ކެޕްޓަން އައްސަދު އަލީ (އަޑުބަރޭ) މެޗުގެ ފުރަތަމަ ހާފުގައި ޖެހި ލަނޑާއެކު އުރީދޫ ދިވެހި ޕްރިމިއާ ލީގުގައި ރޭ ބީޖީ ސްޕޯޓްސް ކްލަބް އަތުން 1-0 ނިއު ރޭޑިއަންޓް މޮޅުވެއްޖެ އެވެ.
ބަދަލުތަކަކާއެކު ނިކުތ ނިއު މެޗުން މޮޅުވި ލަނޑު އަޑުބަރޭ ޖެހީ މެޗުގެ ހަ ވަނަ މިނިޓުގަ އެވެ. ނިއުގެ ސްލޮވާކިއާ މިޑްފީލްޑަރު ވިލިއަމް މައްކޯ ދިން ބޯޅަ ޕެނަލްޓީ އޭރިޔާ ތެރެއިން އަޑޭ ވަނީ ގޯލުގެ ތިރީ ކަނަށް އަމާޒުކޮށްލައިފަ އެވެ.
މެޗުގެ 11 ވަނަ މިނިޓުގައި ބީޖީގެ ނައިޖީރިއާ މިޑްފީލްޑަރު ޑޭވިޑް ފިލެމޮން އަށް ވަނީ ރަނގަޅު ފުރުސަތެއް ލިބިފަ އެވެ. އެކަމަކު އޭރިޔާ ތެރެއިން ޑޭވިޑް ބޮލުން ފޮނުވާލި ބޯޅަ ދިޔައީ ބޭރަށެވެ. އަދި މެޗުގެ 33 ވަނަ މިނިޓުގައި ބީޖީގެ އަލީ ހައިޝަމް އަށް އޭރިޔާ ތެރެއިން ރަނގަޅު ބޯޅައެއް ލިބުނު ނަމަވެސް، ހައިޝަމް އަށް އެ ބޯޅަ ގޯލާ ދިމާލަށް ފޮނުވާލެވޭ ގޮތެއްނުވި އެވެ.
މެޗުގެ 33 ވަނަ މިނިޓުގައި ނިއުގެ ވިލިއަމް ޕެނަލްޓީ އޭރިޔާ ބޭރުން ފޮނުވާލި ބާރު ޝޮޓެއް އަމާޒުވީ ގޯލުގެ ހުރަސް ދަނޑިއަށެވެ. އަދި ދެވަނަ ހާފުގެ ކުރީކޮޅު ވިލިއަމްގެ ހަމަލާއެއް ބީޖީގެ ގޯލްކީޕަރު އިފްރާހު ވަނީ ދިފާއުކޮށްފަ އެެވެ.
ބީޖީން ކުރިއަށް ޖެހި، މެޗުގެ ނަތީޖާ އެއްވަރުކުރަން މަސައްކަތްކުރި ނަމަވެސް، އެކަން ހާސިލެއްނުވި އެވެ. މެޗުގެ 65 ވަނަ މިނިޓުގައި ބީޖީގެ އިބްރާހިމް ޝިޔާމް (ކުޑަތޮއްޑޫ) ފޮނުވާލި ހަމަލާއެއް ނިއުގެ ގޯލްކީޕަރު އަލީޝާ އަހުމަދޯފް ދިފާއުކުރިއިރު، އަބްދުﷲ މުއާޒް (އޮޓޯ) ފޮނުވާލި ޝޮޓެއް ދިޔައީ ބޭރަށެވެ. އަދި 89 ވަނަ މިނިޓުގައި ބީޖީގެ އިބްރާހިމް ހަމްދާނަށް ރަނުގެ ފުރުސަތެއް ލިބުނު ނަމަވެސް، އޭރިޔާ ތެރެއިން ހުސްކޮށް ލިބުނު ބޯޅަ ގޯލަށް އަމާޒެއްނުކުރެވުނެވެ.
މި މެޗުން މޮޅުވެ ނިއު ވަނީ ހަތް ޕޮއިންޓަށް ޖެހިލައި، އެއްވަނައިގައި އޮތް ކްލަބް އީގަލްސް އާއި ދެވަނައިގައި އޮތް މާޒިޔާއާ ޕޮއިންޓްގެ ގޮތުން އެއްވަރުކޮށްފަ އެވެ. ނިއު ތިން ވަނައިގައި އޮތީ ލަނޑުގެ ތަފާތުންނެވެ.
ނިއުގެ އެސިސްޓަންޓް ކޯޗު ހަސަން ހަމީދު (ޑަކޭ) ބުނީ މެޗުގައި ނިއުގެ ފަރާތުން ހިތްހަމަޖެހޭ ވަރުގެ ކުޅުމެއް ނުފެނުނު ނަމަވެސް، ތިން ޕޮއިންޓް ލިބުމުން މެޗާމެދު ހިތްހަމަޖެހޭ ކަމަށެވެ.
"ނިއުގެ ފަރާތުން އެންމެ ރަނގަޅު ކުޅުމެއް ނުފެނޭ. އެކަމަކު މުހިންމީ ތިން ޕޮއިންޓް. ނިއުގެ އެންމެ ރަނގަޅު ޕާފޯމަންސް މިއަދު ނުފެނޭ،" ޑަކޭ ބުންޏެވެ.
މެޗުގެ ރެފްރީ ޒައީމް އަލީގެ ނިންމުންތަކަށް މެޗުގެ ތެރެއިން ދެ ޓީމުން ވެސް ހިތްހަމަނުޖެހުން ފާޅުކުރި އެވެ.
ޑަކޭ ބުނީ މެޗުގައި ރެފްރީގެ ފަރާތުން ގިނަ ގޯސްތަކެއް ފެނިއްޖެ ކަމަށާއި ރެފްރީގެ ފެންވަރު ދަށްވުމަކީ ހުރިހާ ޓީމަކަށް ވެސް އަސަރުކުރާނެ ކަމެއް ކަމަށެވެ.
ބީީޖީގެ ކޯޗު މުހައްމަދު ޝާޒްލީ ބުނީ މެޗުން މޮޅުވުމަށް ބީޖީ އަށް "ކުރެވެން އޮތް ހުރިހާ ކަމެއް ކުރި" ކަމަށެވެ. އަދި މެޗުގެ ރެފްރީ ޒައީމްގެ ބައެއް ނިންމުންތަކާމެދު ހިތްހަމަނުޖެހޭ ކަމަށާއި ރެފްރީގެ ފެންވަރު ރަނގަޅު ކުރަންޖެހޭ ކަމަށެވެ.
"ބީޖީ އަށް ކުރެވެން އޮތް ހުރިހާ ކަމެއް ކުރި. އެކަމަކު ރެފްރީން ވެސް އެބަޖެހޭ މެޗުތަކަށް ވަރަށް ރަނގަޅަށް ތައްޔާރުވާން. އަހަރެމެންގެ ނަސީބު ވެސް ދެރައީ މިއަދު،" ޝާޒްލީ ބުންޏެވެ.