ގާނޫން އަސާސީ އާއި ރައްޔިތުންގެ ހައްގުތައް ހިމާޔަތް ކުރުމަށް އަޅަން ފަސް ޖެހޭ ފިޔަވަޅެއް ނޯންނާނެ ކަމަށާއި ރައްޔިތުން އެދޭ ވެރިކަމެއް ކުރެއްވުމުގައި ދެމި ހުންނަވާނެ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ރައީސުލްޖުމްހޫރިއްޔާ ކަމުގެ ހުވާ ކުރެއްވުމަށް ގަލޮޅު ދަނޑުގައި މިއަދު ބޭއްވި ހުވާ ކުރުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް ސޯލިހު ވިދާޅުވީ ޑިމޮކްރެޓިކް ހަމަތަކުގެ މައްޗަށް ބިނާވެފައިވާ އާ ގާނޫނުއަސާސީއެއްގެ ހިޔަލުގައި ދިވެހި ދައުލަތުގެ ކަންކަން ފެށިގެން ދިޔައީ ރައްޔިތުންނަށް ވަރަށް ފޮނި އުންމީދުތަކާއެކުގައި ކަމަށެވެ. އެއީ ކުރިން ދިވެހި ރައްޔިތުންނަށް ލިބިފައި ނުވާ އެތައް ހައްގުތަކެއް ކަށަވަރުކޮށްދިން ގާނޫނުއަސާސީއެއް ކަމަށާއި ނަމަވެސް އެ ގާނޫންއަސާސީއަށް ރައްޔިތުން ކުރި އުންމީދުތައް މިއަދު ވިއްސިވިހާލި ވެފައިވާތީ ހިތާމަ ކުރައްވާ ކަމަށް ރައީސް ސޯލިހު
ވިދާޅުވި އެވެ.
ރައިސުލްޖުމްހޫރިއްޔާ ކަމަށް ހުވާ ކުރެއްވީ އިސްލާމް ދީނަށް ހުރުމަތްތެރިކޮށް ހިތުމަށާއި ގާނޫނުއަސާސީ އާއި ރައްޔިތުންގެ ހައްގުތައް ރައްކާތެރި ކުރުމާއި، ގައުމަށް އިހުލާސްތެރިވުމަށް ކަމަށް ރައީސް ސޯލިހު ވިދާޅުވި އެވެ. އަދި އެކަމުގައި ދެމި ހުންނަވާނެ ކަމުގެ ޔަގީންކަން ރައްޔިތުންނަށް އަރުވާ ކަމަށް ރައީސް ސޯލިހު ވިދާޅުވި އެވެ.
"މިއަދު އަޅުގަނޑު ކުރަން މި ފަށާ މަސައްކަތަކީ، ދިވެހި ދައުލަތުގެ އެންމެހައި ކަންތައްތައް، ގާނޫނުއަސާސީގެ އިމުގެތެރެއަށް ގެނެސް، ދިވެހި ރައްޔިތުންނަށް އިންސާފުވެރި ވެރިކަމެއް ކޮށްދިނުމުގެ މަސައްކަތް. މާތް ﷲގެ ވާގިފުޅާއެކު، މި ފެށޭ ރިޔާސީ ދައުރުގައި ދިވެހި އެންމެހައި ލޮބުވެތި ރައްޔިތުން ދެކޭނީ، ދިވެހި ދައުލަތުގެ އެންމެހައި ކަންކަން އިންސާފުގެ މަގަށް މިސްރާބުވެގެންދާ މަންޒަރު. މާތްވެގެންވާ އިސްލާމްދީނުގެ ރިވެތި އުސޫލުތައް ނަގަހައްޓައި، ރައްޔިތުންނަށް ޖަވާބުދާރީވާނޭ ސަރުކާރެއް އުފެދިގެންދާ މަންޒަރު," ރައީސް ވިދާޅުވި އެވެ.
ރައީސް ވިދާޅުވީ އަލަށް އުފެދޭ ސަރުކާރުން ރައްޔިތުންނަށް ހިދުމަތްތައް ފޯރުކޮށްދިނުމުގައި، އެމީހެއްގެ ނަސްލަށް، އުފަންވީ ގައުމަށް، ކުލަޔަށް، ޖިންސަށް، ނުވަތަ ޖިސްމާނީ އަދި ނަފްސާނީ ނުކުޅެދުންތެރިކަމަކަށް ތަފާތެއް ނުކުރައްވާނެ ކަމަށެވެ. އަދި މީހެއްގެ ސިޔާސީ ނުވަތަ އެނޫންވެސް ވިސްނުމަކަށް، ނުވަތަ މާލީ ފުދުންތެރިކަމަށް، ނުވަތަ ނިސްބަތްވާ އާއިލާއަކަށް ވިޔަސް އުފަން ރަށަށް ބަލައި، ތަފާތެއް ނުކުރުމެއް ނޯންނާނެ ކަމަށް ރައީސް ސޯލިހު ވިދާޅުވި އެވެ.
އާ ސަރުކާރުގައި ހަމަ އެއްވެސް ރައްޔިތަކު ބާކީވެގެނެއް ނުދާނެރައީސް ސޯލިހު
ވެރިކަމާ ހަވާލުވެވަޑައި ގަންނަވާ އިރު ގައުމު މިއަދު އޮތް ހާލަތު ބަޔާން ކުރައްވަމުން ރައީސް ސޯލިހު ވިދާޅުވީ ދައުލަތުގެ މާލީ ހާލަތު ނާޒުކު ފައްތަރެއްގައި ހުރި ކަމަށާއި ހަމައެކަނި ސިޔާސީ ބޭނުންތަކަށް، ދައުލަތަށް ގެއްލުންވާ ގޮތަށް އެތަށް މަޝްރޫއެއް ހިންގާފައިވާ ކަމަށެވެ. ހިޔާނާތާއި އެކި ފަންތީގައި ހިންގި ކޮރަޕްޝަންގެ އަމަލުތަކުގެ ސަބަބުން ދައުލަތުގެ ހަޒާނާއިން އެތައް ބިލިއަން ރުފިޔާއެއް ގެއްލިފައިވާ ކަމަށާއި އެއީ ވައްކަމާއި ކޮރަޕްޝަނާއި އިހުމާލުގެ ސަބަބުން ގެއްލިފައިވާ ފައިސާގެ މިންވަރު އަދިވެސް ސާފެއްނުވާ ކަމަށް ރައީސް ސޯލިހު ވިދާޅުވި އެވެ.
ދައުލަތުގެ މާލިއްޔާގެ ހާލަތު އެގޮތަށް އޮތް ކަމުގައިވީ ނަމަވެސް، ރައްޔިތުންނަށް ދޭންޖެހޭ ހިދުމަތްތަކާއި، ކުރަންޖެހޭ ކަންކަމަށް އުނިކަމެއް ނައިސް ކުރިޔަށް ގެންދިޔުމަށްޓަކައި އަޒުމު ކަނޑައަޅުއްވާ ކަމަށް ރައީސް ސޯލިހު ވިދާޅުވި އެވެ. އެކަމުގައި ދުނިޔޭގެ ގައުމުތަކާއި، ބައިނަލްއަގުވާމީ ޖަމްޢިއްޔާ، ޖަމާއަތްތަކުގެ އެހީތެރިކަން ހޯދަން ޖެހޭ ކަމަށާއި ހާއްސަކޮށް ރައްޔިތުންގެ އެހީތެރިކަމާއި އިތުބާރު ވެސް ބޭނުންވާ ކަމަށް ރައީސް ސޯލިހު ވިދާޅުވި އެވެ.
"މިއަދު ދިވެހި ގައުމު ވައްޓާލާފައިވާ އަނދިރި އަނދަވަޅުން ސަލާމަތްކޮށް، ކުރިއަށްދިޔުމަށްޓަކައި، ރައްޔިތުންގެ ކިބައިން ނިގުޅައިގެންފައިވާ ހައްގުތައް އެފަރާތްތަކަށް ހޯދައިދޭންޖެހޭ. އަނިޔާގެ ޝިކާރައަކަށްވެފައިވާ ފަރާތްތަކަށް އިންސާފު ހޯދައިދޭންޖެހޭ. ދިވެހި ދައުލަތުގެ ހަޒާނާއިން ގެއްލުވާލާފައިވާ ފައިސާ އަނބުރާ ދިވެހީންނަށް ހޯދައިދޭންޖެހޭ. ގޮތް ނޭނގޭ މަރުތަކާއި، ގެއްލުވާލާފައިވާ މީސް މީހުންގެ މައްސަލަތަކުގެ ހަގީގަތް ހޯދައި، ރައްޔިތުންނަށް ހާމަކޮށްދޭންޖެހޭ. އަޅުގަނޑުމެން ގައުމެއްގެ ގޮތުގައި އެކަތިގަނޑަކަށްވެ ކުރިޔަށް ދިޔުމަށްޓަކައި، މި ކަންކަން ކުރުމަކީ އަޅުގަނޑު ދެކޭގޮތުގައި ކޮންމެހެން
ކުރަންޖެހޭ ކަމެއް," ރައީސް ސޯލިހު ވިދާޅުވި އެވެ.