ސްރީލަންކާގެ ޕާލަމެންޓް އުވާލަން ރައީސް މައިތިރިޕާލަ ސިރިސޭނާ ނިންމެވި ނިންމެވުން އެ ގައުމުގެ ސުޕްރީމް ކޯޓުން މިއަދު ބާތިލްކޮށްފި އެވެ.
ލަންކާގެ ސުޕްރީމް ކޯޓުގެ ތިން ފަނޑިޔާރުންގެ ބެންޗުން މިއަދު ނެރުނު ވަގުތީ އަމުރުގައި ވަނީ، އެގައުމުގެ ޕާލަމެންޓު އުވާލަން ސިރިސޭނާ ނިންމެވި ނިންމެވުމަކީ ބާތިލް ނިންމުމެއް ކަމަށް ކަނޑައަޅާފަ އެވެ. އަދި އަވަސް އިންތިހާބެއް ބާއްވަން ކުރަމުންދާ ތައްޔާރީތައް ހުއްޓަލުމަށް ވެސް އެ އަމުރުގައި ބުނެފައިވެ އެވެ.
ގިނަ އަދަދެއްގެ މީހުންގެ ހާޒިރުގައި، ޕާލަމެންޓް އުވާލަން ނިންމި ނިންމުން ބާތިލްކުރުމަށް، ލަންކާގެ ސުޕްރީމް ކޯޓުން މިއަދު އަމުރު ނެރުނު އިރު، އެ ކޯޓު ސަރަހައްދުގެ ސެކިއުރިޓީ ވަނީ ވަރަށް ވަރުގަދަކޮށްފަ އެވެ. އެ ސަރަހައްދުގެ ސުލްހަ ބެލެހެއްޓުމަށް ހަތިޔާރުއެޅި ފުލުހުންނާއި ސިފައިން ދިޔައީ ހަރަކާތްތެރިވަމުންނެވެ.
މިދިޔަ މަހުގެ 26 ވަނަ ދުވަހު އެ ގައުމުގެ ބޮޑު ވަޒީރު ކަމުން ރަނިލް ކުއްލި ގޮތަކަށް ވަކިކުރެއްވުމަށް ފަހު، ރައީސް ސިރިސޭނަ އެންމެ ފުރަތަމަ ވެސް ޕާލިމަންޓް ސަސްޕެންޑް ކުރެއްވި އެވެ. އަދި އެތެރޭގައި އުފެދިފައިވާ ސިޔާސީ ހަލަބޮލިކަން ހައްލުކުރުމަށް ކަމަށް ބުނެ ޕާލަމެންޓް އުވާލަން މިދިޔަ ހުކުރު ދުވަހުގެ ރޭ ނިންމި ނިންމުމާއެކު، 14 ދުވަހުގެ ތެރޭގައި އާ މަޖިލިސް އިންތިހާބެއް ބޭއްވުމަށް ވެސް އިއުލާން ކުރެއްވި އެވެ.