މަޝްހޫރު ޑައިރެކްޓަރު ރާޖްކުމާރް ހިރާނީ ޑައިރެކްޓުކުރި ފިލްމު "ސަންޖޫ" އަކީ މިފަހުން ބޮލީވުޑްގައި އެންމެ ބޮޑު ކާމިޔާބީއެއް ހޯދި ފިލްމެވެ. އެކްޓަރު ސަންޖޭ ދަތުގެ ހަޔާތަށް ހެދި މި ފިލްމު އެޅުވިތާ 12 ދުވަސްވީއިރު، ކުރިއަށް އޮތް ދެ ދުވަސްތެރޭގައި މި ފިލްމަށް ބޮކްސް އޮފީހުގައި 300 ކްރޯޑު ލިބޭނެ އެވެ.
ކުޅަދާނަ ކާސްޓަކާއެކު ހިރާނީ ކުރި ބުރަ މަސައްކަތުގެ ނަތީޖާ ވަރަށް ފޮންޏެވެ. މި ފިލްމު ވަނީ މިހާތަނަށް ގިނަ ރެކޯޑުތަކެއް މުގުރާލާފަ އެވެ. އެންމެ ގިނަ އެޑްވާންސް ޓިކެޓް ބުކިންއެއް ލިބުނު ބޮލީވުޑްގެ ފިލްމުގެ އިތުރުން އެންމެ ބޮޑު އޯޕެނިންނާއި އެންމެ އަވަހަށް 100 ކްރޯޑު ކުލަބަށް ވަނތް ފިލްމުގެ ރެކޯޑުވެސް ވަނީ ދިފާއުކޮށްފަ އެވެ.
ރެކޯޑުތަކުގެ ވާހަކަ އެއް ފަރާތްކޮށްފައި މި އޮތީ އާ ވާހަކައެކެވެ. މި ފިލްމުގައި ސަންޖޭގެ ރޯލު ކުޅުނު ރަންބީރް ކަޕޫރްއާއެކު ހިރާނީ ފަސް ފިލްމެއް އުފައްދަން ބޭނުންވާ ވާހަކަ މިހާރު ހަބަރުތަކުގެ ފަލަ ސުރުހީތަކުގައި އެބަ އޮތެވެ. ރަންބީރްގެ 11 އަހަރުވީ ކެރިއަރުގައި މިއީ އޭނާގެ އެންމެ ކާމިޔާބު ފިލްމެވެ. ރަންބީރްގެ ފިލްމެއް 200 ކްރޯޑު ކުލަބަށް ވަތް މިއީ ފުރަތަމަ ފަހަރެވެ.
ހިރާނީ ޑައިރެކްޓުކުރި އާމިރް ޚާންގެ ފިލްމު "ޕީކޭ" އަކީ ރަންބީރް ފެނިގެންދިޔަ އޭނާގެ ފުރަތަމަ ފިލްމެވެ. އެ ފިލްމުގައި ރަަންބީރް ފެނިގެންދިޔައީ ހާއްސަ ފެނިލުމަކުންނެވެ.
"ރަންބީރް ބުނީ ހިރާނީ ގާތުގައި އޭނާއާއެކު މިހާރު ދެ ފިލްމެއްގައި މަސައްކަތްކޮށްފީމޭ. އެ ދެ ފިލްމުވެސްވީ ބޮޑު ހިޓަކަށޭ. އެހެންވެ ރަންބީރް ބޭނުންވީ ހިރާނީ ދެން އޭނާއާއެކު އިތުރު ފިލްމެއް ހަދާނީ ކޮންއިރަކުތޯ ބަލަން." އިންޑިއަން އެކްސްޕްރެސް ޓަރައިބިއުންގައި ބުނެފައިވެ އެވެ.
"ހިރާނީ ގާތުގައި ރަންބީރް އެހީ ކިތައް ފިލްމުހޭ އޭނާއެކު ހަދާނީ. އެހެން އެހުމުން ހިރާނީ ބުނީ ރަންބީރްއާއެކު ފަސް ފިލްމު ތައްޔާރުކުރާނެ ކަމަށް." އެ ނޫހުގައި އިތުރަށް ބުނެފައިވެ އެވެ.