ރައްޔިތުންގެ މަޖިލީހުގެ މަޑުއްވަރީ ދާއިރާގެ މެމްބަރު މުހައްމަދު އަމީތާއި ތިނަދޫ ދެކުނު ދާއިރާގެ މެމްބަރު އަބްދުﷲ އަހްމަދު ޖުމްހޫރީ ޕާޓީއަށް މިރޭ ސޮއިކުރައްވައިފި އެވެ.
އެ ދެ މެންބަރުންނަކީ އެންޓި ޑިފެކްޝަން ގާނޫނުގެ ސަބަބުން އިލެކްޝަންސް ކޮމިޝަނުން ގޮނޑި ގެއްލުނު ކަމަށް ކަނޑައެޅި 12 މެންބަރުންގެ ތެރޭގައި ހިމެނޭ ތިން ބޭފުޅުންނެވެ. އެހެން ނަމަވެސް، ސުޕްރީމް ކޯޓުން ވަނީ އެބޭފުޅުންގެ ގޮނޑި ނުގެއްލޭ ކަމަށް ކަނޑައަޅައިފަ އެވެ.
އެންޑި ޑިފެކްޝަން ގާނޫނު އުވާލުމާއި ގުޅިގެން ގިނަ އަދަދެއްގެ މެންބަރުންތަކެއް ދަނީ ޖޭޕީއާ ގުޅެމުންނެވެ. އެގޮތުން ޕީޕީއެމްގެ މެންބަރުންގެ ގޮތުގައި ތިއްބެވި ކަނޑިތީމު ދާއިރާގެ މެންބަރު މުހައްމަދު ހުސައިނާއި މާވަށު ދާއިރާގެ އަހުމަދު އަޒްހާން ފަހުމީއާ ނޮޅިވަރަމް ދާއިރާގެ މެމްބަރު ހުސައިން އަރީފާއި ފަރެސްމާތޮޑާ ދާއިރާގެ މެންބަރު، ހުސެއިން މުހައްމަދު ލަތީފުވެސް ޖޭޕީއަށް ސޮއި ކުރައްވާފައި ވެއެވެ.
މީގެ އިތުރުން ބިލެއްދޫ ދާއިރާގެ މެންބަރު އަހުމަދު މުބީން އާއި އިސްދޫ ދާއިރާގެ މެންބަރު އަހުމަދު ރަޝީދާއި ހަނިމާދޫ ދާއިރާގެ މެންބަރު ހުސެއިން ޝަހުދީ އަދި ދަނގެތީ ދާއިރާގެ މެންބަރު އިލްހާމް އަހުމަދުވެސް ވަނީ ފަހުން ޖޭޕީއާ ގުޅިވަޑައިގެންފަ އެވެ.