ދިރާސީ މަސައްކަތްތަކަށް ހާއްސަ ފަންޑެއް މަރުކަޒީ ބޭންކް -- މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އިފްތިތާހުކޮށްފި އެވެ.
މި ފަންޑް އިފްތިތާހުކުރީ އެމްއެމްއޭއިން ދެ ދުވަހުގެ މުއްދަތައް ކުރިއަށްގެންދާ ރިސާޗް ކޮންފަރެންސްގަ އެވެ.
ފަންޑް އިފްތިތާހުކޮށް ދެއްވީ ދިވެހިރާއްޖޭގެ ޤައުމީ ޔުނިވާސިޓީގެ ޗާންސެލަރު ޑރ. މަހްމޫދު ޝައުގީ އެވެ.
އެމްއެމްއޭ އިން މި ފަންޑް ފަށާފައިވަނީ އެއް މިލިއަން ރުފިޔާއާއެކު އެވެ. މި ފަންޑުގެ އަމާޒަކީ ދިރާސާތައް ކުރުމަށް ހިތްވަރުދީ ދިރާސާ ކުރާ ފަރާތްތަކަށް ފަހި މާހައުލެއް ބިނާކުރުން ކަމަށް އެމްއެމްއޭ އިން ބުނެފައިވެ އެވެ.
އެމްއެމްއޭގެ ރިސާޗް ކޮންފަރެންސްގައި ވަނީ ދިރާސާ މަސައްކަތް ކުރުމަށް ދެ އެއްބަސްވުމެއްގައި ސޮއިކޮށްފަ އެވެ.
އޭގެ ތެރެއިން އެއް އެއްބަސްވުމަކީ ދެމެހެއްޓެނިވި ކުރިމަގަކަށް ދިރާސާތައް ފުޅާކުރުމާއި އީޖާދީ އުފެއްދުންތައް ކުރިއެރުވުމަށް ދިރާގާއެކު ސޮއިކުރި އެއްބަސްވުމެކެވެ.
އަނެއް އެއްބަސްވުމަކީ އިގުތިސާދީ ދިރާސާތައް ކުރިއެރުވުމަށާއި ތައުލީމާއި އީޖާދުކުރުމުގެ ދާއިރާއިން އެކުގައި މަސައްކަތްކުރުމަށް މެލޭޝިއާގެ އިސްލާމް ސެލަންގޫރު ޔުނިވާސިޓީއާއެކު ސޮއިކުރި އެއްބަސްވުމެކެވެ.
މި ކޮންފަރެންސްގައި ވަނީ ރާއްޖޭގެ އިގުތިސާދަށް ހުރި ގޮންޖެހުންތަކާއި، ކުރިއަށް ހުރި އިގުތިސާދީ ފުރުސަތުތަކާ ގުޅޭގޮތުން ވާހަކަ ދައްކާފަ އެވެ.