ރާއްޖޭގެ އިދާރާތައް ލާމަރުކަޒީ އުސޫލުން ހިންގުމަށް ހެދިފައިވާ ގާނޫނުގެ ދަށުން ރައީސަށް ލިބިދީފައިވާ އިހްތިޔާރާއި ބާރުގެ ބޭނުން ކުރަންވާނީ ގާނޫނުގައި ކަނޑައަޅައި ލިޔެފައިވާ ހަމަތަކާއި އުސޫލުތަކާއި އެއްގޮތްވާ ގޮތުގެމަތީން ކަމަށް ސިޓީ ކައުންސިލުން ބުނެފި އެވެ.
ވީޓަލް ރެޖިސްޓްރޭޝަން ސެކްޝަންގައި ހުރި މާލޭ ސިޓީ ކައުންސިލްގެ ނަންބޯޑް އެއްވެސް އެންގުމަކާނުލައި ނަގާފައިވާތީ އެކައުންސިލުން ނެރުނު ސާކިއުލާއެއްގައިވަނީ، އެ ކައުންސިލްގެ މެންޑޭޓް ތެރޭގައި ހިމެނޭ ވިހާ މަރުވާ މީހުންގެ ރެކޯޑް ބެލެހެއްޓުމާއި އެސިޓީއެއްގައި ދިރިއުޅޭ ރަށްވެހިންގެ ރަޖިސްޓަރީ ބެލެހެއްޓުމާއި ރަށްވެރިނުވެ ދިރިއުޅޭ މީހުންނާއި ބިދޭސީންގެ ދަފުތަރު ލިޔެ ބެލެހެއްޓުން ހައުސިން މިނިސްޓްރީއަށް ބަދަލުކޮށްފައިވާ ކަމަށެވެ.
ސިޓީ ކައުންސިލުން ވަނީ އެގޮތަށް ބަދަލު ކުރުމުން ބައެއް ކަންކަން ފާހަގަ ކޮށްފަ އެވެ. ސާކިއުލާގައިވަނީ، ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެސްފައިވާ ތިން ވަނަ އިސްލާހުގައި ބަޔާންކޮށްފައިވާ އުސޫލުން ރައީސަށް ލިބިދީފައިވާ އިހްތިޔާރާ ބާރުވެސް ބޭނުންކުރަންވާނީ ގާނޫނުގައި ކަނޑައަަޅައި ގަރާރުކޮށްފައިވާ ހަމަތަކާއި އުސޫލުތަކާއި އެއްގޮތްވާ ގޮތުގެ މަތީން ކަމަށެވެ.
ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެވިފައިވާ ތިންވަނަ އިސްލާހުގެ (ނ) ގައި ބަޔާންކޮށްފައިވަނީ މި ގާނޫނަށް އަމަލުކުރަން ފަށާތާ އެއްމަސް ދުވަހުގެ ތެރޭގައި މި މާއްދާގެ (ށ)ގައި ބަޔާންކޮށްފައިވާ ގޮތުގެ މަތީން މި ގާނޫނުގެ ދަށުން އުފައްދާފައިވާ ކޮންމެ ސިޓީ ކައުންސިލަކަށް ލިބިދެވޭނެ ބާރުތަކާއި އެ ސިޓީ ކައުންސިލުން ފޯރުކޮށްދެވޭނެ ހިދުމަތްތައް ރައީސް ކަނޑައަޅަންވާނެ ކަމަށެވެ.
އަދި އެސިޓީ ކައުންސިލުން ފޯރުކޮށްދޭނެ ހިދުމަތްތައް ކަމުގައި ނުހިމެނޭ ހިދުމަތްތަކާއި ގުޅުންހުރި އެންމެހައި ގާނޫނީ ހައްގުތަކާއި ޒިންމާތަކާއި އިލްތިޒާމުތައް އެކަމާ ހަވާލުވާ ވުޒާރާއަކަށް ނަގުލުވާނެ ކަމަށެވެ.
ސިޓީ ކައުންސިލުން ބުނީ ގާނޫނުގައި ވަކި މުއްދަތެއްގެ ތެރޭގައި ނިންމަން ކަނޑައަޅާފައިވާ ކަމެއް އެމުއްދަތުގައި ނުނިންމުމާއި އެމުއްދަތި ފަހަނަ އަޅާދާފަހުން ކުރުން ލާޒިމްކޮށްފައިވާ ކަމެއް ކުރުމަކީ ގާނޫނީ ހަމަތަކާއި އެއްގޮތަށް ކުރެވޭ ކަމެއް ކަމުގައި ނުދެކޭ ކަމަށެވެ. އަދި ގާނޫނަށް އިސްލާހެއް ގެނެވިގެން ނޫނީ ގާނޫނީ ގޮތުން ލިބިދީފައިނުވާ ބާރެއް ލިބޭނެ ހަމައެއް އޮތް ކަމަށް ނުދެކޭ ކަމަށްވެސް ސިޓީ ކައުންސިލުން ބުންޏެވެ.
"މާނަކުރުމުގެ ހަމަތައް ބަޔާންކުރާ ގާނޫނުގެ 20 ވަނަ މާއްދާގައި ގާނޫނެއްގެ ދަށުން އެކުލަވާލާ ގަވާއިދުތަކަށް އިސްލާހު ގެނައުމުގެ ބާރު އެގަވާއިދު ހިންގަންފެށި ފަރާތަށް ލިބިދީފައިވީ ނަމަވެސް ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނެސްފައިވާ ތިން ވަނަ އިސްލާހުގެ ދަށުން ރައީސް ވަކި މުއްދަތެއްގެ ތެރޭގައި ކޮށްނިންމަން ޖެހޭ މަސައްކަތްތައް އެމުއްދަތު ފަހަނައަޅާދާ ފަހުން ކުރުމަށްފަހު، އެކަންކަމަށް ތަކުރާރުކޮށް ބަދަލު ގެނައުމަކީ އެންމެ ރަނގަޅު ގޮތް ކަމުގައި ނުދެކެން،" ސާކިއުލާގައި ވެއެވެ
ސާކިއުލާގައި އިތުރަށް ވަނީ، ސިޓީ ކައުންސިލްގެ ހުއްދަ ލިޔުމެއް ލިބިގެންނޫނީ އެކައުންސިލްގެ ލެޓާހެޑް ލިޔެކިޔުމާއި އެނޫންވެސް ތަކެތި ބޭނުން ކުރުމަކީ އެކައުންސިލުން ކަންބޮޑުވާ ކަމެއް ކަމަށެވެ. އަދި އެއްވެސް ފަރާތަކުން ސިޓީ ކައުންސިލްގެ ހުއްދަ ލިބިގެންނޫނީ ލެޓާހެޑް ލިޔެކިޔުމާއި އެނޫންވެސް ތަކެތި ބޭނުން ނުކުރުމަށްވެސް އެކައުންސިލުން އިލްތިމާސް ކޮށްފައި ވެއެވެ.