އިމާރާތްކުރުމާއި ގުޅޭ ދާއިރާތަކުން ކޮމާޝަލް ބޭންކްތަކުން ލޯނު ދޫކުރި ނިސްބަތް އިތުރުވެއްޖެ އެވެ.
މަރުކަޒީ ބޭންކް -- މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކުރި މި އަހަރުގެ ދެވަނަ ކުއާޓަރުގެ ކުއާޓަލީ އިކޮނޮމިކް ބުލެޓިންގައިވާ ގޮތުން އިމާރާތްކުރުމާއި ގުޅޭ ދާއިރާތަކުން ލޯނު ދޫކުރި ނިސްބަތްވަނީ މިދިޔަ އަހަރާ އަޅާބަލާއިރު 18 ޕަސެންޓް އިތުރުވެފަ އެވެ.
އެ ގޮތުން ރިސޯޓްތައް ރިނޮވޭޓްކުރުމާއި ރެޒިޑެންޝަލް ނުވަތަ ހައުސިން މަޝްރޫއުތަކުން ލޯނު ދޫކުރި މިންވަރު ވަނީ އިތުރުވެފަ އެވެ. ނަމަވެސް ރިއަލް އެސްޓޭޓްގެ ބައެއް މަޝްރޫއުތަކާއި ގެސްޓްހައުސް އިމާރާތްކުރުމުގެ މަޝްރޫއުތަކަށް ލޯނު ދިން މިންވަރު ވަނީ ދަށަށް ގޮސްފަ އެވެ.
އިމާރާތްކުރުމާއި ގުޅޭ ދާއިރާތަކުން ލޯނު ދޫކުރި ނިސްބަތް އިތުރުވި ނަމަވެސް އިމާރާތްކުރުމާއި ގުޅޭ މުދާ އިމްޕޯޓްކުރި މިންވަރު ވަނީ ދަށްވެފަ އެވެ.
އެމްއެމްއޭ އިން ހާމަކުރި ގޮތުގައި އިމާރާތްކުރުމާއި ގުޅޭ މުދާ އިމްޕޯޓްކުރި މިންވަރު ވަނީ މިދިޔަ އަހަރާ އަޅާބަލާއިރު 16 ޕަސެންޓް ދަށަށް ގޮސްފަ އެވެ.