ކުކުޅުން އުފައްދާ ތަފާތު ކެއުންތަކަށް މަޝްހޫރު ކޭއެފްސީގެ ރާއްޖޭގެ އައުޓްލެޓް މިރޭ ރަސްމީކޮށް ހުޅުވައިފި އެވެ.
މިރޭ ރަސްމީކޮށް ހުޅުވި ކޭއެފްސީ ހުންނާނީ އަމީނީ މަގުގެ މާލެ ސްކޮއާގަ އެވެ. ކޭއެފްސީ ރާއްޖޭގައި ހިންގަނީ ގަމާ އައިލެންޑް ފުޑުންނެވެ. އެ ކުންފުނިން މީގެކުރިން ވަނީ މާލޭގައި ޕިއްޒާ ހަޓްގެ އައުޓްލެޓެއް ވެސް ހުޅުވާފަ އެވެ.
މާލޭގައި ހުޅުވި ކޭއެފްސީގެ އައުޓްލެޓަކީ 120 މީހުންގެ ޖާގައިގެ ތަނެކެވެ.
އެ ތަން މިރޭ ކުންފުނީގެ އިސްވެރިން ރަސްމީކޮށް ހުޅުވާފައިވީ ނަމަވެސް އާންމުންނަށް ހުޅުވާލާނީ މާދަމާ އެވެ. ކޭއެފްސީ މޯލްޑިވްސްގެ ފޭސްބުކް ޕޭޖުގައި ބުނެފައިވަނީ މާދަމާ 11:00 ހާއިރު ކޭއެފްސީ އާންމުންނަށް ހުޅުވާލާނެ ކަމަށާއި ފުރަތަމަ 100 ކަސްޓަމަރުންނަށް ކޭއެފްސީގެ ހާއްސަ ޓީޝާޓެއް ލިބޭނެ ކަމަށެވެ.
މާލޭގައި ފުރަތަމަ ކޭއެފްސީ ހުޅުވަން އުޅުނީ ރަސްފަންނުގައި ހުންނަ ޕެވިލިއަންގަ އެވެ. ނަމަވެސް އެކި މައްސަލަތައް ދިމާވެ އެތަނުގައި ކޭއެފްސީގެ ބަދަލުގައި ހުޅުވީ "ޗިކިން" އެވެ.