ރާއްޖެއިން ބޭރަށްް ދިވެހިން ކުރާ ދަތުރުތަކުގައި ކުރާ ހޭދައާއި ގުޅޭ ސާވޭ މި އަހަރުވެސް ޑިސެމްބަރު 24 އިން 30 އަށް ކުރަމުންގެންދާނެ ކަމަށް އެމްއެމްއޭއިން ބުނެފި އެވެ.
އެމްއެމްއޭއިން ކޮށްފައިވާ އިއުލާނެއްގައި ބުނެފައިވަނީ ރާއްޖޭގެ ބެލެންސް އޮފް ޕޭމަންޓްސް ހިސާބުތައް ތައްޔާރުކުރުމަށް ބޭނުންވާ މަޢުލޫމާތު ހޯދުމުގެގޮތުން، ރާއްޖެއިން ބޭރުން އަންނަ ދިވެހީންނަށް އަމާޒުކޮށްގެން ކޮންމެ އަހަރަކު އެ އޮތޯރިޓީއިން ކުރަމުންގެންދާ
"ދިވެހީން ރާއްޖެއިން ބޭރުގައި ކުރާ ހޭދައާ ގުޅޭ ސާވޭ" މި އަހަރު ވެސް އޮންނާނެ ކަމަށެވެ.
އެ ސާވޭ މިއަހަރުވެސް އޮންނާނީ ޑިސެމްބަރު 24އިން 30އަށް ވެލާނާ އިންޓަނޭޝަނަލް އެއާޕޯޓްގެ އެރައިވަލް ހޯލުގައި، ކަމަށާއި، އެ ސާވޭގައި މައިގަނޑު ގޮތެއްގައި ނެގޭ މައުލޫމާތުތަކުގެ ތެރޭގައި ދަތުރުގެ މައިގަނޑު މަގްސަދާއި، ދަތުރު ކުރި ގައުމާއި، ޓިކެޓުގެ ހަރަދާއި، ހުރުމުގެ ހަރަދާއި، ބޭސް ފަރުވާއަށް ކުރެވުނު ހަރަދުގެ އިތުރުން ޖުމުލަ ގޮތެއްގައި މުޅި ދަތުރަށް ކުރެވުނު ހަރަދުގެ މަޢުލޫމާތު ހިމެނޭނެކަމަށް އެމްއެމްއޭއިން ވަނީ ބުނެފަ އެވެ.
އެމްއެމްއޭއިން ބުނީ އެ ބައިތަކުގެ މައުލޫމާތު އެއްކުރުމަށް ހަމަޖެހިފައިވީނަމަވެސް ވަކިވަކި ފަރުދުންގެ ނަމާއި އެޑްރެސް ފަދަ
އެއްވެސް މައުލޫމާތެއް އެ ސާވޭގައި އެކެއްނުކުރެވޭނެ ކަމަށާއި، އެއްކުރެވޭ ހުރިހާ މަޢުލޫމާތެއްގެ ސިއްރު ހިފަހައްޓާނެކަމުގެ ޔަޤީންކަން އެ އޮތޯރިޓީން އަރުވާ ކަމަށެވެ.
މީގެ އިތުރުން ސާވޭ ކުރާ މުއްދަތުގައި، އެމްއެމްއޭގެ ޓީމްތައް ވެލާނާ އިންޓަނޭޝަނަލް އެއާޕޯޓްގެ އެރައިވަލް ހޯލުގައި ސާވޭއަށް ބޭނުންވާ މަޢުލޫމާތު އެއްކުރުމުގައި ހަރަކާތްތެރިވާނެކަމަށާއި، އެ މުއްދަތުގައި ރާއްޖެއަށް އެނބުރި އަންނަ އެންމެންގެ ފުރިހަމަ އެއްބާރުލުން އެ ސާވޭއަށް ދެއްވުން އެދޭކަމަށް އެމްއެމްއޭއިން ވަނީ ބުނެފަ އެވެ.