ކުޑަ އަންހެން ކުއްޖަކާ ބަދު އަހުލާގީ އަމަލު ހިންގުމުގެ ކުށުގައި ޖަލަށްލާފައިވާ، އެމްޑީޕީގެ އެކްޓިވިސްޓެއް ކަމަށްވާ އިބްރާހިމް ރަޝީދު، ހޯރަ އިއްބެގެ ހުކުމް ލުއިކޮށްދީ މިނިވަން ކުރަން ސަރުކާރުން ނިންމައިފި އެވެ.
އެކަން ކަށަވަރުކޮށްދެއްވަމުން ރައީސް ސޯލިހުގެ ތަރުޖަމާން އިބްރާހިމް ހޫދު ވިދާޅުވީ، އިއްބެގެ ހުކުމް މާފުކޮށްދޭން ރައީސް ނިންމެވީ 2016 ވަނަ އަހަރު ކްލެމެންސީ ބޯޑުން އިއްބެގެ ޖަލު ހުކުމަށް ލުޔެއް ދިނުމަށް ނިންމާފައި ވާތީ އެ ނިންމުމަށް ރިއާޔަތްކޮށް ކަމަށެވެ.
މީގެ ކުރިން ރައީސް ނަޝީދުގެ ސަރުކާރުގައި، ރައީސުލްޖުމްހޫރިއްޔާގެ ގެކޮޅު މުލިއާގޭގެ އަންޑަ ސެކެރެޓަރީކަން ކުރެއްވި ހޯރަ އިއްބެ، 10 އަހަރު ދުވަހަށް ޖަލަށްލީ 12 ޖެނުއަރީ 2013 ގަ އެވެ. އޭނާގެ ހުކުމުގެ މުއްދަތު ހަމަވާނީ 08 ޖެނުއަރީ 2023ގަ އެވެ.
ހޯރަ އިއްބެގެ އާއިލާގެ މީހަކު ބުނި ގޮތުގައި، ބުރާސްފަތި ދުވަހު ގެއަށް ބަދަލު ކުރާކަން އާއިލާއަށް މިހާރު ވަނީ އަންގައިފަ އެވެ. ހޯރަ އިއްބެ 2012 ޑިސެމްބަރުގައި ހައްޔަރު ކުރީ 17 އަހަރުގެ އަންހެން ކުއްޖަކާ އެކު ކޮޓަރިއެއްގައި ތިއްބަ އެވެ. އެ އަންހެން ކުއްޖާޔާ ހޯރަ އިއްބެ ފަހުން ކައިވެނިކޮށް އެ ކައިވެންޏަށް ވަނީ ދަރިއަކު ވެސް ލިބިފަ އެވެ.