"ގާނޫނުއަސާސީގެ ދިފާއު" ގައި މިމަހުގެ 31 ވަނަ ދުވަހު މަގުމައްޗަށް ނިކުންނަން އިދިކޮޅު އެމްޑީޕީގެ ގައުމީ މަޖިލީހުން ފާސްކޮށްފި އެވެ.
އެމްޑީޕީ އިން ރޭ ބޭއްވި އެ ޕާޓީގެ ގައުމީ މަޖިލީހުގެ ބައްދަލުވުމުގައި ގާނޫނުއަސާސީގެ ދިފާއުގައި މަގުމައްޗަށް ނިކުންނަން ހުށަހެޅީ ރިޔާސަތުންނެވެ.
މި ހުށަހެޅުމަށް އެއްވެސް މީހަކު އިއުތިރާޒެއް ނުކުރެ އެވެ.
ގާނޫނުއަސާސީގެ ދިފާއުގައި އެމްޑީޕީ އިން މިދިޔަ ޑިސެމްބަރު މަހުގެ 10 ވަނަ ދުވަހުގެ ރޭ ވަނީ މާލޭ ކާނިވާ ސަރަހައްދުގައި ޖަލްސާއެއްވެސް ބާއްވާފަ އެވެ.
އެ ޖަލްސާގެ ކުރިންގެ ކުރިން ބޭއްވި އެމްޑީޕީގެ ގައުމީ މަޖިލީހުގެ ބައްދަލުވުމުގައި ވަނީ އެ ޕާޓީން ކުރިއަށް ގެންދާ އިހްތިޖާޖު ކުރުންތައް މުޅި ރާއްޖެއަށް ފަތުރާލައިގެން ކުރިއަށް ގެންދިއުމަށް ފާސްކޮށްފަ އެވެ.
އެމްޑީޕީގެ އިހްތިޖާޖުތައް މުޅި ރާއްޖެއަށް ފުޅާކުރަން ނިންމި ނަމަވެސް އެކަން އަމަލީ ގޮތުން ކުރާނެ ދުވަހެއް އަދި އިހްތިޖާޖުތައް ފުޅާކުރުމަށް ކުރާނެ ކަންކަމުގެ ތަފްސީލް އެމްޑީޕީ އިން އޭރު ދީފައެއް ނުވެ އެވެ.