ޔޫއެފްއާ ޗެމްޕިއަންސް ލީގްގައި މިރޭ، ސްވިޒަލޭންޑްގެ ޔަންގު ބޯއީސް އާ ދެކޮޅަށް އަމިއްލަ ދަނޑުގައި މެންޗެސްޓާ ޔުނައިޓަޑް ކުޅޭ މެޗުގެ ޓިކެޓް ވިއްކުމުގައި ޔުނައިޓަޑަށް ދަތިތަކާ ކުރިމަތި ވެއްޖެ އެވެ.
ޔުނައިޓަޑްގެ ކުރީގެ ތަރި، މިހާރު ޔުވެންޓަސްގެ ފޯވަޑް ކްރިސްޓިއާނޯ ރޮނާލްޑޯ، ޔުވެންޓަސް އާއެކު ޔުނައިޓަޑްގެ ދަނޑު އޯލްޑް ޓްރެފާޑް ގައި ކުޅުނު މެޗު ބަލަން ގިނަ އަދަދެއްގެ ބަޔަކު ނުއަގުގައިވެސް ޓިކެޓް ގަނެގެން ދަނޑަށް ވަދެފައިވެ އެވެ. ކަޅު ބާޒާރުގައި އެ މެޗުގެ ޓިކެޓެއްގެ އަގު 260 ޕައުންޑަށްވެސް އަރައިގެން ދިޔަ އެވެ.
މިރޭ ޔަންގު ބޯއީސްއާ ދެކޮޅަށް ކުޅޭ މެޗުގެ ޓިކެޓްގެ އަގު އަދިވެސް ހުރީ އާންމު އަގުގަ އެވެ. އަދި އެތައް ބައިވަރު ޓިކެޓެއްވެސް ނުވިކި އެބަހުއްޓެވެ.
ޓޫރިންގައި، ޔުވެންޓަސް އާ ދެކޮޅަށް ކުޅުނު މެޗު 2-1 އިން ކާމިޔާބު ކުރުމުން ޔުނައިޓަޑް އޮތީ ދެ ވަނަ ބުރަށް ކޮލިފައިވުމާ ދާދި ގާތުގަ އެވެ. ނަމަވެސް ޗެމްޕިއަންސް ލީގްގައި އަމިއްލަ ދަނޑުގައި އެންމެ ފަހުން ކުޅުނު ދެ މެޗުގައިވެސް ލަނޑެއް ޖެހިފައި ނުވާތީ ސަޕޯޓަރުން ވަނީ ވަރަށް ބޮޑަށް މާޔޫސްވެފަ އެވެ.
މިދިޔަ ހޮނިހިރު ދުވަހު، ކްރިސްޓަލް ޕެލަސްއާ ދެކޮޅަށް ކުޅުނު މެޗުވެސް ނިނުމީ އެއްވަރު ވެގެންނެވެ. ސަޕޯޓަރުން ދަނޑަށް ނުވަންނަ މައްސަލައިގައި ޔުނައިޓަޑްގެ ކޯޗް ހޯޒޭ މޮރީނިއޯ ވަނީ ވާހަކަ ދައްކާފަ އެވެ.
"ޕްރެޝާ އިހްސާސް ކުރެވެންޏާ ގޭގައި މަޑުކުރޭ، އަހަރެމެން މި ބުނަނީ ގޭގައި ތިބެގެން ޓީވީން މެޗު ބަލާށޭ،" މޮރީނިއޯ ބުންޏެވެ. "ސަޕޯޓް ކުރަން އަންނަންޏާ ދަނޑަށް އައިސް ސަޕޯޓް ކުރޭ، އަމިއްލަ ދަނޑުގައި ކުޅޭކަށް އަހަންނަކަށް ޕްރެޝަރެއް ނެތް."