މި ހަފްތާ ތެރޭގައި ސްރީލަންކާގެ، ކޮލަމްބޯގައި ބޮޑެތި މުޒާހަރާތަކެއް ކުރުމަށް ރާވާފައިވާތީ، އެ ގައުމުގެ މަސްރަހު ހަލަބޮލިވުމުގެ ފުރުސަތު އޮތުމުން އެ ސިޓީގައި ދިރިއުޅޭ ދިވެހިން ސަމާލުވެ ތިބުމަށް، އެ ގައުމުގައި ހުންނަ ދިވެހި އެމްބަސީއިން އާންމުކޮށް އިލްތިމާސްކޮށްފި އެވެ.
ސްރީލަންކާގެ ކުރީގެ ރައީސް ރާޖަޕަކްސަގެ ދަރިކަލުން، ނަމަލް ރާޖަޕަކްސަ އިސްވެ ހުންނަވައި ބާއްވާ ބޮޑު މުޒާހަރާއަކަށް އިދިކޮޅު ޕާޓީތައް ދަނީ ތައްޔާރުވަމުން އެވެ. އެ ގައުމުގެ އެކި ސަރަހައްދުތަކުން މީހުން ގެނެސްގެން ކޮލަމްބޯގައި ބާއްވާ، މުޒާހަރާގެ ބޭނުމަކީ ޕްރޮވިންސް ކައުންސިލްގެ އިންތިހާބުތައް އަވަސްކުރުމަށް ސަރުކާރަށް ޕްރެޝަރު ކުރުމެވެ.
އެ މުޒާހަރާތަކާ ގުޅިގެން، ކޮލަމްބޯގައި ހުންނަ ދިވެހި އެމްބަސީއިން ދިވެހިންނަށް ހާއްސަކޮށް ދިވެހި ބަހުން ނެރުނު ދެންނެވުމެއްގައި ބުނީ، މާދަމާއިން ފެށިގެން އަންނަ ހުކުރު ދުވަހާ ހަމަޔަށް ކޮލަމްބޯގައި ބޮޑެތި މުޒާހަރާތަކެއް ބޭއްވުމަށް އިއުލާންކޮށްފައިވާ ކަމަށެވެ. އެހެންކަމުން، ޒަރޫރީ ބޭނުމެއް އޮވެގެން ނޫނީ މީހުން އާންމުކޮށް އެއްވާ ބައިބޯތަންތަނަށް ނުދިޔުމަށް ނަސޭހަތްތެރިވާ ކަމަށް ވެސް އެމްބަސީގެ ދެންނެވުމުގައިވެ އެވެ. އަދިވެސް ބުނެފައި ވަނީ، މުޒާހަރާތައް ބާއްވާ ދުވަސްތަކުގައި މަގުތަކުގެ ކާރޫބާރޫބޮޑުވެ ޓްރެފިކް ބޮޑުވާނެތީ ދަތުރުފަތުރު ކުރުމުގައި ދުރާލައި ދަތުރުތައް ކުރުމަށް ވެސް ނަސޭހަތްތެރިވާ ކަމަށެވެ.
"ކޮންސިއުލާގެ އެހީތެރިކަމެއް ބޭނުންވެއްޖެ ނަމަ، އެމްބަސީގެ ހޮޓްލައިން 076809660 ނަމްބަރާ ގުޅުއްވުން އެދެމެވެ،" އެމްބަސީގެ ދެންނެވުމުގައިވެ އެވެ.
ސްރީލަންކާގެ ކޮލަމްބޯގައި އެކި ބޭނުންތަކަށް 3،000 އެއްހާ ދިވެހިން ދިރިއުޅެ އެވެ.