ޒިނޭގެ ކުށް ސާބިތުވެ އަންހެނަކު ރަޖަމް ކުރަން ނައިފަރު މެޖިސްޓްރޭޓް ކޯޓުން އިއްޔެ އިއްވި ހުކުމް ސުޕްރީމް ކޯޓުން ބާތިލްކޮށްފި އެވެ.
ސުޕްރީމް ކޯޓުން މިއަދު ނެރުނު އަމުރެއްގައި ބުނީ، އެ ހުކުމް ބާތިލް ކުރަން ސުޕްރީން ކޯޓުން ނިންމީ، އެ މައްސަލައިގެ ޝަރީއަތް މެޖިސްޓްރޭޓް ކޯޓްގައި ހިންގައި ހުކުމް އިއްވާފައި ވަނީ، އެ ގަޒިއްޔާގެ ދައުވާގައި ޕީޖީ އޮފީހުން ހަވާލާދީފައިވާ ގާނޫނު، ޖިންސީ ކުށުގެ ގާނޫނުގެ 27 ވަނަ މާއްދާއާ ހިލާފަށް ކަމަށް ވާތީ އެވެ.
ނައިފަރު ކޯޓުގައި އެ ހުކުމްކޮށްފައި ވަނީ އެ ކޯޓުގެ އިސް ގާޒީ ޝޭހް މުހައްމަދު މޫސާ އެވެ. ގާނޫނުލް އުގޫބާތުގެ 1205 ގައި ބުނަނީ، ގުރުއާނުގައި ހައްްދު ކަނޑައެޅިފައިވާ ކުށެއް މީހެއްގެ މައްޗަށް ސާބިތުވެއްޖެ ނަމަ އިސްލާމީ ޝަރީއަތުގެ އަސްލުތަކާއި އެއްގޮތްވާ ގޮތުގެ މަތިން އެ ގާނޫނާއި ގުރުއާނުގައި ކަނޑައަޅާފައިވާ ހުކުމެއް އެމީހެއްގެ މައްޗަށް އިއްވަން ވާނެ ކަމަށެވެ.
މީގެ ތިން އަހަރު ކުރިން ގއ. ގެމަނަފުށީގައި ވެސް ޒިނޭގެ ކުށް ސާބިތުވި މީހަކު ރަޖަމް ކުރަން ހުކުމް ކުރި އެވެ. ނަމަވެސް ސުޕްރީމް ކޯޓުން ވަނީ އެ ހުކުމްވެސް ބާތިލުކޮށްފަ އެވެ. ބާތިލުކޮށްފައި ވަނީ ޝަރީއަތް ހިންގާފައި ވަނީ ޝަރީއަތް ކުރުމުގައި އަމަލު ކުރަން ކަނޑައަޅާފައިވާ ޝަރުއީ އަދި ގާނޫނީ އިޖުރާއަތުތަކާއި އުސޫލުތަކާ ހިލާފަށް ކަމަށް ބުނެ އެވެ.
ޒިނޭ ކުރި ކަން ސާބިތުވެގެން ފަހުގެ ތާރީހެއްގައި ވެސް ރާއްޖޭގައި މީހަކު ރަޖަމެއް ނުކުރެ އެވެ.