ރައީސް އިބްރާހިމް މުހައްމަދު ސޯލިހު، އިބޫ މައިޖަލު ދޫނިދުއަށް ވަޑައިގެން އެތާންގެ ހާލަތު ބައްލަވައިފި އެވެ.
ރައީސުލްޖުމްހޫރިއްޔާގެ އޮފީހުން ބުނީ، ދޫނިދޫ ޖަލަށް އިބޫ ޒިޔާރަތްކުރެއްވީ، މެންދުރުފަހުގެ ވަގުތެއްގައި ކަމަށެވެ. ރައީސް ސޯލިހުގެ އަރިހުގައި، ޑިފެންސް މިނިސްޓަރު މާރިޔާ އަހުމަދު ދީދީ އާއި ހޯމް މިނިސްޓަރު އިމްރާން އަބްދުﷲ ވެސް ދޫނިދޫ ޖަލަށް ވަޑައިގެންނެވި އެވެ.
ރައީސް ސޯލިހު ދޫނިދޫ ޖަލަށް ޒިޔާރަތް ކުރައްވައި، ސިޔާސީ ބޭފުޅުން ހައްޔަރުކުރައްވާފައި ބޭތިއްބެވި ގޮޅިތަކާއި، ޖަލުގެ އާންމު އެހެން ގޮޅިތައް ބައްލަވައިލެއްވި އެވެ. އަދި ޖަލުގެ ހާލަތު އިތުރަށް ރަނގަޅު ކުރުމަށްޓަކައި ކުރަންހުރި ކަންތައްތަކުގެ މައުލޫމާތު، އޮޅުންފިލުއްވި އެވެ. އަދި އެއަށް ފަހު އެކަންކަމާ ގުޅޭގޮތުން ރައީސް ވަނީ ޑިފެންސް މިނިސްޓަރާއި ހޯމް މިނިސްޓަރާ މަޝްވަރާ ކުރައްވާފައި ކަމަށް ވެސް ރައީސް އޮފީހުން ބުންޏެވެ.