކައިރީގައި ހުންނަ ޝެޑާއި އައިޖީއެމްއެޗް ކައިރީގައި ހުންނަ ޝެޑްގެ އިތުރުން ކާނިވާ ކައިރީގައި ހުންނަ ޝެޑެވެ.