އިންޑިއާގެ ކުރީގެ ބޮޑު ވަޒީރު އިންދިރާ ގާންދީގެ ހަޔާތައް ތައްޔާރުކުރާ ބަޔޮޕިކް ވެބް ސީރީޒްގައި، އިންދިރާ ގާންދީގެ ރޯލު ކުޅުމަށް ވިދްޔާ ބާލަން ނަގައިފި އެވެ. ވިދްޔާ ވަނީ މި ހަބަރު ކަށަވަރުވެސް ކޮށްދީފަ އެވެ.
މި ވެބް ސީރީޒް ތައްޔާރުކުރަނީ ވާހަކަ ލިޔުންތެރިޔާ ސަގަރިކާ ގޯސްގެ ފޮތް، "އިންދިރާ: އިންޑިއާސް މޯސްޓް ޕަވާފުލް ޕްރައިމް މިނިސްޓަރް" ގެ މައްޗަށެވެ. މީގެ ކުރިން މި ބަޔޮޕިކް ގެނެސްދޭނީ ފިލްމެއްގެ ގޮތުގައި ކަމަށްވެސް ވާހަކަދެކެވުނެވެ.
މިޑްޑޭއަށް ދިން އިންޓަވިއުއެއްގައި ވިދްޔާ 39، ބުނީ ފިލްމެއްގެ ގޮތުގައި އިންދިރާ ގާންދީގެ ބަޔޮޕިކް ގެނެސްދެވިދާނެ ވަރަށްވުރެ ގިނަ ކަންކަން އެކަމަނާގެ ހަޔާތުގައި ހިނގާފައިވާ ކަމަށެވެ. ވެބް ސީރީޒެއްގެ ގޮތުގައި މި ބަޔޮޕިކް ގެނެސްދިނުމަށް ނިންމީ އެހެންވުމުގެ ސަބަބުން ކަމަށް ވަނީ ބުނެފަ އެވެ.
"އަދި ނޭނގެ ކިިތައް ސީޒަން ކަމެއް އިންނާނީ. މިހާރު މުޅި ކޮންސެޕްޓް އެކުލަވާލުމުގެ މަސައްކަތް މި އަންނަނީ ކުރަމުން،" ވިދްޔާ ބުންޏެވެ. މި ވެބް ސީރީޒް ޕްރޮޑިއުސްކުރަނީ ރޯނީ ސްކްރޫވާލާ އެވެ.
ވިދްޔާ މިހާރުވެސް އަންނަނީ ބަޔޮޕިކް ފިލްމެއްގައި މަސައްކަތްކުރަމުންނެވެ. އެއީ ދެކުނު އިންޑިއާގެ ސިޔާސީ ޝަހުސިއްޔަތެއް ކަމުގައިވާ އެންޓީއާރްގެ ހަޔާތައް ތައްޔާކުރާ ފިލްމެކެވެ. އެ ފިލްމުގައި ވިދްޔާ ކުޅެނީ އެންޓީއާރްގެ އަނބިމީހާގެ ރޯލެވެ.