ވަކި ޕާޓީއަކާއެކު ކޯލިޝަން ހަދައިގެން ކުރިއަށް އޮތް ރިޔާސީ އިންތިހާބު ކާމިޔާބު ކުރެވޭނެ ކަމަށް ގަބޫލު ނުކުރާ ކަމަށާއި އެމްޑީޕީއާއެކު ކުރިއަށްދާން ތިބި ޕާޓީތަކާއެކު އިންތިހާބުގައި ވާދަކޮށް ރައީސް އަބުދުﷲ ޔާމީން ބަލި ކުރައްވާނެ ކަމަށް
އެޕާޓީން ބުނެފި އެވެ.
އެމްޑީޕީ ހަރުގޭގައި މިއަދު ހަވީރު ބޭއްވި ނޫސްވެރިންގެ ބަައްދަލުވުމުގައި އެޕާޓީގެ ޗެއާޕާސަން ހަސަން ލަތީފް ވިދާޅުވީ، އެމްޑީޕީން މިތިބީ މެނިފެސްޓޯ އަކާއެކު މަސައްކަތް ކުރަން ކަމަށާއި އެ މެނިފެސްޓޯ ރައްޔިތުން މިހާރުވެސް ބަލައިގަންނަކަން ވަރަށް ސާފުވެފައިވާ ކަމަށެވެ. އަދި ވިދާޅުވީ، މަސައްކަތްކުރަން ތިބި ފަރާތްތަކާއެކީގައި އެމްޑީޕީން ތިބީ ކުރިއަށްދާން ކަމަށާއި އެޕާޓީއާއެކު ކުރިއަށްދާއިރު އެހެން ޕާޓީއެއްގެ އެހެން ވިސްނުމެއް އޮވެގެން ކުރިއަށް ދިއުމަކީ އެއީ އެޕާޓީއަކުން ނިންމާނެ ކަމެއް ކަމަށްވެސް ހަސަން ވިދާޅުވި އެވެ.
"އަޅުގަނޑުމެނަށް ފެނިއްޖެ ހިޔާލީ ކެބިނެޓެއް އެކުލަވާލީ ޖުމްޙޫރީ ޕާޓީން، އެމްޑީޕީން އޭގައި ނުހިމެނޭ ތަން. އެކަމު އަޅުގަނޑު އޭގައި ދަންނަވަން އޮތީ އެއީ އަޅުގަނޑުމެން ކުރާނެ ކަމެއް ނޫން. އަޅުގަނޑުމެން ވަރަށް ހެޔޮ ހިތުން ސާފު މަގުސަދެއްގައި އެކުލަވާލި ކޯލިޝަނެއް އެކުލާވާލީ. އެ ކޯލިޝަނަށް ވުރެ ރަނގަޅު ގޮތެއް އޮނަރަބަލް ގާސިމް އިބްރާހިމަށް ފެނިވަޑައިގެންފިއްޔާ ގާސިމް ކޯލިޝަން ދޫކުރައްވައި ވަޑައިގެންނެވުން އެއީ އަޅުގަނޑުމެންގެ އެއްވެސް މައްސަލައެއް އޮތް ކަމެއް ނޫން. އިރާދަ ކުރެއްވިއްޔާ އެމްޑީޕީއާއެކު ގުޅިގެން އެހެން ޕާޓީތަކެއް މަސައްކަތް ކުރަން ތިބިއްޔާ އެމަސައްކަތް ކުރާނަން،" ހަސަން ވިދާޅުވި އެވެ.
ހަސަން ވިދާޅުވީ، އެމްޑީޕީ އަކީ ބޮޑު ޕާޓީ އެއް ކަމަށާއި އެ ޕާޓީގެ ރިޔާސީ ކެނޑިޑޭޓެއް ހުންނާނެ ކަމަށެވެ. އަދި އިންތިހާބުތައް ކާމިޔާބު ކުރުމުގައި އެންމެ މުހިންމު ކަމަކީ ޕާޓީތަކަށްވުރެ ރައްޔިތުން ކަމަށާއި އެމްޑީޕީން ކެނޑިޑޭޓެއް ދައްކަން ރައްޔިތުން ބޭނުންވާ ކަމަށެވެ. އެ ކެނޑިޑޭޓަކާއެކު އެ ޕާޓީން އިންތިހާބުގައި ކުރިމަތި ލެވޭނެ ކަމަށްވެސް ހަސަން ވިދާޅުވި އެވެ.
"މިދަންނަވަނީ އެމްޑީޕީ ވަކިން އިންތިހާބުގައި ވާދަ ކުރާ ވާހަކައެެއް ނޫން، ގަބޫލެއް ނުކުރަން ވަކި ޕާޓީއަކާއެކު މަސައްކަތް ކުރީމަ ކަމަކަށް އިންތިހާބު ކާމިޔާބު ވަނީކީ، ދިވެހި ރައްޔިތުން ވޯޓް ލަނީ، ރައްޔިތުންނަށް ރަނގަޅު ގޮތެއް ފެނުނީމަ ވޯޓްލާ އަބަދުވެސް،" ހަސަން ވިދާޅުވި އެވެ.
ހަސަން ވިދާޅުވީ، ކޯލިޝަނެއް ހަދާފައިވަނިކޮށް ވަކިން ނިކުމެ ޖުމްހޫރީ ޕާޓީން ކެބިނެޓް އިއުލާން ކުރުމަކީ ރަނގަޅު ކަމެއް ނޫން ކަމަށެވެ. އެމްޑީޕީންވެސް ދަނީ ކެބިނެޓެއް އެކުލަވާލުމުގެ މަޝްވަރާތައް ކުރުމުން ކަމަށާއި ނަމަވެސް ވަކި ވިސްނުމެއް ހާމަ ކޮށްފި ކަމަށް އެ ކުރެވޭނީ ޖުމްހޫރީ ޕާޓީން ކުރި ކަހަލަ ނުރަގަނޅު ކަމެއް ކަމަށެވެ.
"އަޅުގަނޑުމެންގެ ވަކި ވިސްނުމެއް ހާމަ ކޮށްފި ކަމަށް ވަނީނަމަ އޭރުން ގަބޫލު ކުރެވޭނީ ޖުމްހޫރީ ޕާޓީން ކުރި ނުރަގަނޅު ކަމެއް އަޅުގަނޑުމެންނަށް ކުރެވުނީ ކަމަށް، އެއީ ކޮށްގެންވާނެ ކަމެއް ނޫން، އެމްޑީޕީން ކުރިންވެސް އަދި މިހާރުވެސް ކުރިއަށް އޮތް ތަނުގައިވެސް އެފަދަ ކަމެއް ނުކުރާނަން، ގުޅިގެން މަސައްކަތް ކުރަމުން ދަނިކޮށް ވަކިން ނިކުމެއެއް އެފަދަ ކަމެއް ނުކުރާނަން،" ހަސަން ވިދާޅުވި އެވެ.
ހަސަން ވިދާޅުވީ، އެމްޑީޕީން ވަކިން ކެމްޕޭނު ކުރުމަކީ ކޯލިޝަން ތެރޭގައި އޮތް އެއްބަސްވުމެއް ކަމަށާއި ސިންގަލް ކެނޑިޑޭޓެއްގެ ކެމްޕެއިން އެހެން ޕާޓީ ތަކުންވެސް ކުރަން ޖެހޭ ކަމަށެވެ. އަދި ވިދާޅުވީ، ރައްޔިތުންނަށް އޮޕްޝަންތަކެއް ދައްކަން ޖެހޭ ކަމަށާއި މަޑުކޮށްގެން ތިބުން އެއީ އޮޕްޝަނެއް ނޫން ކަމަށެވެ.
ހަސަން އިތުރަށް ވިދާޅުވީ، އެމްޑީޕީ އަކީ ބޮޑު ޕާޓީއެއް ކަމަށާއި އެ ޕާޓީއަށް ވަރަށް ބޮޑު އިތުބާރެއް ރައްޔިތުންގެ ފަރާތުން ލިބިފައިވާ ކަމަށެވެ. އަދި އެ ޕާޓީން ނިންމާ ކަންކަމަކީ ރައްޔިތުން ވަރަށް ބޮޑަށް ބަލައިގަންނަ ކަންކަން ކަމަށާއި ގުޅިގެން މަސައްކަތް ކޮށްފިނަމަ ރައީސް ޔާމީން ބަލިކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށް ހަސަން ވިދާޅުވި އެވެ.