ނުހައްގުން ފްލެޓް ދީފައިވީ ނަމަވެސް އެފަރާތްތައް އެތަނުން ނެރެ އެހެން ބަޔަކަށް ފްލެޓްތައް ދިނުމަށް ނޭދޭ ކަމަށް ވިދާޅުވެ ދެއްކެވީ ދިއްދޫގައި ގާއިމްކޮށްފައިވާ ފްލެޓްތަކުގެ ވާހަކަ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު ހއ. އަށް ކުރެއްވި ދަތުރުފުޅުގައި އެ އަތޮޅު ދިއްދޫއަށް ވަޑައިގެން އެރަށުގެ ރައްޔިތުންނާއި ކުރެއްވި ބައްދަލުވުމެއްގައި އެރަށުގައި އިމާރާތްކޮށްފައިވާ ފްލެޓުތައް ބޭއިންސާފުން ބަޔަކަށް ދީފައިވާ ކަމަށް ބުނެ އެ ރަށުގެ ރައްޔިތުން އެމަނިކުފާނަށް ކުރެއްވި ސުވާލުތަކަށް ޖަވާބުދެއްވަމުން ވިދާޅުވީ، ނުހައްގުން ފްލެޓް ދީފައިވީ ނަމަވެސް އެފަރާތްތައް އެތަނުން ނެރެ އެހެން ބަޔަކަށް ފްލެޓްތައް ދިނުމަށް ނޭދޭ ކަމަށެވެ.
"ކޮންމެ ގޮތެއް ވިޔަސް، އިންސާފަށް ވިޔަސް، ބޭއިންސާފަށް ވިޔަސް އެތާ ތެރޭގައި އުޅެނީ ހަމަ ދިވެހިން، އެ މީހުން އެތަނުން ނެރެފައި، އެތަން އެހެން މީހަކަށް ދިނުމުގެ ހިތެއް އަޅުގަނޑުގެ ގައިމު ނެތް. އެހެންވީމަ [ފްލެޓުތައް] އަލުން ހަދަން ޖެހޭނީ، އަލުން އަޅަން ޖެހޭނީ، ގޯސްކޮށް ދެވިފައި އޮތަސް ވެސް، އެ އޮތީ އެގޮތަށް ގޯސްކޮށް، އެކަމަކު އެ އޮތީ ދެވިފައި،" ރައީސް ނަޝީދު ވިދާޅުވި އެވެ.
އެ ވާހަކަފުޅާ ގުޅިގެން ރައީސް ނަޝީދަށް ވަނީ އެމްޑީޕީގެ ބައެއް އެކްޓިވިސްޓުންގެ ފާޑުކިޔުން އަމާޒުވެފަ އެވެ. އެހެންވެ ރައީސް ނަޝީދު ކުރެއްވި ޓްވީޓެއްގައި ވިދާޅުވީ، ފްލެޓްތަކާ ގުޅޭގޮތުން ދެއްކެވި ވާހަކައަކީ ދިއްދޫގައި ގާއިމްކޮށްފައިވާ ފްލެޓްތަކުގެ ވާހަކަ ކަމަށެވެ.
"ހުޅުމާލެއިން ބޭއިންސާފުން ދިނުމަށް ލިސްޓް ހަދާފައިވާ ފްލެޓް ތަކެއް ނޫން،" ނަޝީދު ވިދާޅުވި އެވެ.
އިންތިހާބީ ރައީސް އިބްރާހިމް މުހައްމަދު ސޯލިހު (އިބޫ)ގެ ތަރުޖަމާނު މާރިޔާ އަހުމަދު ދީދީ ވިދާޅުވެފައިވަނީ ރައީސް އަބުދުﷲ ޔާމީންގެ ސަރުކާރުން ހިންގާ "ހިޔާ" މަޝްރޫއުގެ ދަށުން ފްލެޓު ދޫކުރުމުގައި އިންސާފުން ބޭރުން އެއްވެސް އަމަލެއް ހިންގާފައިވާ ނަމަ އާ ސަރުކާރުން އެކަން ބަލާނެ ކަމަށް އިބޫ ވިދާޅުވެފައިވާ ކަމަށެވެ. އަދި އާ ސަރުކާރުން އެކަމަށް ސަމާލުވެ ތިބޭނެ ކަމަށް ވެސް މާރިޔާ ވިދާޅުވި އެވެ.
"ފްލެޓުތަކުގެ މަސައްކަތް ސަރުކާރުން ކުރިޔަށް ގެންދެވިޔަސް މިއީ އަލުން ބެލޭނެ ކަންކަން، އިންސާފުން ބޭރުން އެއްވެސް ފްލެޓެއް ދިނަސް އެ މައްސަލަތައް ވެސް ބެލޭނެ،" މާރިޔާ ވިދާޅުވި އެވެ.
ސަރުކާރުގެ ބޯހިޔާވަހިކަމުގެ މަޝްރޫއުގެ ދަށުން ދިއްދޫގައި 250 ހައުސިން ޔުނިޓް ގާއިމްކޮށްފައިވެއެވެ. އޭގެ ތެރެއިން 140 ހައުސިން ޔުނިޓް ކުރިން ދޫކޮށްފައިވާއިރު، އޭގެ ތެރެއިން ބާކީ ހުރި ފްލެޓްތައް ދޫކޮށްފައިވަނީ މިއަހަރުގެ މެދު ތެރޭގައި އެވެ. އެހައުސިން ޔުނިޓްތައް ދޫކޮށްފައިވަނީ އެޑްވާންސް ޕޭމަންޓެއްގެ ގޮތުގައި 19،000 ރުފިޔާ އަދި 20 އަހަރު ދުވަހުން ފައިސާ ދައްކާ ހަލާސްކުރާ އުސޫލުން މަހަކު 2500 ރުފިޔާ ދައްކާ ގޮތަށެވެ.