ސަލާމަތީ ފިޔަވަޅުތައް ގަވާއިދާއި އެއްގޮތަށް އަޅާފައިނުވާ 17 ކޮންސްޓްރަކްޝަން ސައިޓެއްގެ މަސައްކަތް ހުއްޓާލަން އަންގާފައިވާ ކަމަށް މިނިސްޓްރީ އޮފް ނޭޝަނަލް ޕްލޭނިން އެންޑް އިފްރާސްޓްރަކްޗާ އިން ބުނެފި އެވެ.
އެ މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި ޕްލޭނިން މިނިސްޓަރު މުހައްމަދު އަސްލަމް ވިދާޅުވީ، މާލެ އާއި މާލެ ސަރަހައްދުގައި ވަރަށް ގިނަ ކޮންސްޓްރަކްޝަން މަސައްކަތްތައް ކުރިއަށްދާ ކަމަށާއި އެ މަސައްކަތްތައް ހިނގާއިރު އެންމެ އިސް ކަމެއްދޭ ކަމަކީ ރައްޔިތުންގެ ސަލާމަތާއި ރައްކާތެރިކަން ކަމަށެވެ.
އަސްލަމް ވިދާޅުވީ، މާލޭގައި ވަގުތުން ހުއްޓުވުމަށް އެންގި ތަންތަނުގެ ތެރެއިން ދެ ތަނެއްގެ ގަވާއިދާ ހިލާފަށްހުރި ކަންކަން މިހާރު ރަނގަޅުކޮށްފައި ކަމަށެވެ. އަދި ވިދާޅުވީ، މަގުސަދަކީ ކޮންސްޓްރަކްޝަން ސައިޓްތައް ހުއްޓުވުން ނޫން ކަމަށާއި ނަމަވެސް ކޮންސްޓްރަކްޝަން މަސައްކަތްތައް ކުރިއަށް ގެންދަންވާނީ ރައްޔިތުންގެ ސަލާމަތާއި މަސައްކަތްކުރާ ފަރާތްތަކުގެ ސަލާމަތާއި ރައްކާތެރިކަމަށް ބެލުމަށްފަހުގައި ކަމަށެވެ.
މިއަދު މިނިސްޓްރީން ވަނީ މަސައްކަތްތައް ކުރިއަށްދާ ގޮތުގެ ޕްރެޒެންޓޭޝަނެއް ވެސް ދައްކާލާފަ އެވެ. މިނިސްޓްރީން ބުނީ، ސަރުކާރުގެ ހުރިހާ ވުޒާރާއަކުން ސައިޓްތައް އިންސްޕެކްޓް ކުރުމުގައި ބައިވެރިވެ އެހީތެރިކަން ފޯރުކޮށްދީފައިވާ ކަމަށެވެ. އަދި ޖުމްލަ 70 މީހުން ހިމެނޭ ގޮތަށް 35 ޓީމާއެކު މަސައްކަތް ކުރަމުން ގެންދާ ކަމަށެވެ.
މާލެއާ ހުޅުމާލެ އަދި ވިލިމާލެ ސަރަހައްދުތައް ބަހާލައިގެން ވަކިވަކިން ބަލަމުން އަންނަ އިރު މާލޭގެ 167 ސައިޓަކާއި ވިލިމާލޭގެ 18 ސައިޓަކާއި ހުޅުމާލޭގެ 275 ސައިޓާއެކު ޖުމްލަ 460 މިވަގުތު ކޮންސްޓްރަކްޝަން މަސައްކަތް ކުރިއަށްދާ ކަމަށް މިނިސްޓްރީން މިއަދު ބުންޏެވެ.
އިއްޔެގެ ނިޔަލަށް މާލޭގެ 174 ސައިޓަކާއި ވިލިމާލޭގެ 16 ސައިޓަކާއި ހުޅުމާލޭގެ 117 ސައިޓެއް، ޖުމްލަ 307 ސައިޓްގެ މަސައްކަތް ވަނީ ބަލާފަ އެވެ. އޭގެ ތެރެއިން އިސްލާހު ކުރަން މާލޭގެ 69 ސައިޓަކާއި ވިލިމާލޭގެ 15 ސައިޓަކާއި ހުޅުމާލޭގެ 79 ތަނަކަށް އަންގާފައި ވެއެވެ.
ވަގުތުން މަސައްކަތް ހުއްޓާލުމަށް 17 ތަނަކަށް އަންގާފައިވެ އެވެ. އެއީ މާލޭގެ ތިން ތަނަކާއި ވިލިމާލޭގެ ދެ ތަނަކާއި ހުޅުމާލޭގެ 12 ތަނެކެވެ.