ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ހއ. ދިއްދޫގައި ގާއިމްކޮށްފައިވާ ހައުސިން ޔުނިޓްތަކުގެ ތެރެއިން 100 ހައުސިން ޔުނިޓް ދޫކުރުމަށް ހައުސިން މިނިސްޓްރީން މިއަދު ނިންމައިފި އެވެ.
ހައުސިން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ޑރ. މުހައްމަދު މުއިއްޒު ވިދާޅުވީ، ދިއްދޫގައި ގާއިމް ކޮށްފައިވާ ހައުސިން ޔުނިޓްތަކުގެ ތެރެއިން މިހާތަނަށް ލިބޭ ފަރާތްތައް ކަނޑައަޅާފައިނުވާ ނުވަތަ ފުރުސަތު ހުޅުވާލާފައިނުވާ 100 ހައުސިން ޔުނިޓް އެބަހުރި ކަމަށާއި ދިއްދޫ ރައްޔިތުންނަށް ހާއްސަކޮށްގެން 100 ހައުސިން ޔުނިޓަށް ކުރިމަތިލުމުގެ ފުރުސަތު ހުޅުވާލުމަށް ރައީސް އަބުދުﷲ ޔާމީން އަބުދުލްގައްޔޫމް ނިންމަވާފައިވާ ކަމަށެވެ.
މުއިއްޒު ވިދާޅުވީ، އަންނަ އާދިއްތަ ފުވަހުން ފެށިގެން މިއަހަރުގެ ސެޕްޓެމްބަރު މަހުގެ 10 ވަނަ ދުވަހުގެ ނިޔަލަށް ހައުސިން މިނިސްޓްރީއަށް ފޯމް ހުށަހެޅުމުގެ ފުރުސަތު ލިބިގެންދާނެ ކަމަށެވެ.
"މިކަން ކުރިއަށް ގެންދާނީ ހައުސިން މިނިސްޓްރީން، 100 ހައުސިން ޔުނިޓް ދިއްދޫ ރައްޔިތުންނަށް ހާއްސަކޮށްގެން ދިއްދޫއިން އަދި ހައުސިން މިނިސްޓްރީން ފޯމް ލިބޭނެ، އާދިއްތަ ދުވަހުން ފެށިގެން ދިއްދޫގެ ހުރިހާ ރައްޔިތުންނަށް މި ފްލެޓް ތަކަށް ކުރިމަތި ލުމުގެ ފުރުސަތު ހުޅުވާލެވޭނެ،" މުއިއްޒު ވިދާޅުވި އެވެ.
މުއިއްޒު ވިދާޅުވީ، މިކަމަކީ ދިއްދޫގެ ރައްޔިތުން ހާއްސަކޮށް ޒުވާނުން ވަރަށް ބޮޑަށް އެދެމުންދާ ކަމެއް ކަމަށެވެ. އަދި ދިއްދޫގައި ވަރަށް ބޮޑަށް ގެދޮރުގެ ދަތިކަން އެބައޮތް ކަމަށާއި އެހެންކަމުން އެކަމަށް ހައްލު ހޯދައިދިނުމަށް ރައީސް އަބުދުﷲ ޔާމީން ހައުސިން ޔުނިޓްތައް ދޫކުރަން ނިންމެވީ ކަމަށެވެ. މިފުރުސަތުގެ ބޭނުން ދިއްދޫގެ ހުރިހާ ރައްޔިތުން ހިއްފާނެ ކަމަށް އުންމީދު ކުރައްވާ ކަމަށް ވެސް މުއިއްޒު ވިދާޅުވި އެވެ.
"މި ހައުސިން ޔުނިޓްތަކަކީ ރައީސް ޔާމީން އެހަކަށްދުވަހު ދިއްދޫއަށް ވަޑައިގެން އިފްތިތާހް ކޮށްދެއްވި ހައުސިން ޔުނިޓްތައް، މިހާތަނަށް ދޫކުރި ހައުސިން ޔުނިޓްތަކެކޭ އެއްގޮތަށް މި ހައުސިން ޔުނިޓްތައްވެސް ދޫކުރަން ނިންމާފައިވަނީ، އެޑްވާންސް ޕޭމަންޓްގެ ގޮތުގައި ކަނޑައަޅާފައިވާ ފައިސާ އަދި މަހުން މަހަށް ފައިސާ ދެއްކުން އެ ހައުސިން ޔުނިޓްތަކެކޭ އެއްވަރަށް ކަނޑައެޅިފައިވާނީ،" މިނިސްޓަރު ވިދާޅުވި އެވެ.
ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ދިއްދޫގައި 250 ހައުސިން ޔުނިޓް ގާއިމްކޮށްފައިވެއެވެ. އޭގެ ތެރެއިން 140 ހައުސިން ޔުނިޓް ވަނީ މީގެ ކުރިން ދޫކޮށްފަ އެވެ. އެހައުސިން ޔުނިޓްތައް ދޫކޮށްފައިވަނީ އެޑްވާންސް ޕޭމަންޓެއްގެ ގޮތުގައި 19،000 ރުފިޔާ އަދި 20 އަހަރު ދުވަހުން ފައިސާ ދައްކާ ހަލާސްކުރާ އުސޫލުން މަހަކު 2500 ރުފިޔާ ދައްކާ ގޮތަށެވެ. މި ފަހަރު ހުޅުވާލި 100 ހައުސިން ޔުނިޓަށްވެސް ފައިސާ ދެއްކުމަށް ހަަޖެހިފައިވަނީ މިއުސޫލުގެ ދަށުންނެވެ.