އިމާރާތް ކުރުމުގެ ގާނޫނުގެ ދަށުން މިހާރު އެކުލަވާލާފައިވާ އިމާރާތް ކުރުމުގެ ސަލާމަތްތެރިކަމާބެހޭ ގަވާއިދަށް ލަފާ ހޯދަން އެޓާނީ ޖެނެރަލްގެ އޮފީހަށް އަންނަ އަންގާރަ ދުވަހު ފޮނުވާނެ ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ޕްލޭނިން މިނިސްޓްރީގައި މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އަސްލަމް ވިދާޅުވީ، އިމާރާތް ކުރުމުގެ ގާނޫނުގެ ދަށުން 14 ގަވާއިދެއް ހަދަން ޖެހޭ ކަމަށެވެ.
އެ ގާނޫނުގައިވާ ގޮތުގެ މަތީން މި އަހަރުގެ މާޗްމަހުގެ ތެރޭގައި އެކަމާ ގުޅޭ ގަވާއިދުތައް ހަދައި ނިންމަންޖެހެ އެވެ. ނަމަވެސް މިހާތަނަށް އެކަމާ ގުޅޭ ގަވާއިދުތައް ހަދާފައެއް ނުވެއެވެ.
"އަޅުގަނޑުމެން ޓާގެޓް ކުރަމުން މި ގެންދަނީ ފެށޭ ހަފުތާގެ އަންގާރަ ދުވަހާއި ހަމައަށް އަޅުގަނޑުމެންނަށް އިމާރާތް ކުރުމުގެ ގާނޫނުގެ ތެރެއިން އެތަންތަނުގެ ސަލާމަތްތެރިކަމާބެހޭ ގަވާއިދު އެންމެ އިސްކަމެއް ދީގެން އެ ގަވާއިދު އޭޖީ އޮފީހަށް ފޮނުވަން" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ރާއްޖޭގައި އިމާރާތްކުރުމުގެ ދާއިރާގައި މަސައްކަތްކުރާ ޕްރޮފެޝަނަލް ދެ އެސޯސިއޭޝަން ކަމަށްވާ އާކިޓެކްޓްސް އެސޯސިއޭޝަނާއި އިންޖިނިއާސް އެސޯސިއޭޝަނަށް މިހާރު އުފައްދާފައިވާ ސަލާމަތާބެހޭ ގަވާއިދަށް ހިޔާލު ހޯދަން ފޮނުވާފައިވާނެ ކަމަށެވެ. އަދި އަންނަ އާދީއްތަ ދުވަހުގެ މެންދުރު 1:00 އާ ހަމައަށް އެފަރާތްތަކަށް ފުރުސަތު ހުޅުވާލާފައިވާނެ ކަމަށެވެ.
"އަޅުގަނޑުމެން އުންމީދު ކުރަނީ އެބޭފުޅުންގެ ކޮމެންޓެއް އޮވެއްޖެނަމަ ލިބޭނެ ކަމަށް، ކޮމެންޓެއް އޮވެއްޖިއްޔާ އެ ކޮމެންޓާ އެކީގައި ރިވިޝަނެއް ގެންނަން ޖެހެންޏާ ގެނެސްފައި އަންގާރަ ދުވަހާއި ހަމައަށް އޭޖީ އޮފީހަށް ގާނޫނީ ލަފަޔަކަށް ގަވާއިދު ފޮނުވާނަން،" މިނިސްޓަރު ވިދާޅުވި އެވެ.
މިނިސްޓަރު ވިދާޅުވީ، ކުރިއަށް އޮތް ހަފުތާއަށް ފަހު އިމާރާތްކުރާ ތަންތަނުގެ ރައްކާތެރިކަމާބެހޭ ގަވާއިދު ގެޒެޓްގައި ޝާއިރު ކުރެވޭނެ ކަމަށް އުންމީދުކުރައްވާ ކަމަށެވެ. އަދި ވިދާޅުވީ، ކުރިއަށް އޮތް ދެމަސް ދުވަހެއްގެ ތެރޭގައި އެހެން ހުރިހާ ގަވާއިދެއް ހެދޭނެ ކަމަށެވެ.
މިނިސްޓަރު އިތުރަށް ވިދާޅުވީ، ދާއިމީ ގޮތެއްގައި ސައިޓްތައް އިންސްޕެކްޓް ކުރުމުގެ މަސައްކަތް ކުރިއަށް ގެންދިއުމަށް ކަންކަން އެކުލަވާލަންޖެހޭ ކަމަށާއި އެކަން މާލޭ ސިޓީ ކައުންސިލާއި ގުޅިގެން ކުރިއަށް ގެންދާނެ ކަމަށެވެ.
މާލެއާ ހުޅުމާލެ އަދި ވިލިމާލެ ސަރަހައްދުތައް ބަހާލައިގެން ވަކިވަކިން ބަލަމުން އަންނަ އިރު މާލޭގެ 167 ސައިޓަކާއި ވިލިމާލޭގެ 18 ސައިޓަކާއި ހުޅުމާލޭގެ 275 ސައިޓާއެކު ޖުމްލަ 460 މިވަގުތު ކޮންސްޓްރަކްޝަން މަސައްކަތް ކުރިއަށްދާ ކަމަށް މިނިސްޓްރީން މިއަދު ބުންޏެވެ.
އިއްޔެގެ ނިޔަލަށް މާލޭގެ 174 ސައިޓަކާއި ވިލިމާލޭގެ 16 ސައިޓަކާއި ހުޅުމާލޭގެ 117 ސައިޓެއް، ޖުމްލަ 307 ސައިޓްގެ މަސައްކަތް ވަނީ ބަލާފަ އެވެ. އޭގެ ތެރެއިން އިސްލާހު ކުރަން މާލޭގެ 69 ސައިޓަކާއި ވިލިމާލޭގެ 15 ސައިޓަކާއި ހުޅުމާލޭގެ 79 ތަނަކަށް އަންގާފައި ވެއެވެ.
ވަގުތުން މަސައްކަތް ހުއްޓާލުމަށް 17 ތަނަކަށް އަންގާފައިވެ އެވެ. އެއީ މާލޭގެ ތިން ތަނަކާއި ވިލިމާލޭގެ ދެ ތަނަކާއި ހުޅުމާލޭގެ 12 ތަނެކެވެ.