ހއ. ދިއްދޫގައި އަޅަން ފަށާފައިވާ ހައުސިން ޔުނިޓްތައް އަންނަ އަހަރުގެ ފެބްރުއަރީ މަހުގެ 20 ވަނަ ދުވަހަށް ނިންމަން މަސައްކަތް ކުރަމުންދާ ކަމަށް ހައުސިން މިނިސްޓްރީން ބުނެފި އެވެ.
ދިއްދޫގައި 75 ހައުސިން ޔުނިޓް އެޅުމުގެ މަޝްރޫއު ފެށީ ނޮވެމްބަރު 2022 ގައި ރައީސް އިބްރާހީމް މުހައްމަދު ސޯލިހްގެ ވެރިކަމުގައެވެ.
ހައުސިން މިިނިސްޓްރީން ބުނީ ދިއްދޫ ހައުސިން ޔުނިޓްތަކުގެ 73 ޕަސަންޓް މަސައްކަތް މިހާރު ނިމިފައިވާ ކަމަށާއި ފިނިޝިންގެ މަސައްކަތްތައްވެސް ކުރިއަށްދާ ކަމަށެވެ.
ހައުސިން ޔުނިޓުތައް 2023 ވަނަ އަހަރުގެ ނިންމާ، ހަވާލުކުރުމަށް ކުރިން އޮތީ ނިންމާފަ އެވެ. ނަމަވެސް މިނިސްޓްރީން ބުނީ މަސައްކަތްތައް ލަސްވީ މަޝްރޫއަށް ބޭނުންވާ ފައިސާ ހަމަޖެހިފައިވާ ނުވުމުން ކަމަށެވެ.
އެސްޖޭ ކޮންސްޓްރަކްޝަން ޕްރައިވެޓް ލިމިޓެޑާއި މި މަޝްރޫއުގެ މަސައްކަތް ހަވާލުކޮށް އެއްބަސްވުމުގައި ސޮއިކުރީ މިއަހަރުގެ އޮގަސްޓް 10 ވަނަ ދުވަހު އެވެ.
މި މަޝްރޫއު ނިންމުމަށް އެ ކުންފުންޏަށް ދީފައިވަނީ އެއް އަހަރު ދުވަހުގެ މުއްދަތެކެވެ. މި މަޝްރޫއުގެ އަގަކީ 120.4 މިލިއަން ރުފިޔާ އެވެ.
ދިއްދޫގައި އަޅަން ހަމަޖެހިފައިވަނީ ދެ ބުރިއަށް އިމާރާތް ކުރާ 700 އަކަފޫޓުގެ 75 ރޯހައުސް އެވެ. އަދި ކޮންމެ ހައުސިން ޔުނިޓެއްގައި ތިން ކޮޓަރި، ތިން ފާހާނާ، ސިޓިންރޫމް، ބަދިގެ، ކާގެ، ލޯންޑަރީ އަދި ސްޓޯ ރޫމެއް ވެސް ހިމެނެ އެވެ.
ސަރުކާރުން ހައުސިން ޔުނިޓް އަޅަން ނިންމާފައިވާ ރަށްތަކުގެ ތެރޭގައި ހއ. ދިއްދޫގެ އިތުރުން 12 ރަށެއް ހިމެނެ އެވެ.
ހައުސިން ޔުނިޓްތަކަށް ކުރިމަތިލާފައިވާ މީހުންގެ ތެރެއިން ޔުނިޓް ލިބޭ މީހުން ހޮވުމުގެ މަސައްކަތް ދިއްދޫ ކައުންސިލުން ދަނީ ކުރަމުންނެވެ.