އާމްދަނީއާ އެއްވަރަށް ރާއްޖެ ތަރައްގީވެފައިވާ ތަން ނުފެންނަ ކަމަށާއި އެކަން ބަދަލު ކުރެއްވުމަކީ އެމަނިކުފާނުގެ ތަސައްވުރެއް ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
ވެރިކަމާ ހަވާލުވެ ވަޑައިގަތުމަށް ފަހު، އަތޮޅުތެރެއަށް ކުރައްވާ ފުރަތަމަ ދަތުރުފުޅުގައި، ރައީސް ސޯލިހު ވިދާޅުވީ، އެމަނިކުފާނު ވެރިކަމަށް ވަޑައިގެންނެވީ ރައްޔިތުން ބޭނުންވާ އެންމެ އަސާސީ ހިދުމަތްތައް ފޯރުކޮށްދެއްވާނެ ކަމުގެ ވައުދާ އެކުގައި ކަމަށެވެ. އެމަނިކުފާނު ވިދާޅުވީ ސާފު ބޯފެނާއި ފެންވަރު ރަނގަޅު ނަރުދަމާގެ ނިޒާމަކީ އެންމެ އަސާސީ ހައްގު ކަމަށްވީ ނަމަވެސް، ފެނުގެ ނިޒާމު ގާއިމް ވެފައި ހުރީ އެންމެ 34 ރަށުގައި ކަމަށެވެ. އަދި ނަރުދަމާގެ ނިޒާމް ގާއިމް ކުރެވުނީ 64 ރަށުގައި ކަމަށް ވެސް ރައީސް ވިދާޅުވި އެވެ. އެމަނިކުފާނުގެ އަމާޒަކީ ތިން އަހަރުގެ ތެރޭގައި ހުރިހާ ރަށަކަށް މި ދެ ހިދުމަތް ފޯރުކޮށް ދިނުމުގެ މަޝްރޫއުތައް ފަށައިގަތުމެވެ.
"ރާއްޖެއަށް ބޮޑު އާމްދަނީއެއް ލިބޭ އިރު، އެވަރާ ގާތަށް ވެސް ރާއްޖޭގެ ރަށްތައް ތަރައްގީވެފައެއް ނެތް. އަޅުގަނޑު ގަބޫލު ކުރާ ގޮތުގައި އެއީ އެކަން ވެގެން ވާނެ ގޮތެއް ނޫން،" ރައީސް ސޯލިހު ވިދާޅުވި އެވެ. "އަޅުގަނޑުގެ އަމާޒަކީ ތިން އަހަރު ނިމޭއިރު ރާއްޖޭގެ ހުރިހާ ރަށަކަށް ބޭނުންވާ ފެނާއި ނަރުދަމާގެ ނިޒާމުގެ މަޝްރޫއުތައް ފަށައިގަތުން. ފަސް އަހަރު ނިމޭއިރު އެ ހުރިހާ ކަމެއް ފުރިހަމަ ކުރުން،"
ރައީސް ސޯލިހު ވިދާޅުވީ އެ މަގުސަދަށް ވާސިލްވުމުގެ ގޮތުން 102 މިލިއަން ޑޮލަރުގެ މަޝްރޫއުތައް މިހާރުވެސް ކުރިއަށްދާ ކަމަށެވެ. އެގޮތުން ކުރިއަށް އޮތް އަހަރުގެ ތެރޭގައި ބަޖެޓުން، ހަރަދުކޮށްގެން 72 ރަށުގެ ނަރުދަމާގެ މަސައްކަތް ފަށާއިރު، 56 ރަށުގެ ފެނުގެ ނިޒާމުގެ މަސައްކަތް ފަށާނެ ކަމަށް ރައީސް ސޯލިހު ވިދާޅުވި އެވެ.
މި މަޝްރޫއުތައް ހިންގުމުގައި ވިޔަފާރިވެރިންގެ އެހީތެރިކަން ބޭނުންވާ ކަމަށާއި ސަރުކާރުން އޮތީ ވިޔަފާރިވެރިންގެ ފަރާތުން އެ އެއްބާރުލުން ލިބޭނެ ކަމުގެ ޔަގީންކަމުގައި ކަމަށެވެ. އަދި ވިޔަފާރިވެރިންނަށް ވެސް އެފަދަ ކަންކަން ކޮށްދެވޭނީ ވިޔަފާރިއަށް ފަހި މާހައުލެއް ތަނަވަސްކުރުމާ އެކު، އިންވެސްޓްމަންޓްތަކަށް މިހާރަށް ވުރެ ބޮޑަށް ރައްކާތެރި މާހައުލެއް ފަހިކޮށްދެވިގެން ކަމަށް ރައީސް ސޯލިހު ވިދާޅުވި އެވެ.
"ވިޔަފާރިވެރިންގެ އިންވެސްޓްމަންޓްތަކަށް ހޯދައިދޭން ޖެހޭ ގާނޫނީ ރައްކާތެރިކަން، ވިޔަފާރި ކުރުމުގެ ފަހި މާހައުލު އެކަން އަޅުގަނޑުކޮށް ކޮށްދޭނަން. އެ ކަންކަން އެބޭފުޅުންނަށް މި ސަރުކާރުން ފަހިކޮށްދޭނެ،" ރައީސް ސޯލިހު ވިދާޅުވި އެވެ.